1 SAMUEL 10 - Boy Lonana

¹ Samuel tli guura mbulna, voom kay yam Sol hin vam kolo hurumu. Nam di ana, «Yawe fuuruŋ ka ki a mulna kay joomma ni nambi su?

² Karam hu li ma aŋ hinin wa ni aŋ hin ŋgaf suuna mba' eg us Rakel na tok ay hu ii hakara vi Benjaminda hu Selesa. Asi hin daŋ ana, korra aŋ tuɗ ay halaɗta asi faɗ wa. Cecem wanda buŋ maa dla korra ki wa, saa ŋgolla ni kagiya. Nam joɓ tam ana, An hin li ni me kay goronna ge?

³ Col ay tani day, tuɗ ha ki duk day ni aŋ hin tew ha ki ni duk ɦoyra Taborra. Suuna u tasi hindi hin faŋ huwa, tuɗ a ŋgaf Lona hu Betel, maa dew gor ɦugunina kom hindi, ma mbana mappana kom hindi, ma hindina u mbumbu mbulna kam may.

⁴ Asi hin gaŋ deɓpa, hin ɦaŋ mappana mba', aŋ hin vam kosiya.

⁵ Aŋ hin mba hu Gibea ta vi Lonara, olo hu li ma suu ŋgolo suu Filistinna ka huna. Hu li namma lini aŋ kal ki hu hoŋzina wa ni aŋ hin ndi kay suu jok vun Lona bolow cocoo. Suu col ay kolo kay li ma mbuyna, suu bu diŋŋa u suu bu darina u suu bu tokolomma may tuɗ fokosiya. Asi tasira hin mbuɗ ki a va komba vi suu jok vun Lonana.

⁶ Na ɗaŋŋi Musuk Yawera hin mba kaŋu. Aŋ Musuk Lonara hin caŋu ko asi na lay. Aŋ hin mbuɗ ki sa daŋŋa lay.

⁷ Hu li ma aŋ hin wi tle asina li wa ni, aŋ li dlara aŋ ndak a laɗta halaŋ, kay ana Lona ka u aŋu.

⁸ Aŋ hin tuɗ ha ki fokon jew hu Gilgal. An may ni hin tuɗ faŋ ha hu a li ɓivun ma ŋgalam ki ŋgalina u ɓivun ma hal heɓpa. Aŋ hin juɓun ha hu buuna kiɗisiya ta ta an tuɗ faŋ ha tuwa. Na ɗaŋŋi an hin takaŋ tlesuu aŋ hin lasina.»

⁹ Hu li ma Sol hoŋ ki dagan hin Samuelna ni, Lona mbuɗum hurum ki zeɗ. Dlara zeɗ zeɗta hin tak taɗ ki irim hu buu namma halaŋ halaŋ.

¹⁰ Asi tew ki hu Gibea may ni suu jok vun Lona u tasi bolowra ŋgafasiya. Na ɗaŋŋi Musuk Lonara mba kamu, Musuk Lonara cam ki ko asi na lay.

¹¹ Suu li wam ay jewna wamu, nam li dlara ko tam u suu jok vun Lona. Suuna joɓ duk tasi ana, «Va li eg goŋ Kisna ni mege? Sol ka duk suu jok vun Lona lay su?»

¹² Sa hu li nammana hin di ana, «Sa a busina ni ge ɗowge?» Gola ni kay ndaɗta dlara nam daɗta mbuɗ ki a boy ŋgolna ni na, «Sol ki ni duk suu jok vun Lona lay su?»

¹³ Hu li ma Sol tam heɓem heɓma ni nam kal ay ki kolo kay li ma mbuyna.

¹⁴ Bum mbana dam nam lay di saam ma li sunda lay ana, «Agi tuɗ ay ni arage?» Nam hoŋ dira ana, «Ami ay hal ni korra. Na may ami waɗ ay kaɗi lay, ami hin tuɗ ay ni vi Samuel.»

¹⁵ Sol bum mbana di ana, «Aŋ njaɗan dlara Samuel dagira ayra ay u huruŋu.»

¹⁶ Sol di bum mbana ana, «Nam ɓakami ay ki jivira ana fi korra wa.» Na may kay boy mulla ni nam ɓakam dlara Samuel daɗta kaɗi.

Sol tinim a mulna ni u paɗ dewna

¹⁷ Samuel tok suuna eg Yawe hu Mispa.

¹⁸ Nam di goryoŋ Israelna ana, «Na ɗaŋŋi Bu Suuna, Lona vi suu Israelna ɓak anaba, Anni sa kal Israel ay ki hu Egiptena, ɓaɗagi ay ki ko Egipte lay ko muli suu lasagina lay halaŋ halaŋ.

¹⁹ Agi tagira karam may ni noyogi Loogina kiyo. Nam sa buɗugi ki ko dla cora fagira, hu hahaw magira halaŋŋa, agi hin dam ana, aŋ hin ɦami mulna. Cecem wanda ɗaŋŋi tuɗugi fok Yawe u deeregi lay, u njafagi lay.»

²⁰ Samuel ɦuɗ njaf suu Israelna aya. Asi hin ŋgaɓmi deera vi Benjaminda.

²¹ Nam ɦuɗ deera vi Benjaminda ay u njafasiya, njaf ma vi Matrina asi hin ŋgaɓamu. Sol ma goŋ Kisna olo, asi hin ŋgaɓamu. Asi halamu hin fam kaɗi.

²² Asi hin joɓ Yawe olo ana, «Sa daŋ mbay tani su?» Yawe di ana, «Nam wanna, ki ŋgayra eg tlegena wanni.»

²³ Asi liŋ kam halam ay nam mba tak tam ki duk suuna. Fiyekem su ki kay suuna col ay kay yam day tew kay pel bikimu.

²⁴ Samuel di suuna halaŋ ana, «Agi wi sa Yawe manamma ɗaŋ su? Sa ko nam na ka duk suunaɗi.» Suuna halaŋ li furira, yi kolo u delesi eŋga ana, «Kak a fafaɗta mulna.»

²⁵ Samuel ɓak dlara mulna hin laɗta ki maŋ suuna. Nam hin ɓii dla ndaɗta ki hu magaara gaɗ fok Yawe. Samuel hin dik suuna gegelay ki vo varam ɗaŋ.

²⁶ Sol may ni hin tuɗ ki vo varam hu Gibea. Suu saɓak suu Lona mbuɗusi hurusi kina tuɗ u nam may.

²⁷ Na may suu sunusi kaɗina di ana, «Sa namma hin suɗuygi ki ni nanage?» Asi ka minim dlaambaɗi lay, ka ɦam tlena ay ɦawaɗi lay. Na may ka min a taɓ tasi u nambi. Sol di va kaɗi.