1 MULINA 9 - Boy Lonana

Bu Suuna tak tam ii Salomon a mbara olo

¹ Hu li ma Salomon daɓ sun Ziŋ Yawera ki may, daɓ sun Ziŋ Mulnara ki may, nam li tlesuu nam saa kasi a lasina ki halaŋ.

² Yawe hoŋ tak tam ki irim a yamba mbara, ko nam tak tam ay irim hu Gabaonda na olo.

³ Yawe hin dam ana, «An hum cenda u joɓpa aŋ joɓondawa. Zira aŋ miniɗ ndaɗta an mbuɗuɗ ki teteɗ wa, a sen hin yi ha huruɗ ni na gak gak. Irin u hurun halaŋ ka cuki kay Zi ndaɗta.

⁴ Aŋ may ni lini aŋ tuɗ u gaɗ manda ko ndal buŋ David lira na may ni, li huruŋ ki na ɗegee, li dlara halaŋ u voɗoɗu, li u dlara an daŋgara halaŋ, lini aŋ hum u gaɗ manda jiviya, li dlara an miniɗta may,

⁵ an hin hiniŋ a mulna kay suu Israelna ni na gak gak, ko ndal an di ay ki fok jew maŋ buŋ Davidta na may ana, Sa ma hin varak ka hu dlamba mulla fok suu Israelna ni sa ma kal ay ki hu njafaŋŋa.»

⁶ Na may lini agi u goryogi hinin boy manna kiyo, ɦal ŋgorogi manu, lini agi ka li u gaɗ manda an tinigira fokogi wandaɗi, lini agi sun loogi suu ɦawana goɓ kaŋga fokosiya,

⁷ ni an hin bulum suu Israelna ki kay yam ndaŋgara halaŋ, kay ndaŋgara an ɦasirara lay. Zira an mbuɗuɗ ki teteɗ a yan sen hura an hin hiniɗ ha ki egen na day. Suu Israelna hin mbuɗ ki ni a njunjunda vi suunara halaŋ.

⁸ Zira mini kolo day jivi coco ndaɗta gegelay hin jak egeɗ ni yoo tam cocoo, ko komu, joɓ tam ana Yawe a li dla ndaɗta eg mbas ndaɗta u Ziŋ Yawera na ni ana mege?

⁹ Asi hin hoŋ dira ni ana, «Ni kay ana asi noy Yawe Loosina kiyo, Lo ma buɗusi somoyosi ay ki hu mbassa Egiptera, asi ɦal tasi ki maŋ loogi suu daŋŋa, goɓ kaŋga fokosiya, sunusi lay. Ni kay ndaɗta Yawe mbaarasi dlara hahawra kasi ni na.»

Sunda daŋga Salomon laɗta

¹⁰ Hu basara dok-mba' ta Salomon min zigini suu mbana, Ziŋ Yawera u ziŋ mulnara.

¹¹ Hiram, mul ma Tirna, ma ɦal tlesuu min zina ay maŋ Salomonna, gu sedrena u lorra, mulna Salomon ɦam ɦoŋzi ŋgolona ma dok-mba' hu mbassa Galilera.

¹² Hiram col ay hu Tir mbay a gol ɦoŋzi namma ma Salomon ɦammana. May ɦoŋzi namma ka irim jiviɗi.

¹³ Nam di ana, «Wayanna, ɦoŋzi ma aŋ ɦanna namma ni ɦoŋzi mege?» Asi hin tin sem mbas ndaɗta ana, Mbassa Kabulla. Sem namma ka ni ta ta cemi.

¹⁴ Hiram sun lorra ay maŋ mulna ni kelewna buɓ buɓ hindi.

¹⁵ Mulna Salomon tin sunda nekka kay suuna a min Ziŋ Yawera u ziim ma buuna, nam hin mbu giriŋ ma daŋŋa yam ana Millo gulumun ma ŋguy kay Yerusalemma, Hasor, Megido u Gezer.

¹⁶ Faraw, mul ma Egiptena, tli zi namma kiyo, ci suu Kanaanna ki ci cini, hin ŋgal ɦoŋzina ki may. Ҥal zi namma ki maŋ goomba hu li ma asi ɗum tasi u Salomonna.

¹⁷ Kay ndaɗta Salomon hoŋ min ɦoŋzi ma Geserna ki ni na. Nam hin min ɦoŋzi ma Bet-Horon ta kaŋga ki may,

¹⁸ Baalat u Tamar hu li ma ŋgoo bagina hu mbas ndaɗta.

¹⁹ Ca ni ɦoŋzi ŋgolo ma nam minim kina ni mam bel bel, ɦoŋzi ŋgolo ma cuk ki pus pusna u ma buu suu jaŋ kulumina, Salomon min tlesuu nam min a lasina ki halaŋ halaŋ hu Yerusalem, hu Liban, hu mbassa nam ti mulla kaɗta bel bel.

²⁰ Njaf suu daŋŋa hin ka hu mbas ndaɗta tuwa. Suu Amorna, suu Hitna, suu Pirizna, suu Hivna u suu Jubusna. Ca ni suu may suu ka njaf suu Israelnaɗina.

²¹ Goryosi suu hin ka ŋgorosi dagan suu asi casi ka kiɗina, Salomon yowosi hu sunda halaŋ ta ta cemi.

²² May duk suu Israelna ni Salomon lasi ka mbaɓuɗi, nam tinisi ni a vokŋa fok suu sunda, fok suu duuna a asgaarina, kapiten, asidaŋ, suu jaŋ pus pusna u suu jaŋ kulumina.

²³ Gola ni ndum muli suu ka fok suuna a li sunda vi Salomon. Suu fok suu a gol sundana ni 550.

²⁴ Hu li ma goŋ Farawra jok ay ki hu Ҥoŋzi Davidna ni Salomon hoŋ min giriŋ ma nam mbuum yam ana Millona ki daŋgadla.

²⁵ Salomon li ɓivun ma ŋgalam ki ŋgalina hu basara dewra yammi hindi hindi u ɓivun ma mbaa heɓpa kay givin ma togolla maŋ Yawera. Nam ŋgal mbitla his jivira hu givin ma togolla fok Yawe. Nam ŋga Ziŋ Yawera cocoo.

²⁶ Mulna Salomon ceɗ lumba ŋgolla gaɗ hu lumma Eziyon-Geberna tok eg Elat fun voo ma hu mbo lum ŋgolnana, fun Lum ma Cerewna hu mbassa Edomba.

²⁷ Mulna Hiram sun suu mam suu Fenisi suu wi jaŋ lumba ay taɓ ko tasi u suu sunda vi Salomon a jaŋaɗta may.

²⁸ Asi tuɗ hu mbassa Ofira. Hu li namma asi hoŋ ay u lorra kasi ii kelewna na 14.000 maŋ mulna Salomon.