1 MULINA 3 - Boy Lonana

Salomon ɗum goŋ mul ma Egiptenara

¹ Salomon mbuɗ ki ni kunuŋ Faraw, mul ma Egiptena nam vi goŋ Farawra umu. Nam tuɗuɗ ha ki hu Ҥoŋzi Davidna ta ta nam daɓ sun Ziŋ Yawera ŋgolla kiyo, min ziim tamba ki may, gi gulumunna ki kay ɦoŋzi ma Yerusalemma may.

² Hu li namma ni suuna li ɓivunna ay ni kolo kay li ma mbuyna tuwa kay sa min Zi mayra yi sem Yawe hura ka tuɗi.

³ Salomon min Yawe coco ɦay. Nam li ni u dlara bum David damba kara, may nam li ɓivunna ŋgal mbitla his jivira ay ni kolo kay li mbuyna tuwa.

Salomon joɓ Lona kay yalna

⁴ Mulna tuɗ hu Gabaon a li ɓivunna huwa kay li namma ni li ma mbuy kolo su ndaryammana. Salomon ŋgaɗ tlesuu li ɓivun ma ŋgalam ki ŋgalina na buɓ.

⁵ Ay hu Gabaon Yawe tak tam ii Salomon duk njeŋgera hu doyra. Lona dam ana, «Joɓa, va ma aŋ min a an ɦaŋŋana ni mege?»

⁶ Salomon hoŋ dira ana, «Aŋ li jivira maŋ saaŋ ma sunda bun David cocoo, kay ana nam li sunda fokoŋŋi u ɗegeera u jivira may u huu ma haɓma fokoŋ may, aŋ golom u jivi ndaɗta gak gak ɦam goo ma hin varak ka balamam kay dlam mamba mullana may.

⁷ Cemi wanda Yawe, Loonna, aŋ kak saaŋ ma sunda a ti mulla balam bun David ni aŋu. Anni gogona ɦawaa, ka wi yal ma a kak fok suunaɗi lay.

⁸ Saaŋ ma sunda ka cemi ni duk suu maŋsina, suu aŋ manasi kina, suu zuli cocona, sa ka ndak a ndumusiɗi ko zul masira.

⁹ Kay ndaɗta aŋ ɦal yalna huu saaŋ ma sunda a ti mulla kay suu maŋsina, a ɓorow duk ɦoŋ jivira ki u cora, sa ma ndak a ti mulla kay suu maŋ suu dlasi ŋgol coco wanna na ni gege?»

¹⁰ Joɓpa vi Salomon ndaɗta furi huu Bu Suuna cocoo.

¹¹ Lona hin dam ana, «Ko ndal aŋ joɓ wanda na, aŋ joɓ ka ana basaɗaŋ li kay ndaŋgara cocoo naɗi lay, joɓ ka ana ɦiziŋuraɗi lay, joɓ ka ana caŋ suu babali maŋsina kiyoraɗi lay, aŋ joɓmi ana ɦaŋ yal ma ɓorow ii jivira ki u cora, a ti mulla ni u ɗegeera.

¹² Gola an hin li ni ko ndal aŋ dira na may. An ɦaŋ huu ma wi dlara u yalna, suu ay ki fokoŋ jewna lay, suu hin varak ka ŋgoroŋŋa lay ni sa ma wi dla ko ndal aŋ na kaɗi.

¹³ Tlesuu aŋ joɓosi kaɗina lay ni an hin ɦaŋsina. Ҥiza u bibiŋilla, hu iiri maŋga kay ndaŋgara halaŋŋi sa ma li ko aŋ na kaɗi, duk muli suu ka kay ndaŋgarana halaŋ.

¹⁴ Lini aŋ tuɗ u gaɗ manda, ko ndal buŋ David lira na may ni an hin ɦuɗuŋ buu maŋ ma kay ndaŋgarana ha foko.»

¹⁵ Salomon dliɗ ki koloo, doyra dammi ko ndaɗta na. Nam hoŋ hu Yerusalem, tuɗ col fok Zanduk ta Galamba vi Yawe. Nam li ɓivun ma ŋgalam ki ŋgalina u ɓivun ma mbaa heɓpa. Nam yi funa suu sun mamsina halaŋ ti huwa.

Ɓak ma Salomon kaamma

¹⁶ Gawlaŋiina mba' mbay a li ɓakŋa fok mulna.

¹⁷ Ta hiniŋga dew di ana, «An ceneŋu, sa ŋgol manna, an u cara wanda ami buu ni hu zira dewra. An vuɗ ni hu li ma ndaɗ ka huna may.

¹⁸ Li buuna ŋgoron dagan hindi ni ca ndaɗta hin vuɗ may. Ami kalafi u ndaɗ ni mba', sa ma daŋ ka dukumiɗi.

¹⁹ Ca ndaɗta buu ki kay gooroɗu. Nam miɗ kiyo.

²⁰ Ndaɗ dliɗ kolo njeŋge dliɗ ni tlan goron ma gi egenna gaw, ni caaŋga sunda ki ni senna may, buurum ha ki fokoɗu, tli maɗ ma miɗina mba ganna ka ki fokon may.

²¹ An dliɗ ki kolo maɗi a ɦal pona maŋ goronda ni, gola ni nam ki ni miɗiya. Maɗira fo ki an golomu ni ka goron ma an vuɗummaɗi.»

²² Cara mbara hin di ana, «Ҥawaa ma iirina ni goonna, ma ki miɗina ni gorokŋa.» Ta jewra hin di ana, «Ҥawaa gorokŋi ma ki miɗina, ma iirina ni goonna.» Asi boyogina ci wayra fok mulna ko ndaɗta na.

²³ Mulna hin di ana, «Cara hiŋga di ana ma iirina ni goonna, ma ki miɗina ni makŋa, ta mbara hin ci wayra ana ɦawaa ma miɗina ni gookŋa, ma iirina ni manna.»

²⁴ Mulna hin di ana, «Tlangi ŋgew maa ay dew.» Asi hin tli ŋgewna ay mbaram ay fok mulna.

²⁵ Mulna hin di ana «Ŋgaɗagi ii goo ma iiri wanna ki duk mba', ɦal maŋ ca hiŋga dew may, maŋ ca hiŋga dew may.»

²⁶ Cara gooroɗna iiri wanda hin di mulna ana, «Ҥawaa sa ŋgol manna, ɦaɗ gogo namma haa, cam kiɗi.» kay huruɗ haɗ kay goroɗna cocoo. Ndaɗ cara mbara hin di ana, «Nam ka ni man oloɗi lay, ka makgi lay ni ŋgaɗamu.»

²⁷ Mulna hin gijaŋ ɓakŋa di ana, «Ҥal gogona maŋ cara fok jewra, cam kiɗi, kay ndaɗta ni sum daŋ may.»

²⁸ Suu Israelna halaŋ suu hum dla ɓak ma mulna kaam namma asi li ndaa mulna cocoo kay asi wi ki ana yal ma ka hurum wanna ni ma vi Lonna. Nam ka ɓakŋa ni u ɗegeera.