1 MULINA 5 - Boy Lonana

Yalna vi Salomon u sem ma tii ki cocona

¹ Salomon ti mulla kay muli suu daŋŋa halaŋ halaŋ, col ay fun mbo lum ma Eufratana ta ta tew ay ki fun mbassa vi suu Filistina, tuɗ ay ki ta ta ii hakara u mbassa Egiptera. Muli suu hu mul ndaɗtana halaŋŋi ga u Salomon. Asi ɦam taara ta ta hu li ma nam ka iiri tuna.

² Hu buu ma dewna ni Salomon ti ni fuɗ saytokka ɦarira ni ii kelewna buɓ buɓ dleeŋe ta ki tegeɗiira ni kelewna 18.000 may.

³ Bolo mbutlugi suu ɗoorina doogo, mbutli suu ɦawana dok-mba' may, timigiina kis, tlesuu daŋŋa ni ndumusi ka huɗi, gi laffa u dukgina ndumusi ka dukgi, ugi layagina lay ka huɗi.

⁴ Kay nam ti mulla ni kay mbassa ha ki ŋgoo mbona ii hiniŋŋara lay. Col ha Tifsah ta ta Gaza kay muli suu ŋgoo lumma ii ma hiniŋŋa halaŋ halaŋ. Heɓpa ka hu li namma. Va ma co kaɗi.

⁵ Suu Yudana u suu Israelna col ha Dan ta ta Berseba gegelay ka kaki hu ziimmi u heɓpa hu li ma Salomon kana, gegelay ka u sene gugutlu mamma u tulum mamma lay hu buu ma Salomon ka iiri tuna halaŋ.

⁶ Salomon kulumi mamma ni 12.000, zigini suu buu kulumi suu pus pusna ni 40.000 may.

⁷ Muli suu ŋgolo suu mulna manasi doogo yam mbana ɦal tina ay maŋ mulna ni asiya. Suu nam yasi ay varamma asi ɦasi tina lay. Va ka kaɗak kay saɗi.

⁸ Asi mba wa orgena usi ma ɦam ma kulumina ay fok Salomon ko ŋgaasi hara na may. Gegelay li ni sun mamba ɦamba komba.

Yal ma vi Salomonna su ki kay suuna halaŋ

⁹ Lona ɦal yalna u nera maŋ Salomon, nam mbuɗ wi tlena cocoo, ŋgola ko ndal ŋgetl ma doŋ lummana na.

¹⁰ Yal ma vi Salomonna su ki kay yal ma vi suu u maɗinana halaŋ, su ki kay yal ma vi suu Egiptena lay.

¹¹ Nammi sa ma yal su suuna halaŋŋa, su Etan, sa Ezrana, su Hemanna, Kalkol u Darda goryoŋ Maholna, sem tii ki kay mbassa ŋguy kamba halaŋ.

¹² Nam di boyna u vun ŋgolna na buɓ buɓ hindi, sool mamba kay tamba na buɓ duk vadl.

¹³ Nam tin ndal dlara u ŋgusugina u sedre ma Libanna u hisop ma day kolo kay gulumunnana. Nam tin ndal dlara u tlesuu sesi fiɗi fiɗina u layagina u tlesuu ɦaram kaŋgana u kulufna lay.

¹⁴ Suu warna kay yam mbassa halaŋ u muli suu kay ndaŋgarana bel bel, suu hum dla yal ma vi Salomonna mbay egem a humum yal mamma.

Salomon min tam kay a min Ziŋ Yawera

¹⁵ Hiram, mul ma Tirna, sun suu mam suu sunda ay eg Salomon kay nam hum ana asi tinim ka a mulna balam bum David ni namu. Hiram li ay ni banaŋ Davidna.

¹⁶ Salomon sun ha tuɗ di Hiram ana,

¹⁷ «Aŋ wi ana bun, David, duuna tlam irim ki cocoo. Suu babali mamsina ŋguyum ki dukŋi na cutl. Nam tew ka a min Zira a geleɗ sem Yawe Loommaraɗi. Ta ta cemi Yawe cukun suu babali asina ki ga u sen halaŋ.

¹⁸ Cemi wanda Yawe, Loonna, ɦan koɗ tara wa hu lina halaŋ. Sa ma babali man ka oloɗi. Dlara yoora ka oloɗi lay.

¹⁹ An cemi ka saa a min Zira geleɗ Yawe Loonnara ko ndal Yawe di ka maŋ bun, Davidta, na may, ana, Goroŋ ma an hin kakam ka balamaŋŋa hin min Zira yan senda ka ni namu.

²⁰ Cemi ni aŋ ndak a ɦan voɗta kay a asi kaan gu sedre ma Libanna aya. Suu sun maŋsina taɓ ko tasi u suu su n mansina, an hin warakasi loɓosiya. Ni ko dira aŋ hin danda ayra na may. Kay aŋ wi ana sa ma varami tani ma wi ka guna ko suu Sidonna na kaɗi.»

²¹ Hu li ma Hiram hum boy ma vi Salomonna na may ni, nam furi cocoo, hin di ana, «Gi deɓ maŋ Yawe ma ɦal goo ma wi dlara cocona maŋ David a ti mulla kay suu zuli coco wannana.»

²² Hirim gi vun sunda ha eg Salomon dam ana, «Na ɗaŋ may an humuŋ boy maŋŋawa. An hin ɦaŋ gu sedrena ugi siprena lay ko aŋ joɓpa na may.

²³ Suu sun mansina hin tuɗum ha ki ga ta ta fun mbo lum ma ŋgolna. An hin gam ha ki u lumba ta ta tew hu li ma aŋ min a an cukum huna. Va ma a warakŋa an minni ana aŋ ɦan tina ay maŋ suu mansina.»

²⁴ Ko ndaɗta na Hiram ɦal gu sedrena u siprena maŋ Salomon ko nam minda na.

²⁵ Salomon hu basara tew tew ni ɦal wa blena maŋ Hiram ii kelewna 6.000. Ҥam mbul conona litirna 8.000 may. Ni kay tina vi suu mam suu vo varamma.

²⁶ Yawe ɦal yalna maŋ Salomon ko nam damba na may. Banara tuɗ duk ɦoŋ gi Salomon u Hiram jivi cocoo. Asi jakŋi li ki u vunusi ma asi damma.

Salomon tin sunda kay suuna u saɓakŋa

²⁷ Mulna Salomon yow suu li sunda duk suu Israelna u saɓakŋa. Suuna na 30.000.

²⁸ U tilna dew ni nam cuk suuna hu Liban 10.000. Asi mbuɗ tasi ni mbuɗiya. Li til ay hu Liban dew, mba li tilna vo mba' mba' may. Adonirammi sa ma fokosi a ŋgollana.

²⁹ Salomon yow suu zii guna ayna ni 70.000. Suu may suu ced ɦinira ni 80.000 may. Asi ka li sunda maŋ Salomon kolo kay ɦinira.

³⁰ Ni ndum suu may suu asi suu ŋgolo suu vi Salomonna yowosi ki fok jew a li sundana ka huɗi. Suu asina ni 3.300. Ni suu ka gol suu may suu ka li sundana.

³¹ Mulna ɦal voɗta ana ceɗ ɦinira ŋgolora ta jivi cocora a gi u Ziŋ Yawera ga u ndaɗta.

³² Suu sunda vi Salomon u suu vi Hiramma u suu may suu hu Gibalna gijaŋ ka guna u ced ɦinira a min Ziŋ Yawera.