1 SAMUEL 1 - Boy Lonana

SAMUEL, ZANDUKŊA U SUU FILISTINNA Ane hu Ziŋ Lonara ta hu Silora

¹ Sa ma Ramana dew ay kolo kay ɦinira Efrayimba. Sem ana Elkana. Nammi goŋ Yerohamma, goŋ Elihuna, goŋ Tohuna, goŋ Sufna, sa Efratana.

² Boyogina um mba. Taa dew seɗ ana Ane, ta mbara seɗ ana Peninna. Peninna vuɗ gorra, Ane vuɗ goo kaɗi.

³ Basara tew tew ni sa namma tuɗ hu ɦoŋziimma a goɓ kaŋga fok Yawe ma Saɓakŋa Kom Belna a lam ɓivunna hu Silora. Hu li namma suu a li ɓivunna maŋ Yawena ni goryoŋ Heli suu mbana, Hofni u Pinhas.

⁴ Buu ma Elkana a li ɓivunnana ndakka. Ko tew tew nam lira na, nam ɦal tlena maŋ caamba Peninna, maŋ goryoŋ Peninna suu gorɓiina u suu njufiina.

⁵ Nam ɦal maŋ Ane ni tlesuu jivi cocona, kay ana Ane ni caamba nam miniɗ ɦayra, na may Yawe mbuɗuɗ ki gendergera lay.

⁶ Olo, heneɗta halaɗ a vunna tew tew kay ana Yawe mbuɗuɗ ki gendergera.

⁷ Na ɗaŋŋi Elkana li ko ndaɗta na hu basara tew tew. Hu li ma ndaɗ tuɗ hu Ziŋ Yawera ko tasi u Peninna ni ndaɗ laɗ yara. Ane gijaŋ tiina, noy tlesuu tira lay.

⁸ Njufuɗ Elkana daɗ ana, «Ndak, Ane, tii ni kay mege? Ndak mbuɗ ki hahawra ni kay mege? Na ni an ka jivi irik su gorra doogora ɗi su?»

⁹ Ane col ki kolo hu li ma asi ti funa may, ci yona may, ay hu Silona. Mul ma li ɓivunna, Heli, ki kakira fun Ziŋ Yawera kay dlam mamba.

¹⁰ Huruɗ haɗ huruɗ cocoo. Ndaɗ cen Yawe u simina iriɗu.

¹¹ Ndaɗ suu taɗ fok Yawe ni ko wanda na, «Yawe ma Saɓakŋa Kom Belna, lini aŋ gol hahawra vi goroŋga sunda, humuŋ gaŋ ay kanu ni, humuŋ maa ki kay goroŋga sundaɗi, a ɦaɗ go njufu. An hin hinim ki maŋ Yawe ta ta bu mamma nam kak iirina. Sin vella hin ka tin kay yambi.»

¹² Hu li ma ndaɗ tuɗ fok u cenda cen Yawera fiyekka ni Heli goloɗ vunuɗu.

¹³ Ane ɓak huruɗ kurufu may vunuɗ mbusukŋi nam ɦawaa. Sa ka humuɗ deleɗɗi. Heli goloɗ ni ko cara ki guruɗi u summara na.

¹⁴ Heli daɗ ana, «Ndak hin kak u guruɗta na gak gak su? Tuɗ ɗil irik ha ki hu li ma daŋŋa.»

¹⁵ Ane hoŋom dira ana, «Malanna an ka ni cara yaɗ jak kiraɗi, an ci va kaɗi. Sum veŋ ma guruɗ sa kaɗi. An tii tan fok Yawe ni tiiriya.

¹⁶ Aŋ gol goroŋga sunda ki ko goora ɦawara naɗi, kay ni saara su ki kanda u hahawra mbuɗun a an ɓak ta ta karammi asiya.»

¹⁷ Heli hoŋoɗ dira ana, «Tuɗ u heɓpa, ko Lona vi suu Israelna ɦak va ma ndak joɓom kamma.»

¹⁸ Ndaɗ di ana, «Ko goroŋga sunda fi jivira fokoŋu.» Cara gi taɗu, ndaɗ ti funa, iriɗ ka gol ko jewra na oloɗi.

¹⁹ Asi col kolo maɗii na feɗet goɓ kaŋga fok Yawe. Na ɗaŋŋi asi hin tuɗ vo varasi Rama. Elkana buu u caamba Ane. Yawe humum hin gam ay kaɗu.

Vuɗta u wul ma Samuel wulna

²⁰ Doli ɗini hu buu ma jakina Ane ay ni u wiina. Ndaɗ vuɗ go njufna. Ndaɗ tinim sem ana Samuel kay ndaɗ di ana, «An joɓom ay ni ko Yawe.»

²¹ Njufusi Elkana yow u suu mamsina halaŋ a li ɓivunna maŋ Yawe ma vun basara a buɗ tam ki ko vi vun mammara.

²² Na may Ane tuɗ kaɗi kay ndaɗ di njufuɗ ana, «Juɓuya an noy pona ki fun goona tuwa. Na ɗaŋŋi an hin tlam tuɗum ha tuwa. Nam hin tak tam ki fok Yawe. Nam hin kak ha tana a fafaɗta.»

²³ Njufuɗ Elkana daɗ ana, «Li dlara irik jivira. Kak tani ta ta hu buu ma ndak noyom pona kina. Ko Yawe faɗak vun dlaakka kiyo.» Cara hin kak ko ndaɗta na, ɦal pona maŋ goroɗna ta ta hu buu ma ndaɗ noyom pona kina.

²⁴ Hu li ma ndaɗ noyom pona kina, ndaɗ tuɗ u nam u bolo mbutlina hindi. Luɗ fuɗta kaɗ may, tli mbumbu sum veŋŋa kaɗ may. Ndaɗ kalam hu Ziŋ Yawera hu Silo. Goona a mbuɗ ki sa sunda hu zira.

²⁵ Asi ŋgaɗ bolo mbutlna hin tuɗ goona ha maŋ Heli.

²⁶ Ndaɗ di ana, «Heɓ huruŋ kanu, malanna. Aŋ ka iiri a fafaɗta, malanna. Anni cara ka kaki egeŋ tok tani cen Yawe wanda.

²⁷ An cenemmi kay goo namma. Yawe hin ɦan va an cenem kamma.

²⁸ An hoŋ ay wanni hinimmi maŋ Yawe. Hu kak mamba iirira halaŋŋi nam ki ni maŋ Yawe.» Nam goɓ kaŋga hu li namma fok Yawe.