1 PIYER 1 - Boy Lonana

Gi deɓpa

¹ Ni an Piyer sa vovoɗta vi Yesu Kristu, ɓii maŋ suu ha ki njay ŋgayra hu mbassa daŋga, hu Pont, hu Galati, hu Kappados, hu Azi hu Bitini.

² Agi ni suu Lona Buna managi ay ki fok jew ana agi hin li a suu mamsinana, ni kay ndaɗta Musuk mamba ka njunugiya a hom u Yesu Kristu, mbuɗugi ki pasiyak u busu mamma. Ko oora u heɓpa kak u agi cocoo.

Maa ki kay juɓpa juɓ Yesuraɗi

³ Geleɗeygi Lona, Bu Bu Suuna Yesu Kristu kay jivi mamba ŋgolla nam ɦaygi iirira wilira hu li ma nam col Yesu Kristu ki kolo iiri duk suu miɗina. Ni kay ndaɗta ay ka maa kay juɓpa juɓumbaɗi.

⁴ Aygi ndak li furira kay tlesuu hu jona vi Lona nam hinisi maŋ suu mamsinana. Ni jo ma ka ɓeŋ kiɗina, ka mbuɗ zozoɗɗi, ka mbuɗ basiɗi lay, weleɗ na gak gak. Lona ɗokosi ha kolo ni magiya.

⁵ Ko saɓakŋa vi Lona gologi hu vira na gak gak a juɓ buu ma suɗta ma hin mbana, li namma hinni na tok ni buu ma daɓ daganna.

⁶ Lini lassa ka lagi hu buu ma ew wandaŋa lay ni agi furiyugiya,

⁷ las ndaɗta ni a tukugi saɓak viigira. Lorra ni vara daɓ kira asi ka yooroɗ u kura kay a mbuɗuɗ eŋe. Na may viigira ni su lorra, lassa lagira ni kay a tukugi ana ndaɗ coli eŋ su. Hu buu ma Yesu hin a mbana wanni hin geleɗegiya, ŋgaagiya, ɦagi ŋgolla.

⁸ Agi wam ka u irigi tuɗi lay ni agi minimu, agi bay wam u irigi tu lay ni agi tin hurugi kamu. Kay ndaɗta agi lagi furira ŋgolla, ta sa ndak ka a di boy namma u vunumbira.

⁹ Va ma agi fam kay tinda tin hurugi kamba ni suɗta suɗ iiri magira.

¹⁰ Kay boyna vi suɗta suu jok vun Lona hal u boy namma saa kamu, asi di ki jew kay oora Lona hin ɦagirara.

¹¹ Asi so tasi a wi buuna u cokira Musukka vi Kristu takasi ay ki ana nam hin fi lassa, ŋgoo lassa daŋŋi nam hin fi ŋgol mamba tuwara.

¹² Lona tak ki maŋ suu jokom vunumma ana boy ma asi damma ni ka masi kay tasiɗi, ni magi agiya. Boy namma agi humum ki cecemi namu. Suu di Boy ma Ayra dam ki u saɓak Musuk Lonara ta sunuɗ ay kolo huulona, asi dagina ni namu. Suu sunda huulona min a wi boy namma lay.

Gi humba kay poyra ɗegeera

¹³ Kay ndaɗta tinigi saa magira kay a li sunda, lakagi jek jekee, tinigi saa magira kay ɦala agi hin faɗ falira Yesu hin mba tak tam kira.

¹⁴ Humugi u Lona, lagi u min magira jewra agi ka wi vaɗiraɗi.

¹⁵ Lakagi teteɗ hu poy magira halaŋ, ko Lona ma yagina ka teteɗta na may.

¹⁶ Ko magaara di ana, «Lagi teteɗ ko an teteɗta na may.»

¹⁷ Hu cen magira agi yi Lona ana Bugiya ma kaɓakŋa kay suuna halaŋ fun tasi dewna, u va ma sana lamma, hu li ma agi ka hu ndaŋgara tuna ni agi lagi ndaana u Lona hu poy magira.

¹⁸ Agi wi ana nam warak kagi ni ka u tlesuu ba kina ko gursura u lorra naɗi, kay buɗugi ki hu dla cora somoyogi haɗagirara.

¹⁹ Nam buɗugi ay ki ni u ɓivun ma dlam ŋgolna vi Kristu, nam ay ni ko goo timii ma bay cora bay ŋgulla egemma na.

²⁰ Kristu Lona manam ay ki ni jew bay duliyara li tuwa, nam takam ki hu buu ma daganna ni kagiya.

²¹ Agi tinigi hurugi kay Lona ni umu, nam ma colom ay ki kolo iiri hu miɗna hin ɦam ŋgolla, viigira u juɓ magira halaŋ tok eg Lona.

²² Agi mbuɗugi ki pasiyakŋi kay agi hum u gasira, kay a minigi gorsegi suu vina, minigi tagiya tagiya u hurugi halaŋ u minda ka mbuɗɗira.

²³ Kay ndaɗta agi vuɗ ni wiliya, ni ka u njaf ma miɗ kinaɗi, na may ni u njaf ma ka miɗɗina u Boy Lonana ma ka iiri didinna.

²⁴ Ko magaara di ana, «Suuna halaŋ ni ko usuna na, ŋgol masira ni ko ɓo usuna na. Usuna so kiyo, ɓoom yak kiyo.

²⁵ Na may boyna vi Bu Suuna ka tew tew,» boy namma ni Boy ma Ayra ma agi humum wanna.