1 SAMUEL 14 - Boy Lonana

Jonatan duu suu duu suu Filistinna

¹ Hu buu maa dew Jonatan ma goŋ Solna di gogoo mam ma sunda ana, «Mbaya, ɦuɗuy hu li ma vi suu Filistinna ma ha ki ii ko hiŋŋana.» Na may ni nam ne yam bum kaɗi.

² Sol kak hu ii hakara Gibeara u ŋgusu maŋgora hu Migron. Suuna um halaŋŋi kis kis karkiya.

³ Ahiya ma goŋ Ahitubma, wayaŋ Ikabodna, goŋ Pinhasna, goŋ Helina, sa vi Yawe ma li ɓivunna hu Silona cuk efodna egemu. Suuna wi ka ana Jonatan tuɗ ki waraɗi.

⁴ Hu voɗta dew Jonatan hal a jak ki a duu suu Filistinna, keŋ lina wanni pay ɦinira ma daɓma ka huwa, maa dew yam ana Bose, ma hiŋŋa yam ana Senne.

⁵ Keŋeɗ ma dew ni coli ii mbayawi, fok zi ma Mikmasna, ma hiŋŋa ii ma dalina, fok zi ma Gibeana na.

⁶ Jonatan di gogoo mam ma sunda ana, «Mbaya, ɦuɗuy ha hu li ma vi suu bay caw ɗiwisi ki tuna na. Kala Yawe li hin li u ay kala nige. Gasi daŋ may ay li ka bolowɗi lay ni, va doo Yawe ki a nam ɦaygi a su kasina kaɗi.»

⁷ Gogoo mam ma sunda dam ana, «Li halaŋ u saa maŋga. Ҥuɗ haa, an tuɗ ha kay cereŋ u saa maŋga.»

⁸ Jonatan di ana, «Cecem wanda aygi ɦuɗ ha ni egesiya. Aygi hin takaygi taygi ki irisiya. Suu masina hin waygiya.

⁹ Lini asi daygi wa ana, Cologiya, juɓumi ami tew ha ki egegi tuwa. Aygi hin lakŋi hu li ma dewna, hin ka tuɗuygi egesiɗi.

¹⁰ May lini asi di wa ana, mbaagi ay egemiya ni, aygi hin tuɗ egesiya. Ni ana Yawe ɦaygisina ki duk koygi wa. Va hin tak tam ki iriygi hu li namma.»

¹¹ Asi hin tasi suu Filistinna wasi ki u dlasira mbara. Suu Filistinna di ana, «Gola suu Hebrena sel ay ki hu zulla asi ŋgay tasi ay ki hura ɗaŋ.»

¹² Suu hu Kaŋŋana di Jonatan u gogoo mam ma sunda ana, «Mbaagi ay egemiya, ami a takagi vaa.» Jonatan di gogoo mam ma sunda ana, «Tuɗ ay ŋgoron dagani. Yawe ɦasi ki duk ko Israel wa.»

¹³ Jonatan tuɗ haa, ɦal ki kom u sem ki lay, gogoo mamma kay cerem may. Suu Filistinna puk ki kaŋga ko waɗta vi Jonatan u gogoo mam ma sundara ŋgorosi dagani.

¹⁴ Waɗta jew Jonatan u gogoo mamma waɗ suuna na dok-mba'. Hu li ma sa ka gi dara zum hu dewɗi layna.

¹⁵ Suuna mbuɗ ki ndaana hu kaŋŋa, ki ɦoŋzi ma bagina lay, duk suuna halaŋ. Kaŋŋa u suu li dla cora mbuɗ ki ndaana lay. Ndaŋgara dlakka, ni ndaa ma vi Lonna.

Suu Filistinna njay kiyo

¹⁶ Hu Gibea ta vi Benjaminda suu vi Solna dleɓ ka gol irisiya. Asi wi suuna bolowo njay kosi ki kasi hu lina na halaŋ halaŋ.

¹⁷ Sol di suu umma ana, «Yagi ha kolo ɗaŋ, gologi sa uygi ma tuɗ kina.» Asi yi kolo, Jonatan u gogoo mam ma sunda kaɗi.

¹⁸ Sol di Ahiya ana, «Ҥuɗ Zanduk Lonara aya.» Ay hu buu namma gasi daŋ may ni Zanduk Lonara u goryoŋ Israelna.

¹⁹ Doli ɗini hu li ma Sol ɓak mul ma li ɓivunna na ni, dlara mbuɗ ŋgolla duk suu Filistinna hu kaŋŋa ni mbuɗiya. Sol di Mul ma li Ɓivunna ana, «Hoŋ koŋ kiyo.»

²⁰ Sol u suu umma halaŋ tok tasi tuɗ hu li ma ci yara. Asi paɗ ŋgewna ki kosi gegelay kay ndaramma. Sa ka hum tambi ni na halaŋ halaŋ.

²¹ Suu Hebrena li ay jew sun suu Filistinna hin tuɗ ay kolo u asi hu kaŋŋana pereɗ hurusi tuɗ taɓ ki u suu Israelna Sol u Jonatan.

²² Suu Israel suu ŋgay tasi ay ki kay ɦinira Efrayimba hum ana suu Filistinna njay ki wa ni, min tasi ay a duuna may.

²³ Yawe ɦal saɓakŋa maŋ Israel hu buu namma ni duuna tuɗ ta ta tew ki hu Bet-Awen, jak kaɗ lay.

²⁴ Suu Israelna wi hawra hu buu namma ɦay, kay Sol gi vunna maŋ suuna ni ko wanda na, «Cora ka kay sa ma ti va tira jew bay an sa sukulun ki u suu babali mansina bay faɗta ɗik tuna.» Suuna halaŋŋi sa juk va ti kaɗi.

Suuna suɗ Jonatan kiyo

²⁵ Suu hu mbas ndaɗtana halaŋ tuɗ ki duk gura. Mbul yumma ki kaŋga kay ndaŋgara.

²⁶ Hu li ma suuna kal ki duk gura may mbul yumma gijaŋ ɓaɗta gaw. Gegelay ni ka kal kom funumbi kay ana suuna li ndaana ko suura.

²⁷ Na may ni Jonatan hum vun bum ka hu li ma bum ɦeɓ suuna a suuranaɗi. Nam maɗ tokolora komba kalaɗ vunuɗ ay duk mbul yumma, hin kal kom funumu. Irimba golla mbuɗ ki haɓpa.

²⁸ Sana dew duk suuna mbay ɗaŋŋi di ana, «Buŋ ɦeɓ suuna suurusi ki ana cora ka kay sa ma ti va ma tira karamma, suuna hin loɓ kiyo.»

²⁹ Jonatan di ana, «Bun li dla cora ka eg mbassa wa. Gologi irinda golla mbuɗ ki haɓpa ni kay ana an juk mbul yumma nde.

³⁰ A kay gasira may ni lini karam wanni suuna li ni ti ni tlesuu hu jona vi suu babali masisinana ni cira ci suu Filistinnara hin li ni ŋgol suɗi su?»

³¹ Hu buu namma ni asi ci suu Filistinna col ha hu Mikmas day ta ta tew ki hu Ayalon. Suuna loɓ ki cocoo.

³² Ɓaɗ tasi kay jona. Asi yow yoori suu gorina, mbutlina, gor mbutlina, ŋgaɗasi ki kaŋga hin komosi ha kay busuna.

³³ Asi tuɗ di boy namma maŋ Sol ana, «Suuna ka li sulukŋa eg Yawe, asi kom tlena u busuɗusiya.» Sol di ana, «Agi ni suu gi ura kina, lagaɗagi gogoyra ŋgolla ay egen tani cecem.»

³⁴ Sol di ana, «Njayagi kogi ha ki duk suuna dagi ana, gegelay mbaan mbutl mamma u timii mamma aya. Agi hin ŋgaɗasi komosi kaŋga tani, bay li sulukŋa eg Yawera ni komosi bay busuna.» Njeŋge ndaɗta gaw ni suuna halaŋ gegelay ɦal mbutl mamma aya, asi ŋgaɗam hu li namma.

³⁵ Ni kay ndaɗta Sol min givin ma togolla maŋ Yawe ni na. Ni givin ma togolla ma nam minim jew maŋ Yawena.

³⁶ Sol di ana, «Tuɗuygi ciɗiygi u suu Filistinna njeŋgee. Aygi hin ɦurumusi tlegeyesi ki ta ta maɗiira hin faygiya. Aygi hin ka hin va dewɗi lay.» Asi di ana, «Li dlara huruŋ vaɗta halaŋ.» Mul ma li Ɓivunna di ana, «Ҥuɗuygi taygi eg Lona cecem gaw.»

³⁷ Sol joɓ Lona ana, «An ndak tuɗ ciɗ u suu Filistinna su? Na ni aŋ hin ɦasi ki ko suu Israelna ko su?» Na may hu buu namma ni Lona hoŋom dira kaɗi.

³⁸ Sol di ana, «Ҥuɗugi ay tani agi halaŋ, muli suu vi suunana. Wagi dla mayra sulukŋa laɗ karamba ɗaŋ.

³⁹ Gasi u saɓakŋa vi Yawena, sa Lona fuurum ma vi suu Israelna, li ni kay dla cora goronna Jonatan laɗta lay ni, na ɗaŋŋi nam hin miɗa.» Duk suuna halaŋŋi sa dew lay ni hoŋom dira kaɗi.

⁴⁰ Sol di suu Israelna halaŋ ɗaŋŋi ana, «Agiya, agi lakagi ki ii ko maa dew, ami u goronna Jonatan hin lakami ii ko ma hiŋŋa may.» Suuna di Sol ana, «Li dlara iriŋ jivira halaŋ.»

⁴¹ Sol hin di Yawe ana, «Lona vi suu Israelna, hoŋomi dira ay ki bel.» Asi hin ŋgaɓ Jonatan u Sol, suuna hin cukki ni bay dla kasiya.

⁴² Sol di ana, «Ŋgaɓagi dukumi u goronna Jonatan.» Asi hin tli ni Jonatan.

⁴³ Sol di Jonatan ana, «Njaɗan dlara aŋ laɗta aya.» Jonatan hin njaɗamba. Nam di ana, «Gasi an juk mbul yumma fun tokolora kondana. Gola an cecemmi ni lin a miɗ kira.»

⁴⁴ Sol di ana, «Ko Lona li dla wanda hin li dla hiŋŋa olo. Gasi aŋ hin miɗa, Jonatan.»

⁴⁵ Suuna di Sol ana, «Na ni Jonatan hin miɗ ki su? Nam sa ma li saɓakŋa coco fok suu Israelna ɦayna? Ni dla cora u saɓakŋa vi Yawena. Tlimiɗ yam na dew lay ni hin ka ndi ki kaŋgaɗi, kay ana nam li dla ndaɗta karam gakŋi u Lona.» Na ɗaŋŋi suuna hin gi Jonatan, nam hin miɗ kaɗi.

⁴⁶ Sol tin um ciɗ u suu Filistinna. Asi suu Filistinna hin tuɗ ki hu mbas masira.

Saɓak ma Sol lamma, suu mamsina

⁴⁷ Hu li ma Sol tli mulla kay suu Israelna, nam duu u suu babali suu ŋguy kamma halaŋ u Moab, u goryoŋ Amonna u Edom u muli suu Sobana u suu Filistinna. Aragelay hu li ma nam pereɗ irim huna, nam su kasiya.

⁴⁸ Nam tak saɓak mamma ki u cira nam ci Amalek kira. Ɓaɗta nam ɓaɗ Israel ay ki ko sa ɦurumuɗ kina.

⁴⁹ Goryoŋ Solna ni ugi Jonatan, Isevi, Malkisu wa. Goryom suu gorɓiina ni Merab ta ŋgolla, Mikal ta goora.

⁵⁰ Caŋ Solla yaɗ ana Ahinoam, ndaɗ ni goŋ Ahimassa. Sa ŋgol asgaa mamma yam ana Abner, nammi goŋ Ner ma bumba Solna.

⁵¹ Kis ni bu Sol. Ner ni bu Abner may. Nammi goŋ Abiyelna.

⁵² Yara vi suu Filistinna hu buu ma vi Solna halaŋ halaŋ. Sol wi sa hiŋŋa wa, wi sa saɓakŋa wa ni nam tlam gaw.