1 MULINA 6 - Boy Lonana

Minda min Ziŋ Yawera

¹ Mulna Salomon gijaŋŋa a min Ziŋ Lonara ni hu basara 480 ta suu Israelna cuk ay ki hu mbassa Egiptera. Ni hu basara fiɗi ta Salomon kak a mulna kay suu Israelnara may, hu til ma yam ana Zivna ni til ma mbana.

² Zi mayra mulna Salomon miniɗ maŋ Yawera fiyekeɗ ni meter dok-hindi, hayaɗ ni meter doogo, wuluɗ ma kolona ni meter doogo yam vadl.

³ Huu Ziŋ Yawera ŋgolla gina pi funuɗu, fiyekem meter doogo ko ɦay zira na ga, huu zaŋŋa ha kurufu ni meter vadl may.

⁴ Ii Ziŋ Yawera va ma dukum huruɗna ki cili u bay ŋgamina.

⁵ Asi min zira daŋga ha pay Ziŋ Yawera, ŋgufuɗ ki kay Ziŋ Lonara na cutl. Ni a goo zira goora taɓ ha egeɗ hura.

⁶ Keŋ ma kaŋgana meter mba' u nus, ii ma dukŋa meter hindi, ii ma fok kolona ni meter hindi u nus. Na may gulumun ma gii kay Ziŋ Yawerana doɓolokom ka fun tam dewɗi. Li ma daŋŋa feɗ su ma hiniŋŋa ni kay ana gu ma njaam ay kolo kayamma ŋgen eg Ziŋ Yaweraɗi.

⁷ Min Ziŋ Yawera ni u ɦinira asi ceɗeɗ ayra. Kay ndaɗta hu li ma miniɗna ni sa ka hum waɗ marto huɗi lay, ka kal kawi ha huɗi lay.

⁸ Vun goo zira ŋguy kay Ziŋ Yawera vunuɗ ha ni bik njuf na keŋ Ziŋ Yawera ma dalina na. Hu vun namma ni taɓa ha hu zira duk kolora ni u jaŋlana, hin gun ha gak gak tuɗ hu zira ŋgolla ha kolo dayra.

⁹ A daɓ min Ziŋ Yawera kira ni asi caɗ yam zira ki kolo huruɗ u sedrena.

¹⁰ Zira goora miniɗ ŋguy kay Ziŋ Yawera fiyekeɗ ma kolona ni meter mba' u nus, gu mbal sedrena mba' gi ki ni kay gulumun ma kay Ziŋ Yawerana.

¹¹ Yawe di Salomon ana,

¹² «Cemi ni aŋ ka minin zira ni manu. Lini aŋ ka li u boy ma an daŋŋa hu gaɗta wanna may ni, li u yal ma an daŋŋana may ni, lini aŋ ɦal taŋ a hum u gaɗ manda halaŋ may ni, an hin li dlara an daɗ ay ki jew maŋ buŋ kaŋga u vi vun man namma may.

¹³ An hin mbay kak hu zi ndaɗta duk suu Israelna. An hin ka noy suu Israelna kiɗi. Asi ni suu mansina.»

Ndal huu Ziŋ Yawera ki jiviya

¹⁴ Salomon min Ziŋ Yawera, daɓaɗ sunuɗ kiyo.

¹⁵ Nam min huu zira ma kurufuna ki u gu sedrena, col ha kaŋga day tew ay ki kolo eg mbal ma yam zira ci egemma. Nam cam yamba u gu ma jivina halaŋ, baa yam gu ma hu kurufuna ki halaŋ. Nam ci gu siprena ki kaŋga hu goŋga lay.

¹⁶ Nam hin cak ii li ma daŋŋa ki kurufu hu u gu sedrena. Col ha kaŋga tuɗ ay ta ta kolo ni meter doogo, min li namma ki jivi a tin Zandukka Galamba yam ana Li ma ki Saɓaki Teteɗna.

¹⁷ Huu zira ŋgolla faɗ ha ki fok jew Li ma ki Saɓaki Teteɗnara huruɗ ni meter dok-mba'.

¹⁸ Huu Ziŋ Yawera kurufura ki ndaliya. Ndali kolo ko ndal vuɗ kusira na, ɓo tlena ndali kolo hu may. Huuruɗ halaŋ ki ŋguffi u gu sedrena. Sa ka wi ɦinira min goŋga u ndaɗta ki kiɗikgi.

¹⁹ Duk gayra kalafi hu Ziŋ Yawera ni nam min huu zi taa ki dew a Li ma Teteɗna a tin Zanduk ta Galamba vi Yawera huwa.

²⁰ Fun zira teteɗta na ni zira ka hu fiyekeɗ meter doogo, hayaɗ meter doogo, wuluɗ ma kolona meter doogo lay. Salomon hoo ta gu namma ki ni u lorra. givin ma togolla ka hu may. Asi minimmi u gu sedrena.

²¹ Huu zira kalafi halaŋŋi Salomon hooroɗ ki u lorra. Nam njun galina ki kolo fun zira ki saɓaki teteɗta lam tam ki u lorra.

²² Zira u ŋgoloɗ halaŋga nam laɗ ki u lorra. Givin ma togolla hu zira teteɗta nam laɗ ki u lorra.

²³ Huu zira ki saɓaki teteɗta nam min Serubimgina ka hu mba' u gu conona fiyekesi ma wuli kolona ni meter vadl vadl.

²⁴ Serubim ma jewna garaŋami meter mba' u nus, ma mbana mamba ni meter mba' u nus may, taɓ halaŋ a ŋgaf ki fun taɗta ni meter vadl.

²⁵ Ma mbana garaŋammi meter mba' u nus lay. Serubimma mba' jakŋi mini ni fun tam dew.

²⁶ Serubim ma jewna wulummi meter vadl, ma mbana wulum ni na lay.

²⁷ Nam tin Serubimma ni duk gayra kurufu hu zira. Serubimma garaŋam ki maliya, garaŋamba jewra tin ha ki pay goŋga, ma mbana garaŋam tin ha ki pay goŋga ii hiniŋŋa may. Garaŋasi ta mba' hiniŋga ni kolo duk zira may, tuɗ taɓ taɗ ha kiyo.

²⁸ Serubim namma nam lam tam ki u lorra.

²⁹ Kolo pay zira kurufu lay, ii ŋgoo lay ni nam li foto Serubimma ki koloo u foto manawna u ɓo tlena may.

³⁰ Gu ma hu zigini suu mba' asina halaŋ nam lam tam ki u lorra kurufu lay ii ŋgoo lay.

³¹ A nduk vun zira teteɗ ndaɗta nam li ɓakŋa ni u gu conona, fiyek vunna mba kolo vokŋa na ga.

³² Kolo keŋ vunna u dlam jakŋi nam li foto Serubimma u manawna u ɓo tlena ki kolo huwa. Nam hoorosi tasi ki u lorra. Nam li lorra kay Serubimma may kay manawna may.

³³ Vun goŋga ŋgolla nam laɗ ki ni ko ndaɗta na lay. Vunuɗ ma tuɗ kolona ni u gu conona. Fiyekem mba kolo funuŋ na ga.

³⁴ Vunuɗ huu tammi mba' mini u gu siperena. Goo vun ma mal tew tewna mba' ii ŋgoo may, mba' ii vo kurufu may.

³⁵ Kolo keŋ vunna u dlam jakŋi nam li foto Serubimma u manawna u bo tlena ki huwa. Nam li lorra ki eg vun ma mal tew tewna.

³⁶ Nam hin gi kaana ki kay li ma ii ŋgoona. Gi dar ɦini mayra ceɗira kurufu hu hindi, gi dar gu mbalna hu dew may.

³⁷ Gi u zira vi Yawera kaŋga ni hu basara fiɗira hu til ma yam ana Zivna.

³⁸ Daɓ zira ki minda u tlegeyeɗ halaŋŋi hu basara doogo yam dew ta Salomon kak mulnara. Ni hu til Bul, ni ana til ma kalavandina. Li basara a min Ziŋ Yawera ni kiɗisiya.