1 SAMUEL 15 - Boy Lonana

Dla cora Sol laɗ wilira

¹ Samuel di Sol ana, «Anni sa Yawe sunum ha ana fuuruŋ ki a mulna kay suu mam suu Israelnana. Cecem wanda ɗaŋŋi hum boy ma vi Yawena haa.

² Na ɗaŋŋi Yawe ma Saɓakŋa Kom Belna ɓak anaba, an hin kaɓakŋa kay Amalek kay dlara nam laɗ eg Israella, dooroɗ voɗta ki hu li ma ndaɗ a kal ay ki hu Egiptena.

³ Cecem wanda ɗaŋŋi tuɗ ci Amalek kiyo. Agi ndak a doo ki kay tlegeyem lay. Aŋ hinim oloɗi. Aŋ casi ki halaŋ halaŋ, jufiina, boyogina, kemba u gor kem suu fun pona tuna lay, mbutlina u timigiina lay, jamballa u korra.»

⁴ Sol yow suuna tokosi ki eg tasi hu Telem. Asi halaŋ 200.000, suu saɓak suu Yudana suuna buɓ buɓ doogo.

⁵ Tew ki hu ɦoŋzi ma vi Amalekŋa may ni Sol ŋgay tam buu guɓura ki kaŋga hu voɗ mbona.

⁶ Sol di suu Kenna ana, «Tuɗugiya, ɦuɗugi tagi kiyo, hinigi suu vi Amalekŋa, ka an lagi dlara egegi ko nam na koɗi, agi may ni lagi dlara jivira eg goryoŋ Israelna halaŋ hu li ma asi sel ay ki hu Egiptena.» Suu Kenna ɦuɗ tasi ki duk suu vi Amalekŋa.

⁷ Sol waɗ Amalek, col ay hu Havila day ta ta tew ki hu Kur ta ki fok taɗ u Egiptera.

⁸ Nam vi Agag mul ma vi Amalekŋa iiriya. Nam ɦal voɗta ana cam suu mamsina halaŋ ki u ŋgewna.

⁹ Na may ni Sol u suu mamsina hin Agag bay cira u yoori mam suu gorina may suu ŋgolona may, u tlesuu gori suu daganna gor timigiina u tlesuu jivi suu huna halaŋ. Nam hin vi ka kam a ɦasi ki a ciraɗi. Tlege suu sunusi kaɗina, suu ka jiviɗina, nam ɦasi asina kiyo.

Lona noy Sol kiyo

¹⁰ Yawe ɓak boy mamma maŋ Samuel ko wanda na ana,

¹¹ «An hom kay dlara an mbuɗ Sol ki mulnara kay ana nam noyon ki, van boy manna ka kambi.» Samuel hahawra vamu, nam yi Yawe kolo u delem eŋga njeŋgee.

¹² Samuel col kolo maɗii na feɗet tuɗ ŋgaf Sol. Asi mbay di Samuel ana, «Tew ha ki hu Karmel may ni Sol min li ma goɓ Lona hurumma gaw, nam hin tuɗ ha ki fok na day olo, hin hoŋ ha ki hu Gilgal.»

¹³ Samuel tuɗ eg Sol. Sol dam ana, «Ko Yawe paɗ vunum ki kaŋu. An vi ki u boy ma vi Yawena wa.»

¹⁴ Samuel di ana, «An hummi tii timigii suu mege, hummi tii mbutlugi suu me koron humun nage?»

¹⁵ Sol di ana, «Asi yowosi ay ni vi suu Amalekŋa. Ni ana suuna fi timigii suu jivina u mbutli suu jivina a li ɓivunna maŋ Yawe, Looŋŋa. Suu hin hiŋŋa ami ɦasi asi casi kiyo.»

¹⁶ Samuel di Sol ana, «Na ga an daŋ dlara Yawe danda njeŋgera haa.» Nam dam ana, «Ɓak aya.»

¹⁷ Samuel di ana, «Lini aŋ gol taŋ va ma ɦawana ii taŋga lay ni aŋ ka ni sa fok njaf suu Israelnaɗi su? Yawe fuuruŋŋi a mul ma vi Israelna.

¹⁸ Yawe gaŋ sunda nam di ana, tuɗa, aŋ ɦal suu suluk suu vi Amalekŋa kiyo. Aŋ duurusi ta ta daɓasi ki cira.

¹⁹ Aŋ hum vun Yawe kaɗi ni kay mege? Ni kay me aŋ gijaŋ tlena ɦurumba na gaw, li dla cora ii Yawe na gaw nige?»

²⁰ Sol di Samuel ana, «An vi vun Yawe. An tuɗ ay vun sunda hu li ma Yawe sunun ay huna. An vi Agag mul ma vi Amalekŋa aya, Amalek tamba lay. An ɦam ki ana cam kiyo.

²¹ Suuna yow yoori suu gorina u suu ŋgolona ay hu jona. Suu jivi suu doo ki kasina a li ɓivunna maŋ Yawe Looŋŋa hu Gilgal.»

²² Samuel di ɗaŋŋi ana, «Yawe min ɓivun ma ŋgalam ki ŋgalina u ma lam ɦawana ŋgolla su humba hum u boy mammara su? Ҥawaa, humba ni ŋgol su ɓivunna, gi yamba kaŋgara su mbul gamlagina.

²³ Na may yara lira ŋgol su kaboy ma kaamma, ciwayra su kumu ma vamma kay ana aŋ noy boy ma vi Yawena kiyo. Nam noyoŋ ki may, aŋ ka mul oloɗi.»

²⁴ Sol di Samuel ana, «An li suluku, an calaɗ ki kay gaɗta vi Yawera u boy mamma lay. An li ndaana ni ko suuna, an hin vasi vunusiya.

²⁵ Cecem wanda an ceneŋu, aŋ bulumun suluk manna kiyo, hoŋ u an, an tuɗ goɓ kaŋga fok Yawe.»

²⁶ Samuel di Sol ana, «An ka hoŋ u aŋgi kay ana aŋ noy boy ma vi Yawena kiyo, Yawe hin noyoŋ ki may, aŋ ka mul ma Israelna oloɗi.»

²⁷ Hu li ma Samuel pereɗ irim a hoŋ daganda, Sol vam vun baraw mamba, ndaɗ haa kiyo.

²⁸ Samuel dam ana, «Yawe ɓaɗaŋ mulla Israella ki koŋ wa. Karam nam hin ɦaɗ ki maŋ sa daŋ ma jivi suuŋŋa.»

²⁹ Na lay ni, «Bibiŋilla vi Israella ka mbuɗ ki kaboyɗi lay, ka hom ki kaŋgaɗi lay kay ana nam ka sa warɗi, dlara nam a hom kaɗ kaɗi.»

³⁰ Sol di ana, «An li suluku. Cecem wanda an ceneŋu, aŋ mbuɗun ki jivi fok suu basi suu duk suu mansinana, fok Israel lay. Hoŋ ay u anu. An hin goɓ kaŋga fok Yawe, Looŋŋa.»

³¹ Samuel hoŋ ay kay vun Sol. Sol hin goɓ kaŋga fok Yawe.

³² Samuel di ana, «Mbaagi Agag mul ma vi Amalekŋa aya.» Agag mbay egem u furira. Nam ɓak tam ana, «Gasi daŋ may dlara ci maɗna ki hiniya.»

³³ Samuel di ana, «Ŋgewna ki doori kay boyogina u goryosi lay kay suŋ duk ɦoŋ boyogina doo ki kay goroɗna lay.» Samuel tuɗ Agag fok Yawe hu Gilgal.

³⁴ Samuel tuɗ Rama. Sol hin hoŋ vo varam hu Gibea ta vi Solla.

³⁵ Samuel wi Sol ka oloɗi ta ta hu buurum ma miɗna. Ni ana Samuel tii kay Sol kay ana Yawe tii tam kay tinda nam tin Sol a mulna kay Israella.