1 SAMUEL 17 - Boy Lonana

Goliyat ma Filistinna hal asgaari suu Israelna a duuna

¹ Suu Filistinna tok asgaa masisina eg tasi a duuna. Asi tok tasi hu Soko ta Yudara. Asi hin mol ni duk ɦoŋ Soko u Azeka hu Efes Dammim.

² Sol u suu duu suu Israelna tok tasi mol hu ɦuɗugumba ɦoyra. Asi njaa tasi ki a duuna fok tasi u suu Filistinna.

³ Suu Filistinna lak ki kolo kay ɦinira ii ko maa dew. Suu Israelna lak ki kolo kay ɦinira ii ko hiŋŋa may. Ҥuɗugumba hin ki duk ɦoŋosiya.

⁴ Sa saɓakŋa ɦayna kal ay ki hu kaŋŋa vi suu Filistinna. Sem ana Goliyat. Nammi sa ma Gatna. Fiyekem ii metre hindi.

⁵ Nam u jum walakka kamu, koroŋ ma duuna mini u walakka cuki egem may. Nek koroŋ ma cuki egemma ni ii va ma kilo dok-karkiya.

⁶ Walak tusuna kali sem may, saɓpa kom may. Baraw damba njuni hurum may.

⁷ Gu saɓ mamba ni ko mbal ma vi suu cil barawnana na. Sin saɓ mamba nekeɗ ni kilo kiɗisiya. Sa mbarina komma tuɗ fokomu.

⁸ Nam col colni, yi suu Israelna ay a duuna. Nam dasi ana, «Jivira agi sel ay ki njaa tagi ki a duuna kaɗta ni taarage? An ka ni sa ma Filistinnaɗi su? Agi may ni ka ni mborɓogi suu vi Solnaɗi su? Managi sa dew nam ŋgafan aya.

⁹ Lini nam saɓak coco a njogoɗ u anu ni nam can kiyo, ami hin mbuɗ ki mborɓogi magisina. Lini an saɓak suumu ni an cam ki may agi hin mbuɗ ki mborɓogi mamisina. Agi hin lami sunda may.»

¹⁰ Sa ma Filistinna di ana, «Karam wanni an hal suu Israelna a duuna. Gangi sa ay dew ami duu tamiya.»

¹¹ Sol u suu Israelna halaŋ hum boy ma sa Filistinna damma na ni, mbuɗ ki ndaana.

David bum sunum ha hu kaŋŋa vi suu Israelna

¹² David ni goŋ sa ma Efrata ta Betlehem hu Yudara yam ana Jese, goryom kalavandi. Hu cokira vi Solla sa namma ki maari. Nam ɦal suuna a duuna.

¹³ Goryoŋ Jese suu ŋgolo suu hindina hin tuɗ ki ɗaŋ. Asi tuɗ u Sol fun duuna. Goryoŋ Jese suu hindi suu tuɗ ki fun duunana ni, ma ŋgolna yam ana Eliyab, ma a mbarana yam ana Abinadab, ma hindina yam ana Samma.

¹⁴ David ni ma tobo ma daɓ daganna. Suu ŋgolo suu hindina tuɗ u Sol.

¹⁵ Na may David tuɗ vi Sol hin hoŋ ay taa yoori suu vi bumma hu Betlehem.

¹⁶ Sa ma Filistinna mbay maɗii may, fiɗigi may. Nam tak tam ko ndaɗta na buuna dok-fiɗi.

¹⁷ Jese di goromma David ana, «Yow mappana wan ɗaŋŋi maŋ gorseŋŋa, mappa ma doogo wanni liŋ tuɗ ɦam ha maŋ gorseŋŋa hu kaŋŋa.

¹⁸ Yow mbul mbiira doogo wanda tuɗ ɦaɗ maŋ sa ŋgol ma fok suu duunana. Aŋ hin joɓ ay kay iirira vi gorseŋŋara may. Aŋ hin tlasi vaasi maa ay koŋ dew.

¹⁹ Sol ha ka u asiya u suu Israelna halaŋ hu ɦuɗugumba ɦoyra duu u suu Filistinna.»

²⁰ David col kolo maɗii na feɗet hin yoorina ka maŋ sa golla, tli nek mamba kam tani, tuɗ u vun sunda vi Jesera tew ki hu kaŋŋa. Asgaari suu hin tuɗ a dlaɓ u ndarayasina fun duunana, yi kolo u delesira eŋga a duuna.

²¹ Suu Israelna u suu Filistinna min tasi a ŋgaf duuna.

²² David hin tlesuu ay kamma tinisi kaŋga fok sa ma gol tlena, ndi liŋŋa, tuɗ fun duuna gi deɓpa maŋ gorsemma.

²³ Nam ɓak u asi tu na ni, gola ni ay duk suu Filistinna sa ma saɓakŋa yam ana Goliyat, sa ma hu Gat ta Filistinda. Nam ɓakŋi boy ma dewna David humum vunumu.

²⁴ Suu Israelna halaŋ wi sa namma na ni mbuɗ ki ndaana cocoo, yow liŋŋa.

²⁵ Suu Israelna di ana, «Agi wagi sa ma ɗiŋ ay kolo wanna su? Nam ɗiŋ ay kolo hal ni suu Israelna a duuna. Lini sa cam ki wa ni mulna hin mbuɗ sa namma ki begera. Nam hin ɦam goromba, suu hu njafamma suuna hin ɦasi ŋgolla duk suu Israelna.»

David ɦal tam a duu Goliyat

²⁶ David di suu coli egem tok tokŋa ana, «Hin li ni me maŋ sa ma hin ci sa ma Filistin namma ki may, bulum zolo ma vi suu Israelna ki may nage? Sa namma ni gege, gasi daŋ may sa ma Filistin ma ɗiwim bay cawra ma hal suu vi Lo ma iirina a duuna nige?»

²⁷ Suuna hoŋom dira ni ko ndaɗta na olo ana, «Gola ni dlara hin laɗ eg sa hin cam kina.»

²⁸ Eliyab, wayam ma ŋgolna, hum vun David ɓak suuna. Nam mbuɗ yara u namu, dam ana, «Aŋ mbay tani ni amege? Sa aŋ hinim yoorina ha mam hu fullana ni gege? An wiya, an waŋ zazak maŋga, saa maŋga cora lay, ni ka a wi duuna aŋ mbay ni na.»

²⁹ David di ana, «Na may ni va ma an lamma ni mege? An ɓakŋi ɓaki ɦawaa.»

³⁰ Nam hinim hinni tuɗ ɓak sa daŋŋa. Nam hoŋom joɓpa olo. Suuna hoŋom dira ni kora jewra na.

³¹ Hu li namma wanni boy ma David ɓakamma suuna humumu, asi tuɗ njaɗ boy namma maŋ Sol. Nam may ni hin yam haa.

³² David di Sol ana, «Ka sa ɓeŋ hurum ki ko sa Filistin nammaɗi, saaŋ ma sunda hin tuɗ duurumu.»

³³ Sol di David ana, «Aŋ ka ndak a tuɗ duu taŋ u sa ma Filistin nammaɗi, aŋŋi gogoona tuwa, nammi sa duuna ay u gorom day.»

³⁴ David di Sol ana, «Saaŋ ma sunda ay ni sa taa yoona vo vi bumu. Lini dlona mbay lay, ŋguuna lay a komon timigii mansina ni,

³⁵ an gaaram um tewra, duurum ɓaɗasi ay funumu. Lini nam gan jaŋan wa ni an yowom jerem kon na ni, cam ki maɗna gaw.

³⁶ Saaŋ ma sunda ci dlona ki u ŋguuna. Sa ma Filistinna ma ɗiwim bay caw namma hin li ni ko tle asina na may, kay ana nam hal suu vi Lo ma iirina a duuna.»

³⁷ David di ana, «Yawe ma ɓaɗan ay ki ko cifiɗ dlona u ŋguunana, ni sa ma hin ɓaɗan ay ki ko sa ma Filistin nammana.» Sol di David ana, «Tuɗa, ko Yawe li u aŋu.»

David ci Goliyat kiyo

³⁸ Sol cuk baraw mamma ki eg David, tinim jum mamba walakka ki kamu, cukum koroŋŋa egem may.

³⁹ David tli ŋgew ma vi Solna kom kayam hu ta may gijaŋ gol tam u tuɗta ɦawara kay sa haɗam dla duuna kaɗi. David di Sol ana, «An ka ndak a tuɗ u tle asina halaŋgi, kay ana an haɗ dla duuna kaɗi.» David hin fok tle asina kiyo.

⁴⁰ Nam tli tokolo mamba komu, man gogoyra taɗ keleɗta duk mbo lumma vadl, cukuɗ hu mbumbu mamba taa yoorina, hu mbumbu mamba kawi komba, mbuurura kom may, ɦuɗ tam ha kay sa ma Filistinna.

⁴¹ Sa ma Filistinna u saam ma ziirim mbarina fokom may, gijaŋ tuɗ aya, ɦuɗ tam ay eg David na tok tok.

⁴² Sa ma Filistinna gol irimu, hu li ma nam wi David na ni nam panam ana ni gogoo ma goona, ma irim ki saɗina, ma irim jivina.

⁴³ Sa ma Filistinna di David ana, «Anni dina a aŋ mbay egen u tokolora koŋ su?» Sa ma Filistinna gi vunna maŋ David u loogi mamsina.

⁴⁴ Sa ma Filistinna di David ana, «Mbay tani an ɦaŋ tliwiŋ ki maŋ layagi suu kolo huulonana, maŋ mbuuri suu duk buburana.»

⁴⁵ David di sa ma Filistinna ana, «Aŋ mbay egen u ŋgewna koŋu u saɓpa u baraw damba may, an tuɗ ha egeŋŋi u sem Yawe Lona vi suu Israel ma Saɓakŋa Kom Bel sa aŋ halam a duuna na.

⁴⁶ Karam gak gak Yawe hin ɦaŋ ki konu, an hin caŋu hin ŋgaɗaŋ yaŋ ki lay. Karam gak gak an hin ɦal maɗ suu duu suu Filistinna ki maŋ layagi suu kolo huulonana, ki maŋ mbuuri suu kay ndaŋgarana. Ndaŋgara halaŋ hin wi ki ana Lo ma vi Israelna kaa.

⁴⁷ Suu moli ca wanna hin wiya. Yawe ka ɦal saɓakŋa ni u ŋgewnaɗi lay, ka u saɓpaɗi lay, may Yawe ni malaŋ duuna, nam hin ɦagi ki komiya.»

⁴⁸ Hu li ma sa ma Filistinna tli tam kolo a ŋgaf Davidna, ɦuɗ tam ay na tok tok, David ndi liŋŋa zak tuɗ min tam a ŋgaf sa ma Filistinna.

⁴⁹ David kal kom hu mbumbu mamba na zak gaw ni, tli gogoyra hakaɗ hu gewrek gewrek mamba gik vok sa ma Filistinna, gogoyra ŋgaa vogomu, nam kuluɓ kaŋga u vunum kay ndaŋgara na dlum.

⁵⁰ Na ɗaŋŋi David hin su kay sa ma Filistinna u gewrek gewrek mamba u gogoyra. Nam gik sa ma Filistinna, cam kiyo. David ay ka u ŋgew kombi lay.

⁵¹ David ndi liŋŋa tuɗ col eg sa ma Filistinna na tok, paɗam ŋgew mamma ay ki hu ziimu, hin dok sa ma Filistinna ki u namu, ŋgaɗam yam kiyo. Suu Filistinna wi ana saasi ma saɓakŋa miɗ ki wa ni, asi yow liŋŋa.

⁵² Suu Israelna u suu Yudana tum kolo yi u delesira duuna, cuɗ u suu Filistinna ta ta tew ha ki hu vun li ma ɦuɗugumba ta ta fun grek ma vi Ekronna. Maɗ suu Filistinna ki cukira hu voɗta Saaraimba ta ta hu Gat u Ekron lay.

⁵³ Asi cuɗusi usi ŋgolla cuɗ ni, suu Israelna hoŋ ay ɦurum tlesuu hu kaŋŋa vi suu Filistinna kiyo.

⁵⁴ David tli yam sa ma Filistinna tuɗ u ndaɗ ki Yerusalem. Nam hin cukum u ɓagi mamma ki hu mbutluɓ mamma.

Jonatan vi galamba u David

⁵⁵ Gol David tuɗ a ŋgaf sa ma Filistinna, ni Sol di Abner ma ŋgol asgaana ana, «Gogoo namma ni goŋ ge nage, Abner?» Abner di ana, «U saɓak maŋŋa, mulna, an ka wiɗi.»

⁵⁶ Mulna di ana, «Aŋ joɓ u taŋga gogoo namma ni goŋ ge nage?»

⁵⁷ Hu li ma David ci sa ma Filistinna ha ki ci hoŋ ayna, Abner vam tuɗum fok Sol. Nam u yam sa ma Filistinna komu.

⁵⁸ Sol dam ana, «Aŋŋi goŋ ge nage, goonna?» David di ana, «Anni goŋ saaŋ ma sunda, Jese ma Betlehemma.»