1 SAMUEL 16 - Boy Lonana

DAVID GIJAŊ VARAK BALAM SOL Samuel fuu David a mul ma Israelna

¹ Yawe di Samuel ana, «Aŋ hin tii kay Sol na gak gak su? An tanda noyom ki ni anu. Nam ka mul ma Israelna oloɗi. Oy mek maŋŋa u mbulna tuɗa. An sunuŋ ha vo vi Jese ma Betlehemma, kay ana an gol duk goryom wanni sa ma tinim a mulnana kaa.»

² Samuel di ana, «An hin tuɗ ni ana mege? Lini Sol hum wa ni, nam hin can kiyo.» Yawe di ana, «Aŋ vi mbutla wayra ha uŋŋu hin di ana, an mbay ni a li ɓivunna maŋ Yawe.

³ Hu givin ma togolla wanni aŋ hin yi Jese ay egeŋu. Na ɗaŋŋi an hin takaŋ dlara aŋ hin laɗta u tanda, aŋ hin fuurun sa ma an tinim a mulna ma an hin takaŋŋana.»

⁴ Samuel li dlara Yawe dambara. Nam tuɗ hu Betlehem. Suu basi suu hu ɦoŋzinana mbay dlak ko ndaana ŋgafamu. Asi di ana, «Va tlaŋ ayna ni dlara furira su?»

⁵ Nam hoŋ dira ana, «Gasi an mbay ni kay a li ɓivunna maŋ Yawe. Mbuɗugi tagi ki teteɗ, agi hin mbay u an hu li ma ɓivunna.» Nam mbuɗ Jese u goryom ki teteɗ yasi hu li ma ɓivunna.

⁶ Hu li ma asi mbay na, Samuel wi Eliyab, hin ɓak tam ana, «Gasi daŋ may, ni sa Lona fuurum fok Yawe tanina.»

⁷ Na may Yawe di Samuel ana, «Aŋ ŋgaam kay jivim u wulum ma fiyekŋa na gawɗi. An hoŋ dira olo ka ni kay dlara suuna waɗ u irisira ɦawaɗi. Suuna wi ni dlara ki irisi kiɗikka, may Yawe wi ni huuna.»

⁸ Jese yi Abinadab, colom fok Samuel, may Samuel di ana, «Sa wanna lay ni Yawe manam ka tuɗi.»

⁹ Jese yi Samma, colom fok Samuel. Samuel hin di ana, «Sa wanna olo ni Yawe manam kaɗi.»

¹⁰ Jese yi goryom ko ndaɗta na ta ta kiɗisiya, colosi fok Samuel. Samuel di Jese ana, «Yawe man sa ka duk suu asina dewɗi.»

¹¹ Samuel di Jese ana, «Gor zoŋŋina ki mbay tani ni halaŋ su?» «Ma goo ma daɓ daganna ha voo, nam ha taa yoorina.» Samuel di Jese ana, «Sun kam, halam aya. Ami ka gijaŋ ti funa jew bay nam mbaɗi.»

¹² Jese hin yam aya. Nam ki tlawi. Irim jivi cocoo, saaram jivi coco lay. Yawe di ana, «Col koloo, fuurumu, ni namu.»

¹³ Samuel tli mek ma mbulna hurumma tani, hin fuurum duk gorsemma. Musuk Yawera hin mbay kay David hu buu namma. Samuel hin gi tam voɗ tuɗ Rama.

David kal hu sunda fok Sol

¹⁴ Musuk Yawera hin Sol ki tani, ŋgussa cora col ay eg Yawe lasamu.

¹⁵ Suu li sunda vi Solna dam ana, «Gola ŋgussa cora col ay eg Lona hin lasaŋu.

¹⁶ Ko malaygina ɓakka na. Suu maŋ suu sunda ka fokoŋu. Asi hin hal sa wi yal bu diŋŋa, na ɗaŋŋi hu li ma ŋgussa cora col ay eg Lona mba kaŋ wa lasaŋu ni, nam hin buum wa ni taŋ hin koɗa.»

¹⁷ Sol di suu mam suu li sunda ana, «Halangi sa wi bu diŋŋa, mbaangi na ay ɗaŋ.»

¹⁸ Sa goo gom maa dew di ana, «An wi gasi daŋ may, goŋ Jese maa dew ma Betlehemma. Nam wi bura. Nam saɓak cocoo, sa duu ma jivina lay. Nam ɓak dlara u yalna coco lay. Nammi sa jivina lay. Yawe u namu.»

¹⁹ Sol sun suu vun sunda eg Jese. Nam dam ana, «Sunun goroŋŋa David aya, sa gol yoorina.»

²⁰ Jese vi korra dew, mappana nde may, mbumbura u sum veŋŋa, goo ɦuna may sun goromma David tuɗ ɦasi maŋ Sol.

²¹ David tew ha ki eg Sol may ni kal ki hu sunda fokommi na gaw. Sol hurum haɗ kam cocoo. David hin mbuɗ ki gogoo mam ma sunda.

²² Sol sun di Jese ana, «Ko David hin vo varan lan sunda kay an minim ɦay.»

²³ Na ɗaŋŋi hu li ma ŋgussa vi Lona mba kay Sol wa lasamu ni, David tli diŋŋa buumu. Na ɗaŋŋi Sol hin ɗigilla, hin mbuɗ mariyaɗ, ŋgussa co ndaɗta hin hinimu.