1 SAMUEL 18 - Boy Lonana

¹ Doli ɗini hu li ma David daɓ ɓakŋa maŋ Solna may ni, Jonatan njun tam eg David minim ko tamba na.

² Hu buu namma ni Sol vi David kaŋga varam hinim ka tuɗ vi bum oloɗi.

³ Na ɗaŋŋi Jonatan vi galamba u David, kay nam minim ko tamba na.

⁴ Jonatan fok koɓoɗ mamba cuki egemba ki ɦaɗ maŋ David, barawi mamsina lay, ŋgew mamma lay, gu mbuuru mamba u ɗik mamma lay.

⁵ Hu sunda sunumba bel ni, hu li ma Sol sunum huna bel ni, David fi u dlaamba kiyo. Sol tinim a ŋgolla kay suu mam suu duuna. Suuna halaŋ wam ki jiviya, suu li sunda vi Solna lay.

Sol hal a ci David kiyo

⁶ Hu hoŋga asi hoŋ ay hu li ma David ci suu Filistinna kina, boyogina sel ay ki hu ɦoŋzi ma Israelna halaŋ gi soolla, luu njoŋŋa may tuɗ ŋgaf mulna Sol, bu darira may, ci yiyira may, bu diŋŋa may.

⁷ Boyogi suu u tasi bolow asina gi soolla ana, «Sol ci suuna ki buɓ, David ci suuna ni buɓ buɓ bulumi may.»

⁸ Sol hurum ɓeŋ ki cocoo. Boy namma hurum vam kaɗi. Nam di ana, «Asi ɦal suu buɓ buɓ bulumina ki maŋ David may, suu buɓma ki man may ni, va ma hin ka kombina ni mulla doy holɗi su?»

⁹ Sol gijaŋ gol David ki irim zeɗ hu buu namma.

¹⁰ Vin wanni ŋgussa cora col ay eg Lona mbay kay Sol, cam kiyo. David bu tlegeyem suu luuna ko jew dayra na. Sol u saɓ mamba kom may.

¹¹ Sol koo saɓpa kolo kam di ana, «An hin ɓal David ki pay goŋga.» Na may David suɗ kom yam mba'.

¹² Sol li ndaana ko David kay ana Yawe u namu, hin Sol kiyo.

¹³ Sol ɦuɗum ki egem day, tinim ki a mulna kay suu buɓma. David tuɗa, hin gi tam fok suuna.

¹⁴ Hu sun mamba bel ni, nam fi u dlaamba kiyo, Yawe u nam lay.

¹⁵ Golom dlaamba nam laɗ ŋgolora na ni, Sol li ndaana komu.

¹⁶ Na may suu Israelna halaŋ u suu vi Yudana minni David kay ana nammi sa tuɗ hoŋ ay fokosina.

David ɗum Mikal goŋ Solla

¹⁷ Sol di David ana, «Gola goronda ŋgolla, Merab, wanna. An hin ɦaŋga a cara ni ndaɗu. Na may aŋ lan sunda u saɓakaŋu, li duuna maŋ Yawe.» Sol ɓak tam ana, «Tiniygi koygi egembi, suu Filistinna li dla ndaɗta asiya.»

¹⁸ David di Sol ana, «Anni gege, njafan ay ni arage, deera vi bunda may ge, ni hu Israelɗi su? An hin li a kunuŋ mulnana ni nanage?»

¹⁹ Na may hu li ma Merab ta goŋ Solla hin a ɦaɗ ki maŋ Davidta ni, hin ɦaɗ ki maŋ Adriyel ma Meholana a cara.

²⁰ Mikal goŋ Solla huruɗ min David cocoo. Asi jok boy namma maŋ Sol, Dla ndaɗta irim jiviya.

²¹ Sol ɓak tam ana, «An hin ɦamba a ndaɗ li ni daw ma guni fokomma, suu Filistinna vam ki may.» Sol ɗaŋŋi ɓorow ii dlaamba dira maŋ David mba', «Aŋ hin li ni a kununna karam gaw.»

²² Sol ɦal voɗta maŋ suu mam suu sunda ana, «Ɓakagi maŋ David ŋgay gumunu. Dagina ana, Mulna min a laŋ dla jivira egeŋu, suu mam suu sunda miniŋ ɦay lay. Mbuɗ ki a kunuŋ mulnana ɗaŋ.»

²³ Suu li sunda vi Solna hoŋ boy namma ɓakŋa hum David olo olo. David di ana, «Agi min ana sa ka wi u dlara kombina li a kunuŋ mulnana ni nanage? Doli ɗini anni sa haw cocona, ka vi u dlaɗi layna.»

²⁴ Suu li sunda vi Solna mbaam boy namma ay ana, «Gola David dlara nam ɓakaɗta ni ko wanda na.»

²⁵ Sol di ana, «Agi ɓak David ɗaŋŋi ana, mulna min a begera ni vun ɗiw suu Filistinna ta cawaɗ kira na kis a sa sukul suu babali suu vi mulnana.» Sol saa ɗaŋŋi anaba nam min a ɦal David ki maŋ suu Filistinna.

²⁶ Suu li sunda vi Solna mba boy namma ay maŋ David. Yal namma ii David jiviya a nam mbuɗ ki kunuŋ mulnana. Buu ma ŋgaamma jak ka ki tuɗi.

²⁷ David gi tam hu voɗta tuɗ u suu mamsina. Nam ci suuna ki kis kis mba' u suu Filistinna. David yowosi vun ɗiwisi aya, asi tuɗ ndumuɗ ki maŋ mulna a David mbuɗ ki kunuŋ mulnana. Nam Sol hin ɦam goromba Mikal a cara.

²⁸ Sol gola ni wi ana Yawe ka u David ni Mikal ta goŋ Solla minim may.

²⁹ Sol li ndaana coco ko David olo. Sol hurum hin ɓeŋ ki egem su olo a fafaɗta.

³⁰ Suu muli suu vi suu Filistinna sel ki a duuna. Hu sel masira bel ni, David li saɓakŋa su suu li sunda vi Solna halaŋ. Sem hin gel fokosi ni nam dew.