1 MULINA 8 - Boy Lonana

Zanduk ta Galamba jokoɗ ki hu Ziŋ Yawera

¹ Ŋgoo dagan mulna Salomon yi suu ŋgolona u suu maarina hu dee suu Israelna ay egem Yerusalem halaŋ u suu fok gorsesinana lay a mba tli Zanduk ta Galamba vi Yawera ay hu Ҥoŋzi Davidna ma yam ana Siyonna, jogoɗ ay ki hu Ziŋ Yawera, Yerusalemba.

² Njufii suu Israelna halaŋ tok ay eg mulna Salomonni hu til ma yam ana Etanimma, nammi til ma kiɗisiyana, ni til ma luuna.

³ Suu ŋgolo suu Israelna tuɗ ay kay cee muli suu li ɓivunna suu tli Zanduk ta Galamba vi Yawera ay kasina.

⁴ Muli suu li ɓivunna u dee suu vi Levina zii Zanduk Yawera ni asiya, yow gu mbutluɓ ma li tokka huna ni asi lay u tlesuu teteɗ suu ay huna yowosi ni asi lay.

⁵ Mulna Salomon u suu Israelna halaŋ tok tasi ay kay Zandukka Galamba vi Yawera, ŋgaɗ tlesuu ɓivunna bolow cocoo, timigiina u mbutlugina sa ka ndak a wasi ndumusiɗi.

⁶ Muli suu li ɓivunna tuɗ Zanduk ta Galamba vi Yawera ha hu liiɗ kalafi hu Li ma ki Saɓaki Teteɗna. Tiniɗ ga u garaŋ Serubimma.

⁷ Serubimma mbuɗ ay kay Zandukka kolo ni a va ma juɓuɗ uɗna u tlesuu ziiriɗna halaŋ.

⁸ Kay va ma ziiriɗna fiyek cocora ni aŋ wasi garaŋasi ha ki vunna hu Li ma Teteɗ ma ha fok jew Li ma ki Saɓaki Teteɗna. May sa ka wasi ki ii ŋgooɗi kama. Asi ka ni na gak gak ta ta cemi.

⁹ Va ka hu Zandukkaɗi. Hu ni ɦinira ceɗi mba' ta Moiz cukuɗ ka hu ay ii ɦinira Horebpa doy hol. Ni hu li ma Yawe vi galamba u suu Israelnana hu li ma asi cuk ay ki hu mbassa Egiptera.

¹⁰ Hu li ma muli suu li ɓivunna cuk ay ki bunsu may ni, ɗugulla oy ki hu Ziŋ Yawera na ndiŋ ndiŋ.

¹¹ Muli suu li ɓivunna ka ndak a hoŋ hu sun masira oloɗi, kay ana bibiŋil Yawera oy huu Ziŋ Yawera kiwa.

¹² Salomon oo um kolo di ana, «Bu Suuna min a kak duk ndufunda.

¹³ An may ni an miniŋŋi zira ŋgol cocora ni li ma aŋ hin li ha kaki a fafaɗtana.»

Di bolla kay a mal vun Ziŋ Yawera

¹⁴ Suu Israelna halaŋ tok aya coli kolo u sesiya. Salomon pereɗ irim ay egesi gasi deɓpa.

¹⁵ Nam hin di ana, «An gi deɓ maŋ Yawe, Lona vi suu Israelna, nam li dlara nam vi vunum u bun, David, kaɗta ki wa u tamba ko nam di ana,

¹⁶ Col ay hu li ma an cuk suu man suu Israelna ay ki hu mbassa Egiptera day, an man ɦoŋzi ma ŋgol ka ki a asi minin zina a an hin tak tan ki irisira tuɗi. May aŋ David an manaŋ ki ni a mul ma fok suu man suu Israelna.

¹⁷ Bun, David, ay u saara a min zira kay sem Yawe, Lo ma vi suu Israelnana, hurumu.

¹⁸ Yawe hin di bun, David, ana, Aŋ saa huruŋ a minin zira yan sen hura ni aŋ li ni jiviya.

¹⁹ Na may aŋ ka hin a min zi ndaɗta ni aŋgi. Hin min zi ndaɗta ka ni goroŋ ma kal ay ki huruŋŋa. Nam hin min zira yan sen hura ka ni namu.

²⁰ Yawe li dlara nam daɗta kiwa. Anni sa ma varak ka kay balam bun Davidna. An kak kay dlamba mulla vi suu Israelna ko ndal Yawe dira na. Cemi an min zira a yi sem Yawe Lona vi suu Israelna huwa.

²¹ An min lina ki hu zeɗ kay a tin Zandukka Galamba vi Yawera, ni galamba Yawe vaɗ ay u somoyoygi suu jewna dayra, hu li ma nam cukusi ay ki hu mbassa Egiptera.»

Cenda Salomon cen Lonara

²² Salomon col kolo fun givin ma togolla vi Yawe fok suu Israel suu ka tokina halaŋ. Nam yow kom kolo huulona a cenda,

²³ hin di ana, «Yawe Lona vi suu Israelna, lo ma ko ndal aŋ na kaɗi kolo huulona lay, kaŋga kay ndaŋgara lay a ŋgom galamba u jivira kay suu sun maŋsina suu tuɗ kay seŋ u hurusi halaŋŋa na ni kaɗi.

²⁴ Aŋ vi vunuŋ u saaŋ ma sunda, bun, David. Dlara aŋ daɗ ay ki u vunuŋga cemi ni li kiwa. Ii suuna halaŋ aŋ laɗ ki wa u bik koŋu.

²⁵ Cemi wanda Yawe Lona vi suu Israelna, li oora kay saaŋ ma sunda, bun, David, boy ma aŋ damma kana, ana sa maa hu njafaŋ dew hin kak ka hu dlamba mulla vi suu Israelna fokonu. May ni di goryoŋ asi poy jiviya, tuɗ fokon ɗegee, ko ndal aŋ poy ay fokonda na may.

²⁶ Cemi ni Lona vi suu Israelna, an ceneŋu, boy maŋ ma aŋ dam maŋ saaŋ ma sunda bun David namma lam ki ɗaŋ.

²⁷ Na ni gasi, Lona ndak a kak kay ndaŋgara tani su? Huulona tamba halaŋ ka ndak a kakaŋgi lay ni ko goo zira an miniɗ wanda su?

²⁸ Ҥii, Yawe, Loonna, tin humuŋ ha hum cenda u joɓpa vi saaŋ ma sunda haa. Hum tii ma saaŋ ma sunda tii ha karam fokoŋ wanna haa.

²⁹ Ko iriŋ li ki mali kay zi ndaɗta na mal, njeŋge lay, faali lay kay li ma aŋ ɓak kam ana, Wanni li ma sen hin yi hunana. Hum cenda saaŋ ma sunda ceneŋ hu li namma wanda haa.

³⁰ Hum cenda saaŋ ma sunda u suu maŋ suu Israelna ceneŋga haa. Aŋ hum ay ni hu li ma aŋ ka kaki huna, ay kolo huulona, huma, hep huruŋu.

³¹ «Hu li ma sa maa li suluk eg ndaramma wa, asi tinim dlara gi vun kam wa, nam mba di boy namma ki fok givin ma togolla maŋga hu zi ndaɗta wa ni,

³² aŋ ha kolo huulona day ni hum haa, gi ii dlara ay duk suu sun maŋsina. Sa ma dlara vamma coomba hin do ni kay duu duu yamu. Sa ma ɗegeena hin li ni u ɗegee mam ndaɗta may.

³³ «Hu li ma suu maŋ suu Israelna suu babali masisina su kasina ni kayra asi laŋ dla cora egeŋga, lini asi hoŋ ay egeŋu ŋgaaŋ seŋu, cena, joɓoŋ hu zi ndaɗta ni,

³⁴ Aŋ ha kolo huulona day ni huma. Bulum cora vi suu Israelna kiyo, hoŋosi ay hu mbassa aŋ ɦaɗ ka maŋ somoyosira.

³⁵ «Hu li ma huulona duk ki wa, yo lo ka si kay yam ndaŋgara oloɗi kay ana suuna laŋ dla cora egeŋu, lini asi cen hu li namma, geleɗeŋ seŋu, hom coosira ki may kay aŋ tinisi dlara hahawra kasira ni,

³⁶ aŋ ay kolo huulona day ni huma, bulum cora vi suu sun maŋsina u suu maŋ suu Israelna kiyo. Aŋ takasi voɗta jivi ta asi tlaɗta. Ҥal yooŋ ay kaŋga maŋ suu maŋsina kay mbassa aŋ ɦaɗ ki a jona maŋ suu maŋsinara.

³⁷ «Hu li ma may ŋgolla ndi hu mbassa wa, ɗowba himina ndi kay wana soom kiyo, ɗowba baa njeena ti wana kiyo, hu li ma suu gonokka ka las suu Israelna ta ta mba ndukusi hu ɦoŋziisi ma saɓakasi huna, hu li ma dla cora ndi kasira halaŋ ka lina, u gi tuguɗii mayra cora,

³⁸ Lini suu maŋ suu Israelna dlara ka lasiya asi li ka tii yaŋ ha kolo u cenda, lini asi mbuɗ irisi ay eg zi ndaɗta, yow kosi ha kolo a ceneŋga ni,

³⁹ aŋ may ni humusiya. Bulumusi coosira kiyo. Aŋ, Yawe, Lona ma ay kolo huulona dayna mbay njunusiya. Aŋ li gegelay ni u poy mamba kay ana aŋ wam hurumu. Aŋ dew ni sa ma wi huu suuna ki halaŋŋa.

⁴⁰ Li ko ndaɗta na, kay a suu Israelna hum uŋu, hu li ma asi ka iiri kay ndaŋgarana halaŋ, ndaŋga mayra aŋ ɦaɗ ka maŋ somoyomira,

⁴¹ Lini koy ma col ay ki day ma ka hu njaf suu maŋ suu Israelnaɗi layna, mbay u seŋ ma nam humum hana,

⁴² Kay suuna hin hum ha ki kay seŋ ma ŋgol cocona, kay koŋ ma saɓakŋa u bikiŋ ma nek cocona. Lini nam mba a ceneŋ eg zi ndaɗta ni,

⁴³ aŋ hum ay kolo huulona day ziiŋ ma aŋ ka huna. Li dlara koy namma joɓoŋ kaɗta kay ana suu warna kay yam ndaŋgara halaŋ waŋ seŋ kiyo, a asi laŋ ndaraŋ ko suu maŋ suu Israelna na may. Asi wi ki ana seŋ ka yi hu zira an miniɗ ndaɗta.

⁴⁴ «Lini suu maŋsina hin tuɗ a duu u suu babali masisina hu li ma aŋ dasi ana asi tuɗ huwana, lini asi cen Yawe kay li namma ma aŋ sunusi huna, kay ɦoŋzi ma aŋ manamma u zira an miniɗ wan a yaŋ seŋ hura ni,

⁴⁵ aŋ ha kolo huulona day ni, humusi cen masira haa, ɦasi saɓakaŋa a su kay suuna a buɗ tasi kira.

⁴⁶ «Hu li ma suu Israelna hin gaŋ vunuŋ ki wa, kay ana sa ma hu ndaŋga ma bay ŋgel kaɗi, aŋ huruŋ ɓeŋ egesi hinisi ki hu duk ko suu babali masisina wa, asi yowosi balna tuɗusi ha ki hu mbas masira dayra kala ɗowba toko ni,

⁴⁷ lini hu mbassa asi ha ki vii balna hura asi gijaŋ saara, hom kay dla coosira, gijaŋ a ceneŋ ay hu mbassa vi suu babali masisinara ana, ami ni suu cona, ami li ni coo, ɓakŋa vami wa daŋ may.

⁴⁸ Lini asi hoŋ ay egeŋ u hurusi halaŋ u saa masisra halaŋ hu mbassa asi ha ki hu duk suu babali masisinara, lini asi ka cen ay egeŋu, pereɗ irisi ay hu mbas masira, mbassa aŋ ɦaɗ ka maŋ somoyosira, hu ɦoŋzi ŋgol ma aŋ manam kina u zira an miniɗ a yaŋ seŋ hura ni,

⁴⁹ aŋ ay kolo huulona day hu li ma aŋ ka huna ni humusi cen masira u tii masina. Ҥasi saɓakŋa a buɗusi kira.

⁵⁰ Bulum cora vi suu maŋsina ta laŋga egeŋga kiyo. Bulumusi yaasira asi laɗ u aŋga kiyo, wasi hahawasi ko suu may suu yowosi ha ki mbaɓurana a asi mbuɗ wasi hahawasi ay may.

⁵¹ Ni kay suu maŋsina suu jooŋŋa, suu aŋ cukusi ay ki hu mbassa Egipterana ay ki duk lassa ŋgolla ko ku mayra ŋgik ŋgik ta yoo kawina kira na.

⁵² Ko humuŋ li ha ki mali kay a hum cenda vi saaŋ ma sunda u cenda vi suu maŋ suu Israelna. Hu li ma asi ka oo usi yi ha kolo egeŋŋa halaŋŋi aŋ humusiya.

⁵³ Kay aŋŋi sa ma manasi ki duk suu kay ndaŋgarana halaŋ, hinisi ki maŋ kay taŋ a jooŋŋana. Ko ndal aŋ di ay ki jew fun Moiz saaŋ ma sundara na, hu li ma aŋ cukumi somoyomi ay ki hu mbassa Egiptera wanna, ɦi, Bu Suuna Yawe,»

Salomon joɓ paɗvun ma vi Lonna

⁵⁴ Salomon daɓ cen mamba u joɓpa maŋ Yawe halaŋŋi ay goɓi kaŋga ni u vun givim fun givin ma togolla, nam yow kom kolo eg huulona. Hu li ma vunum ndi gana may ni, nam col ay ki koloo.

⁵⁵ Hu colom kolona ni, nam paɗ vunum ki kay suu Israelna, suu ka toki egemma halaŋ di ana,

⁵⁶ «An gi deɓ Yawe, Lona ma ɦal heɓpa maŋ suu Israelna, suu mamsina, ko ndal nam vi vunum ay ki fok jewra na. Cemi ni dlara nam vi vunum kaɗ ay fun Moizza nam laɗ ki wa dew dew halaŋ.

⁵⁷ Cemi wanda, an joɓ Yawe, Looygina ko nam li u aygi ko ndal nam li ay u somoyoygira na may. Ko nam noyoygi kiɗi, ko nam hin njunda njun kaygiraɗi.

⁵⁸ Ko nam pereɗeygi saa maygira ha egem na ɗow a aygi poy ni ko nam minda na. A hum u gaɗta u neemba u gaɗta nam ɦaɗ ka maŋ somoyoygira halaŋ.

⁵⁹ Ko Yawe, Looygina, humum gam kay cenda an cenemba faali lay, njeŋge lay fok Looygina, kay ana buuna u buuna nam mbay njun kaygiya, kagi lay, kan lay, aygi suu mamsina.

⁶⁰ Ni suuna halaŋ hin wi ki ana Bu Suuna ni Lona, ni nam dew. Lo ma daŋ kaɗi.

⁶¹ Ko agi tok hurugi halaŋŋi maŋ Yawe, Looygina na dew, kay a agi poy ni u gaɗ mamba, li u gaɗ mamba halaŋ ko ndal agi ka li cemi wandara na.»

Ɓivun ma lam maŋ Bu Suunana

⁶² Mulna Salomon u suu Israel suu ka u namma halaŋ li ɓivunna maŋ Yawe.

⁶³ Salomon ŋgaɗ mbutlugina 22,000, timigiina u ɦugunina na 120,000 a li ɓivun ma taɓ dukka. Ni kay a mal vun Ziŋ Yawera ŋgolla.

⁶⁴ Hu buu namma ni mulna Salomon poo ki kay huu taraŋga fun Ziŋ Yawera lay, kay givin ma togolla ni, gooro ka ndak a cuk tlena belɗi. Salomon ŋgal ɓivun ma ŋgalam ki ŋgalina ki ni huu taraŋga fun Ziŋ Yawera. Puura ta u wanana u ɓivun ma ŋgal mbul yoorina halaŋ, ni ɓivun ma taɓ duk ɦoŋga.

⁶⁵ Hu li namma gaw ni, Salomon li luu ma vun mbutluɓma ki hu gaw may. Suu Israelna tok ay ni halaŋ halaŋ, col ay Lebo-Hamat ii ma mbayawna ta ta fun mbo lum ma Egiptena ii ma dalina. Asi li luuna fok Yawe, Looygina, buuna kiɗisiya, asi hin li buuna kiɗisiya olo, buuna halaŋ doogo yam fiɗi.

⁶⁶ Hu buu ma kalavandina ni Salomon hin suuna tuɗ ki voo. Asi gi deɓ maŋ mulna si si ni, cuk tasi gaw gaw, tuɗ vo hu ziisiya. Asi furi coco kay jivira Yawe, laɗ maŋ Davidta ura laɗ kay saam ma sunda u suu mam suu Israelna halaŋga.