1 SAMUEL 13 - Boy Lonana

DUU MA SOL DUUNA Yara laɗ u suu Filistinna, Cora Sol laɗta

¹ Sol basaɗam dok-hindi hu li ma nam mbuɗ ki mulnana, nam hin kak mulna kay suu Israelna basara dok-fiɗi yam mba.

² Sol man suuna duk suu Israelna na buɓ buɓ hindi suu ay u Solna na buɓ buɓ mba hu Mikmas kay ɦinira Betella. Suu hiŋŋa buɓ kay cee Jonatan may hu Gibea ta vi Benjaminda. Nam dik suuna usira hinda gegelay tuɗ hu mbutluɓ mamma.

³ Jonatan ci sa ŋgol ma vi suu Filistinna ki hu Gibea, suu Filistinna hum boy namma. Na ɗaŋŋi Sol bu tokolomma hu mbassa halaŋ di ana, «Ko suu Hebrena hum boy namma haa.»

⁴ Suu Israelna gegelay hum boy namma ana Sol ci sa ŋgol ma vi suu Filistinna kiyo. Israel taɗta lay ni mbuɗ ki loɓma coco u suu Filistinna. Suuna halaŋ tok tasi kay cee Sol hu Gilgal.

⁵ Suu Filistinna yow ay a duu u suu Israelna. Asi ay u puspusna usi buɓ buɓ dok-hindi, suu kulumina buɓ buɓ karkiya. Suu semba bolowra ko ndal ŋgetlna vun lummana na. Asi tuɗ lak hu Mikmas, hu Bet-Awen u faɗ maɗiiya.

⁶ Suu Israelna wi ana asi ki baaya kay ana suuna ɦeɓesi ki na tok. Suuna ŋgay tasi hu zul gogoyra, hu zulla u ɦinira, u goloŋga.

⁷ Suu hebrena ɗiŋ lumma Yurdanna ay ki lay a tew ki hu mbassa Gad u Galaadta. Sol ay ki hu Gilgal tuwa, suu ay um daganna halaŋŋi dlak ko ndaana.

⁸ Sol juɓ vi vun ma asi vam u Samuelna ta ta buuna kiɗisiya. Na may Samuel tuɗ ha ka Gilgalɗi. Suuna hin noy Sol ka ki njay kosiya.

⁹ Sol di ana, «Ҥangi ɓivun ma ŋgalam ki ŋgalina ay u ɓivun ma ɦal heɓpa.» Nam hin li ɓivun ma ŋgalam ki ŋgalina.

¹⁰ Ndak hu li ma kom a daɓ ɓivun ma ŋgalam ki ŋgalina kira may ni Samuel mba ni na gaw. Sol kal ay ki ŋgafam, gam deɓpa.

¹¹ Samuel di ana, «Aŋ li ni mege?» Sol di ana, «Hu li ma an wi ana suuna noyon ki, njay ki ni njayana, ko aŋ lay ka mbay u vi vun ma ay vammaɗi ni, asi suu Filistinna tok tasi ki hu Mikmas may ni,

¹² An ɓak tan ana, cecem wanda suu Filistinna li na, sel ay fan hu Gilgalla, bay an heɓ hu Yawe. Na ɗaŋŋi an tli dla ndaɗta kanu. An li ɓivun ma ŋgalam ki ŋgalina.»

¹³ Samuel di Sol ana, «Aŋ li dla ndaɗta ni ko sa ki puluɗina na. Aŋ vi ka u gaɗta vi Yawe Looŋŋa ta nam haɗaŋgaraɗi. Cecem wanda gasi daŋ may, Yawe li ka ɦaŋ mulla kay suu Israelna ni a fafaɗta.

¹⁴ Na may cecem wanda mul maŋga hin ka li oloɗi. Yawe hal sana u min mamba. Yawe hin kakam mulna kay suu mamsina wa, kay ana aŋ li ka u gaɗta Yawe haɗaŋgaraɗi.»

¹⁵ Samuel gi tam hu voɗta, tuɗ Gilgal hu Gibea ta vi Benjaminda. Sol tok suu u namma egemu. Asi halaŋŋi kis kis karkiya.

¹⁶ Sol, goromma Jonatan u suu usina kak hu Gibea ta vi Benjaminda hu li ma suu Filistinna ka laki hu Mikmas mayna.

¹⁷ Suu a li dla corana sel ay ki hu kaŋŋa duk suu Filistinna, irisi ɓorowi duk hindi. Suu jewna tin irisi kay Ofra hu mbassa Sualla.

¹⁸ Suu a mbarana tuɗ hu Bet-Horon, suu a hindirana tin irisi hu ii hakara hu li ma goonira hu cocona ki hu fulla.

¹⁹ Sa ka fi sa dli caffa hu mbassa Israella oloɗi kay suu Filistinna di ana, «Ka a suu Hebrena dli ŋgewegina u saɓɓiina kosi oloɗi.»

²⁰ Suu Israelna halaŋ tuɗ vi suu Filistinna ɗaŋŋi a guu sii njagi masisina, sii kawi mamba, sii njet mamma u ŋgew mamma.

²¹ Gegelay guurusi siisira ti ni sikle iriɗ ki ɓorowi duk hindi kay kawira lay, njetna lay, va ma paɗam ay ki hu ndena lelew ma ɦaŋŋa ay koŋŋa.

²² Na ɗaŋŋi hu buu ma duuna suu vi Solna u suu vi Jonatanna gol tasi wanni ŋgew ka kosiɗi lay, saɓ kaɗi lay. Na lay asi hin fi ko Sol u goromma Jonatan.

²³ Suu duu suu Filistinna sel ay ki a tli li ma Mikmasna.