1 PIYER 5 - Boy Lonana

Gol timigii suu vi Lonna jiviya

¹ An di cecemi maŋ suu ŋgolo suu gol suu vina, an lay ni sa ma gol suu vina, sa ma diki kay wihawra vi Kristuna, an ka u bibiŋilla vi Lonara hin a tak kira. Gola ni va ma an a joɓosi kamma.

² Gologi jiviya, ko agi suu gol yoori suu Lona ɦagisinana na. Golosi u huu ma jivina ko Lona minda na. Ka ko ɦeɓegi ni ɦeɓi naɗi ni kay a faɗ kini vun sun magira, ka kay warakŋa vi gursuraɗi, ni kay minda vi huuna.

³ Ni ka ana kak ŋgolla kay suu Lona ɦagisina a agi golosina naɗi, lagi jiviya a asi tli ugi na may.

⁴ Falira sa ŋgolna vi suu taa yoorina mba wa ni, agi hin fi jumba mulla dlaɗ ŋgolla ka ɓeŋ kiɗira.

⁵ Na may agi gorzoŋina humugi u suu ŋgolona, agi halaŋ cukugi lalamba kagiya kay a njun u tagiya tagiya. Kay ɓiira di ana, «Lona hurum ɓeŋ eg suu ŋga tasina, nam ɦal oo mamba maŋ suu hoŋ yasi gaana.»

⁶ Hoŋogi yagi kaŋga fok Lona ma saɓakŋa, nam hin mba tlagi yagi kolo hu buu ma nam ŋgaamma.

⁷ Tokogi yoo magira halaŋ kay Lona kay ndaɗta nam hin gologiya.

⁸ Gologi jiviya kakagi jek jekee, kay Satanna kuɗuk ko dlona gi ŋgoɓpa na hal gegelay kay a komomu.

⁹ Kakagi en u vira hurugiya, duurugi u namu kay agi wi ana gorsegina hu duliyara halaŋ wihawra ko agi na may.

¹⁰ Ŋgoo dagan wihawra ew ndaɗta Lona ma oora yagi kay bibiŋil mamba ka daɓ kiɗira kay taɓagi u Kristu nam mbuɗugi pasiyak, soogi hurugiya ɦagi saɓakŋa ɓalagi ugi eŋe.

¹¹ Saɓakŋa ni mamma lay gak gak. Amin.

Gi deɓpa daɓ daganda

¹² An ɓiirigi goo magaara ha ew ha ko wayaygina Silas ma ɗegeena. An min ɦagi saɓakŋa kay oora vi Lona ta gasira lakagi en u oo ndaɗta.

¹³ Suu vina hu Babilon, suu Lona manasi ko agi na mayna, ka gagi deɓpa u goronna Mark lay.

¹⁴ Gagi deɓpa duk tagiya tagiya u della jivira. Ko heɓpa kak u agi halaŋ agi suu vi Kristuna.