1 PIYER 4 - Boy Lonana

Iirira ki joki zeɗta

¹ Ko Kristu fi lassa hu mbalatamba na, soogi tagi a lagi hu saa magira na may, kay sa ma siɓ lassa hu tliwimma, daɓ ki wa u cora.

² Agi may ni daɓagi iiri magira kay ndaŋgara cecemira a li u minda vi Lona, ka u minda vi mbalataraɗi.

³ Agi ay jew basara ŋgolo lagini ko suu bay vina lira na, lagi dla cora, ŋgiziɗ tlena vi suuna, guruɗ u summa, luu dam dam, luu ma ci summa, li ɓivun ma njenjena maŋ fulina.

⁴ Cecemi suu bay goɓ Lona saa kagi cora kay mayra agi ka taɓ u asi hu tiisi ma cona u poy masira coraɗi layra, asi mbuɗ ŋgulugiya.

⁵ Asi hin di ki kay dlaasira fok Lona ma tok a kaɓakŋa kay suu iirina u suu miɗina layna.

⁶ Ni kay ndaɗta Boy ma Ayra di aygi maŋ suu miɗina. Asi suu ɓakŋa kaay kasi hu iiri masira ko suuna na may. Boy namma dasina ay ki ni u Musukka, kay asi kak iiri ko Lona na may.

Suu ndak a li sunda jivira u ɦala vi Lonara

⁷ Daɓpa vi tlena hin tok, gologi tagi jiviya kakagi jek jekee, cenegiya.

⁸ Su belni minigi tagiya tagiya kay minda bulum cora ŋgolo.

⁹ Vagi suuna varagiya u huu ma jivina.

¹⁰ Gegelay li ko ɦala vi Lonara zeɗ zeɗta egemba na, njun u suu hiŋŋa u ɦala nam faɗ ko Lonara.

¹¹ Sa ma di boyna kina jok ha ki ni Boy Lonana, sa ma sunda li u saɓak ma Lona ɦammana kay a tlena halaŋ ɦal ŋgara ni maŋ Lona, kay Yesu Kristu ŋgolla ni mamba, saɓakŋa ni mamma gak gak. Amin.

Wihawra ko sa vina na

¹² Banayan suu an minigina, lakagi jim kay lassa lagira ana mba kagi na ni dlara ka u voɗoɗɗira naɗi.

¹³ Furiyugiya ni ko agi dlaɓ u wihawra vi Kristu na kay a agi mba li u ayra coco hu li ma ŋgol mamba hin mba tak taɗ kina.

¹⁴ Lini asi ŋgulugi lay furiyugiya agi ni suu haɗina vi Kristu kay Musukka Bibiŋilla, Musuk Lonara mba kak kagiya.

¹⁵ Hin sa maa dukugi wihawra ko sa ma ci maɗna, sa ma kulna, sa ma li dla cora ko sa ma mbuɗ duk u dlara kala kalana naɗi.

¹⁶ Lini sana wihawra kay nam sa ma vinara ni li zoloɗi, gi deɓ maŋ Lona kay nam ndak a di ki kay sem Kristu.

¹⁷ Lina ndak wa a ɓak ma vi Lonna gijaŋŋa, nam gijaŋŋa jewni u suu vi Lonna, lini nam gijaŋŋa jew ni u aygiya hin daɓ ha ki u suu bay vi u Boy ma Ayra vi Lona ni ɓak masina hin lini ko menage?

¹⁸ Ko ɓiira hu magaara dira na, «Lini suu jivina fi suɗta loɓ ŋgolo ni suu li dla cora u hurusi cona hin lini nana mayge?»

¹⁹ Ko ndaɗta na suu wihawra u minda vi Lona tuɗ fok a li jivira u hurusi halaŋ maŋ Lona ma li tlena halaŋŋa, ma li u vi vun mammana.