1 SAMUEL 12 - Boy Lonana

Boy ma Samuel dam maŋ suunana

¹ Samuel di suu Israelna halaŋ ana, «Gola an humugi delegi halaŋ hu dlara agi dandara halaŋ. An tinigi mulna kagiya.

² Cecem wanda ni, gola ni mul ma hin tuɗ fokogina. An tanda ki mbuɗi maari ki loɓiya, goryon hin dukugi wan na. Anni sa tuɗ ay dukugi u goo tan day ta ta karami.

³ An wanni tokogi ɓak magi ma egenna fok Yawe, fok sa Lona fuurumma. Sa an vam mbutl mammana ni gege? Sa an vam korro mambana ni gege? Sa an lam irim u bege mambana ni gege? Sa an doorom ki kay tlegyenmma ni gege? Sa an tlam gursura kom balna ta ni hin duk irin ki kamma ni gege? An hin hoŋogira kiyo.»

⁴ Asi di ana, «Aŋ lami irimi ka kay vaamiɗi. Aŋ lasami kaɗi. Aŋ tli bal gursu ka ko saɗi lay.»

⁵ Nam dasi ana, «Yawe ni sa hin kaagi ɓakŋa kagi kanna, saam ma ni sa hin diki kan ana hu buu namma ni agi fan va ka konɗi.» Asi hoŋ dira ana, «Nammi sa hin dikina.»

⁶ Samuel di suuna ana, «Yawe ma li ay ugi Moiz u Aaron ma sel somoyogi ay ki hu mbassa Egiptera na.»

⁷ «Cecem wanda ni agi lakagi tani na ca fok Yawe. An hin ndum dlara Yawe kaɓakŋa kagi u ndaɗta ki lay, kay somoyogira lay.

⁸ Hu li ma Yakob tew ki hu Egipte may ni somoyogi yi Yawe kolo u delesi eŋga. Nam Yawe hin sun gi Moiz u Aaron suu selegi somoyogi ay ki hu Egipte hin lakasi ki hu li namma.

⁹ Na lay ni asi hin maa Yawe Loosina kiyo. Nam may ni hin gususi ha ki maŋ Sisera, ŋgol asgaa ma vi Hasorna, maŋ suu Filistinna, maŋ mul ma Moabma, suu li duuna u asina.

¹⁰ Na ɗaŋŋi asi yi Yawe kolo u delesi eŋga ana, ami li suluku, kay ana ami noy Yawe kiyo. Ami hin sunni Baal u Astart. Cecem wanda ni aŋ ɓaɗami ay ki ko suu babali mamisina ami hin sunuŋu.

¹¹ Nam Yawe hin sun Gedeon, Bedan, Jefta u Samuel aya. Nam hin ɓaɗagi ay ki ko suu babali magisina suu ŋguy kagina. Agi hin kak hu mbassa ni u heɓpa.

¹² Na may ni hu li ma agi wi ana Nahas ma mulna vi goryoŋ Amonna mbay duurugiya, agi dan ana, ɦawaa ni mul ma hin kak kagina. Doli ɗini Yawe Loogina ni mul magina.

¹³ Cecem wanda ɗaŋŋi mul ma agi ŋgaɓamma wanni, ni ma agi joɓomma, gola Yawe ɦagi mulna wa may.

¹⁴ Lini agi li ndaa Yawe, lini agi sunumu, lini agi humum vunumu ka lagi yara kay gaɗta vi Yaweraɗi ni, agi tagira lay, mul ma hin kak kagina lay hin kakagi jiviya, tuɗugi u Yawe jivi lay.

¹⁵ Na may lini agi humugi vun Yawe kaɗi, lini agi li yara u gaɗta vi Yawera ni ko Yawe hin vagi lay, vi somoyogi lay.

¹⁶ «Cecem wanda olo, cologi tani gologi dlara ŋgolla Yawe hin laɗ irigira.

¹⁷ Cecem wanda ni ka li ma feɗ wa blenaɗi su? An hin yi Yawe nam hin baya, si mbona ŋgolla ɦay may. Humugi ki jiviya, gologi ŋgol dla cora agi laɗ ii Yawe u joɓpa agi joɓ mulna ki kay tagira.»

¹⁸ Samuel cen Yawe. Yawe baya, si mbona ŋgol ɦay may hu buu namma. Suuna halaŋ li ndaa Yawe u Samuel.

¹⁹ Suuna halaŋ di Samuel ana, «Cen Yawe kay suu maŋ suu sunda ka ami miɗ kiɗi, kay suluk ma ami lamma halaŋ ami cuk dla cora kayam u joɓpa ami joɓ mulna ki kamira.»

²⁰ Samuel di suuna ana, «Lagi ndaaɗi. Agi ni suu li dla co ndaɗtana daŋ may. Na may ni ɦuɗugi tagi ki day eg Yaweɗi, may sunugi Yawe u hurugi halaŋ.

²¹ Ҥuɗugi tagi kiɗi, ni agi hin tuɗ ki ni u tlesuu bay usina. Suu sunusi kaɗina lay. Suu ka buɗ sa kiɗi lay kay ana asi ni dlara ɦawara.

²² Na daŋ may Yawe ka hin suu mamsina kiɗi kay sem ma ŋgolna. Yawe may ni min a mbuɗugi ki suu mamsina.

²³ Kan an may ni li sulukŋa eg Yawe, ni dla cora ŋgolla kay hinda an hin ka a cen kagiɗira. An hin takagi voɗta jivira u voɗta ɗegeera.

²⁴ Va ŋgolna ni lagi ndaa Yawe na ɗow, sunum u gasira, hurugi ma dewna. Gologi gasi daŋ may nam tak ŋgol mamba ki egegiya.

²⁵ Na may lini agi li dla cora ni agi hin bulum kiyo. Agi lay, mul magina lay.»