1 PIYER 3 - Boy Lonana

Boyogina u njufuyusiya

¹ Agi boyogina may ni humugi u njufuyugiya, kay ana suu dukusi ɦiw li ka vi u Boy Lonanaɗi lay ni asi hin mbuɗ a vi u Boy Lonana u poy magira jivira bay agi dasi boy lay.

² Asi wagi poy magira jivira u lira agi lasi zoloosira.

³ Halagi a jiv tagi irisi u tlesuu agi cukusi taginaɗi, ko giyamba, ugi walak lorra humba, u baraw ma agi cukum egeginaɗi.

⁴ Jivi magira li ay ni hurugi kurufu na ɗow, jivi ndaɗta lini ta bay panda, u lalamba, ndaɗta ni ta ii Lona jivi cocora.

⁵ Boyogi suu ay jew ɗegeena hum ay u Lona ni na. Asi mbuɗ jivira a hum u njufuyusiya.

⁶ Ko ndal Sara na ndaɗ hum u Abraham yam ana bu ziinna, lini agi li jiviya ka lagi ndaaɗi ni agi mbuɗ cecemi ni goryoɗu.

⁷ Agi njufina may ni lakagi jivi u boyogogiya, saa kay maŋi masira, lasi usiya agi hin taɓagi ni ko tagi dew a fagi iirira ko Lona. Lagi na a va ma co kal dukugi a doorogi cen magiraɗi.

Ŋgaf wihawra kay li ɗegeera

⁸ Na may agi halaŋŋi saa magira u min magira li fun taɗ dew, minigi tagi ko gorse tagi na, njunugi u tagiya gege lay hoŋ yam kaŋga u ndaramma.

⁹ Hoŋogi cora u ndaraɗ coraɗi, ŋgulla u ndaraɗ ŋgullaɗi lay. Paɗagi vunugi ki kay tagi ni paɗi na ɗow. Hu li ma Lona yagina ni vi vunum ana nam hin paɗ vunum ki kagiya.

¹⁰ Ko magaara di ana, «Sa ma min a kak jivina hin tew hu buu ma furira ni nam gol sinim jiviya, hin kaboyna kiyo.

¹¹ Nam mba ɦal ŋgorom maŋ dla cora, mbuɗ irim eg dlara jivira, nam halni heɓpa tew tew.

¹² Ii Bu Suuna ka tini kay suu ɗegeena, humusi cen masira lay, nam ɦal ŋgorom maŋ suu li dla cora.»

¹³ Lini agi ka lagi dlara jivira ni sa ma hin lagi cora ni gege?

¹⁴ Lini agi ka las kay agi li ɗegeera ni furiyugiya, lagi ndaa ko suunaɗi hin vun dikigi ɓigigiɗi.

¹⁵ Ŋgaagi Kristu hurugi kurufuwa, nammi Bu Suuna magina, minigi tagi a vagi u dlara ki maŋ suu ka joɓogi kay va ma agi ka juɓumma.

¹⁶ Lagi na ni u lalamba, ŋgaagi suuna, lini asi kaagi boyna kagi lay ni lakagi u saara jivira, suu di boy ma cona kagi kay poy magira u Kristura hin mbuɗ zolona.

¹⁷ Lini u minda vi Lona mariyaɗ vi lassa kay dlara jivira sura las kay dla cora.

¹⁸ Ni kay ndaɗta Kristu miɗ sem dew kay cora vi suuna halaŋ, jivi ndaɗta ha ni na din din. Nam li co kaɗi miɗni kay suu cona kay a tuɗugi eg Lona, suuna cam ki ni tliwim ma sa warna, Musuk Lonara colom ay ki kolo iiri duk suu miɗina.

¹⁹ Musuk Lona ndaɗta tuɗum gak gak nam tuɗ di boyna maŋ ŋgus suu ha hu daŋgaynana.

²⁰ Ni maŋ ŋgus suu ay jew hum ka u Lonaɗina, hu li ma Lona ka juɓ u lalamba hu buu ma Nowa ka ceɗ lumba tuna. Suu cuk hu lumbana ka bolowɗi, ni kalavandi daŋ suɗ ki ko mbona ni asi gaw.

²¹ Mbo namma takŋi batem ma ka suɗugi cecemmi wanna, mbo namma ka mbus zozoɗta eg sanaraɗi, ni a joɓ Lona kay saara ɗegeera, batemma suɗugi ni u colla Yesu Kristu col ay ki kolo iiri duk suu miɗinara.

²² Nam i kolo kaki kay bik ko Lona ma njufna. Nam kak mulna kay suu sunda huulona u suu ŋgolona u suu saɓakŋa ha kolo huulona.