1 SAMUEL 11 - Boy Lonana

Sol ti kay suu Amonna

¹ Nahas sa ma Amonna col duuna u Yabes ma Galaadna, hin ŋgufum yam kiyo. Suu Yabesna halaŋ di Nahas ana, «Vi galamba u amiya, ami hin laŋ sunda.»

² Nahas ma Amonna dasi ana, «Gola an hin vi galamba u agi ni ko wanda na, an hin coogi irigira njuffa kiyo. An hin tin dlara zolo ndaɗta kay suu Israelna halaŋ.»

³ Suu basi suu vi Yabesna dam ana, «Hinimi buuna kiɗisiya. Ami hin sun vun sunda ki kay mbassa Israella halaŋ lini sa mbay ka a suɗumi kiɗi ni, ami hin hom ha kaŋ tuwa.»

⁴ Suu vun sunda tew ki hu Gibea ta vi Solla. Asi hin njaɗ boy namma hum suuna. Suuna tum tiina.

⁵ Hu li namma na gaw ni, Sol ay bagi hu senena hoŋ ay voo u mbutli mamsina. Sol di ana, «Suuna fi ni dla me tiige?» Asi hin njaɗam dlara suu Yabesna daɗ kara.

⁶ Musuk Lonara mbay kay Sol hu li ma nam hum boy nammana, nam mbuɗ ki yara cocoo.

⁷ Nam yow mbutlina mba', zasi bakasi kiyo, powosi ki may ni, yow tliwna sunum ki kay mbassa Israella dew dew ko suu vun sunda dira na, nam di ana, «Sa ma tuɗ ka duuna u Solɗi may u Samuelɗi may na, gola ni dlara hin laɗ eg mbutli mamsinara.» Yawe mbuɗ suuna ki ndaana, asi tuɗ ni ko ndal sa dewna na.

⁸ Sol tokosi eg tasi hu Bezek, goryoŋ Israelna halaŋŋi 300,000, suu Yudana halaŋŋi buɓ buɓpa dok-hindi.

⁹ Asi di suu vun sun suu mbayna ana, «Agi hin ɓak suu hu Yabes ta Galaadta ana, vin hu li ma faɗta ndi ki kaŋga coco wani agi hin fi koɗ tara.» Suu vun sunda hin mbay di suu Yabesna. Asi furi cocoo.

¹⁰ Suu Yabesna di ana, «Ami hin busuk ha ki kagiya, agi hin li dlara hurugi miniɗta u amiya.»

¹¹ Vin maɗii ɗaŋŋi Sol ɓorow ii suuna ki duk hindi. Asi sel hu kaŋŋa siwi maɗiiya, asi ci suu Amonna ta ta faɗta ɗegee duku. Suu hin iirina njay kiyo, suu hin ka ko tasi na mbaɗi lay.

¹² Suuna di Samuel ana, «Suu may suu di ana Sol hin ti mulla kami suna ni suurage? Ҥami suu asina ay ami casi kiyo.»

¹³ Sol di ana, «Sa dew lay ni hin ka cam ki hu buu nammaɗi, kay ana karam wanni Yawe ti kay suuna u suu Israelna.»

¹⁴ Samuel di suuna ana, «Mbaagi aya, ɓaygi hu Gilgal. Aygi hin hoŋoygi mul maygira balamaɗu.»

¹⁵ Suuna halaŋ halaŋ tuɗ hu Gilgal. Hu li namma asi tin Sol ki a mulna fok Yawe hu Gilgal. Asi li ɓivun ma hal heɓpa fok Yawe, Sol lay, suu Israelna halaŋ lay li furira ŋgolla.