1 MULINA 22 - Boy Lonana

Akab min hoŋ a tli zi ma Ramotna kiyo

¹ Basara li ki na hindi ni duu ka duk hoŋ suu Israelna u suu Sirinaɗi.

² Hu basara hindira ni Josafat, mul ma Yudana, mbay ga eg mul ma Israelna.

³ Mul ma Israelna di suu mam suu ŋgolona ana, «Agi wi ana Ramot ta hu Galaadta ni varaygiya, naɗi su? Aygi hin dlak ndaana a tlaɗ ki ko mul ma Sirina ni kay mege?»

⁴ Nam di Josafat ana, «Aŋ min mbay u an a duu u Ramot ta Galaadta su?» Josafat hoŋom dira ana, «Dla ndaɗta hin li u anni ko aŋ na may, u kulumi mansina ni ko ndal maŋsina na may. U suu mansina ni ko suu maŋsina na may.»

Dira vi suu joɓpa vi Mulnana

⁵ Josafat hin di mul ma Israelna hu olo ana, «Mariyaɗ ni joɓ boy ma vi Yawe ma nam a damma tuwa.»

⁶ Mul ma Israelna tok suu jok vun Lona ay va ma kis kis fiɗi dasi ana, «An ndak a tuɗ duu u Ramot ta Galaadta ɗowba an kak su?» Asi hoŋom dira ana, «Tuɗ ɗow. Bu Suuna ɦaɗ ki hu duk ko mulnawa.»

⁷ Josafat dam ana, «Na ni sa ma jok vun Lona ma vi Yawe ka tani a ay tuɗ joɓombi su?»

⁸ Mul ma Israelna di Josafat ana, «Sa ma ka tani dew ma ay ndak a tuɗ joɓ Yawe ay funumma. Na may an ka minim dlaambaɗi kay nam ka dan dlara jivi kanɗi, di ni dla cora sak sak. Ni Mise, ma goŋ Yimlana.» Josafat di ana, «Ka mulna ɓak ko ndaɗta naɗi.»

⁹ Mul ma Israelna yi sa ŋgol mam maa ay dew dam ana, «Ɓaɗ zak, tuɗ yi sa ma jok vun Lona, Mise, ma goŋ Yimlana aya.»

¹⁰ Mul ma Israelna u Josafat, mul ma Yudana, gegelay ka kaki hu dlam mamba mulla, vun grekŋa hu ɦoŋzi ma Samarina. Suu jok vun Lona ka di dlara fokosi zeɗ zeɗ.

¹¹ Sana dew yam ana Sedekiya, goŋ Kenaana, yoo mek kawina. Nam di ana, «Gola ni boy ma Yawe damma. Mek namma takŋi saɓak ma aŋ hin su kay suu duu suu Sirina.»

¹² Suu Jok vun Lona halaŋ njaɗ ni boy ma dew namma di ana, «Tuɗ kolo hu Ramot ta Galaadta ɗow, aŋ hin tiya. Yawe ɦaɗ ki hu duk ko mulnawa.»

Sa ma jok vun Lona, Mise, di ki ana ɓalakka kaa

¹³ Sa ma tuɗ a yi Mise ayna dam ana, «Gola boy ma suu jok vun Lona damma, vunusi ha ni fun tasi na dew. Asi di dlara jivira kay mulna cocoo. Ko boy maŋŋa li ni ko ndal masina na may. Di ni dlara jivira.»

¹⁴ Mise di ana, «U iirira vi Yawe va ma Yawe dannana an hin nda dammi nam may.»

¹⁵ Nam mba eg mulna. Nam dam ana, «Mise, ami ndak a tuɗ duu u Ramot ta Galaadta ɗowba ami kak su?» Nam hoŋom dira ana, «Tuɗa, aŋ hin tiya. Yawe ɦaɗ ki hu duk ko mulnawa.»

¹⁶ Mulna dam ana, «An hin suuruŋŋi yan ga a aŋ dan gasisra ki u sem Yawera nige?»

¹⁷ Mise hoŋom dira ana, «An wi suu Israelna njay ki kolo kay ɦinira ko ndal timigii suu sa taarasi ka usiɗira na. Yawe di ana, suu asina sa ma fokosi kaɗi. Ko gegelay ni hoŋ vo hu ziim u heɓpa.»

¹⁸ Mul ma Israelna di Josafat ana, «Aŋ gola, an daŋgi su? Nam ka dan dlara jiviɗi, di ni dla cora na ba ba.»

¹⁹ Mise hoŋ di hu olo ana, «Jiviya, aŋ hum boy ma Yawe damma haa. An wi Yawe kaki kay dlam mamba. Suu duu suu huulonana coli kolo u sesi egemu, kay bikim njuf may, bik gulu may.

²⁰ Yawe joɓ ana, sa ma tuɗ ganyam Akab ana nam tuɗ duu u Ramot ta Galaadta, puk kaŋgaa, na ni gege? Sa ma hiniŋŋa hoŋ diimba ni zeɗ may, ma daŋŋa njaɗ ni zeɗ may.

²¹ Ŋgussa dew mbay fok Yawe di ana, An tuɗ ganam yamu. Yawe joɓoɗ ana, Ndak hin ganam yammi ana mege?

²² Ŋgus ndaɗta hoŋ dira ana, An hin tuɗ mbuɗ tan ki a ŋgussa kaboyna, kal ay ki fun suu mam suu jok vun Lona halaŋ halaŋ. Yawe hin daɗ ana, Ndak tuɗ ganam yamu, voɗta ka kay ndak a tuɗ ganam yamba. Tuɗa i li ko ndaɗta na.

²³ Lini gasi Yawe kal ŋgussa kaboyna ki fun suu maŋ suu jok vun Lonana ni, kay hahawra nam ɓakaŋ ki jew kaɗ ana ndaɗ hin faŋura.»

²⁴ Sedekiya, ma goŋ Kenaana, ɦuɗ tam ay eg Mise mba cam kiriŋim di ana, «Musukka vi Yawera kal ay ki funun a daŋ boyna ni saɓage?»

²⁵ Mise hin dam ana, «Jiviya aŋ hin wi tuwa ni hu buu ma aŋ hin ŋguf huu ziginina huruŋ ŋguf ŋguf a ŋgayrana.»

²⁶ Mul ma Israelna di ana, «Vagi Mise, tuɗum ha maŋ Amon, mul ma hu ɦoŋzinana u Yoas, ma goŋ mulnana.

²⁷ Agi tuɗ dasi ana, Mulna ɓak ay ana gagi sa namma daŋgayna. Ҥammi u fu ma hin kina u yona may ta ta juɓ buu ma an hoŋ ay ki vo ɦawa va lan kaɗina tuwa.»

²⁸ Mise di ana, «Lini gasi aŋ hoŋ ay ki vo bay va laŋ wa ni, Yawe ɓak ay fununni ka nambi.» Nam hin di ana, «Agi suu Israelna humugi ki halaŋ.»

Mulna Akab asi cam ha ki fun duuna

²⁹ Mul ma Israelna u Josafat, mul ma Yudana, tuɗ kolo hu Ramot ta Galaadta.

³⁰ Mul ma Israelna di Josafat ana, «An min mbuɗ tan ki zeɗ ni kal duk yara may. Aŋ mayna cuk baraw maŋŋa tamba may.» Mul ma Israelna mbuɗ tam ki zeɗ ni kal duk yara gaw may.

³¹ Mul ma Sirina gaɗ suu mam suu dok-hindi yam mba' suu u pus pus ma kulumina ana, «Cagi sa ŋgolɗi lay, gogooɗi lay, may halagi ni mul ma vi suu Israelna.»

³² Hu li ma suu pus pus ma kulumina wi Josafat ha na ni, asi di ana, «Gola, cow ha ni mul ma vi suu Israelna.» Asi tin irisi ha kam a vamba. Josafat gijaŋ sawalla koloo.

³³ Muli suu pus pus ma kulumina wi ana ni ka mul ma Israelnaɗi ni, asi mbuɗ irisi hu li ma daŋŋa, hinimu.

³⁴ May sana dew mun mbuurura ha kolo ɦawa na ni, ndaɗ tuɗ vi mul ma Israelna, kal duk ɦoŋ koroŋ ma ka egemma. Mulna di saam a jaŋam pus pus mamma ana, «Hoŋoy dagan kalan ki duk suu yara, kay an dakiya.»

³⁵ Duuna hu buu namma ni eŋ cocoo. Suuna hin mulna ka kolo hu pus pus mamma vok zi ma Sirina na gay. Ca fiɗigira na, nam miɗ ki gaw may. Busuɗum soo ki cocoo, oy ki um kolo hu pus pusna na kus.

³⁶ Faɗta ndi kaŋga may ni walla sa kolo hu kaŋŋa ana, «Gegelay ni hoŋ ki hu ɦoŋzi ŋgol ma nam col ay huna. Gegelay ni tuɗ ki vo hu ziimu, hu mbas mamba.»

³⁷ Kay mulna miɗ kiwa. Asi tlam maɗam ay vo hu Samari, mba pam ki ni huwa.

³⁸ Hu li ma asi ka mbus busuna ki hu pus pusna fun mbo ŋgona na ni, diginina mbay tanaɗ busu Akab. Gawlaŋina mbus tasi ni duk mbo namma, ni ko Yawe di ay ki jew fun sa ma jok vun Lonana na may.

³⁹ U dlara Akab laɗta halaŋ ka ɓiiri hu magaara Sunda vi Muli suu Israelna. Asi ɓak kay zira jivira nam miniɗta, ndalaɗ taɗ ki u sii tlokka may.

⁴⁰ Akab buu kaŋga eg somoyom wa, goromma Akaziyas varak balamam a mulna.

Josafat, mul ma Yudana

⁴¹ Josafat, ma goŋ Azana, mbuɗ a mul ma Yudana ni hu li ma Akab, mul ma Israelna, basa ki hu mulla fiɗina.

⁴² Josafat kak a mulna na ni basadam tew ki dok-hindi yam vadl. Nam ti mulla hu Yerusalemmi basara dok-mba' yam vadl. Sem summi ana Azuba. Ndaɗ ni goŋ Silira.

⁴³ Nam tuɗ ni u dlara bum Aza laɗta na ɗegee, tli vunum ka ki keŋgi. Li ni dlara ɗegee ii Yawe jivira.

⁴⁴ Na lay ni li ma mbuy kolo ma goɓ fulina bulum ka ki tuɗi. Suuna tuɗ fok gak a li ɓivunna, ŋgal mbitla his jivira hu li namma gak gak tuwa.

⁴⁵ Josafat li heɓpa duk ɦoŋ tam u mul ma Israelna.

⁴⁶ U dlara Josafat laɗta ni ka ɓiiri hu magaara Sunda vi Muli suu Yudanara. Asi njaɗ kay ɦiŋ mamba u duu ma nam lamma may.

⁴⁷ Nam dik dla cora ki hu mbassa halaŋ, njufiina u boyogi suu li ɓivun zoŋga, suu hin ka ay ii bum Aza dayna, nam dikisi ki bel bel.

⁴⁸ Hu coki ndaɗta ni mul ma ka hu mbassa Edombaɗi. Mul ma Yudana tin sana ha hu a gol lina ni mamu.

⁴⁹ Josafat min lum kawi ma ŋgolona a tuɗ hal lorra hu Ofir. Lum kawina hin tew kaɗi kay lum kawina ɓalak ki duk mbo ma Eziyon-Geberna.

⁵⁰ Akaziyas ma goŋ Akabma di Josafat ana, «Hinin suu sun mansina tuɗ u suu sun maŋsina hu lum kawina may.» Na may ni Josafat ka minɗi.

⁵¹ Josafat buu ga eg somoyomu. Asi tosommi hu Ҥoŋzi Davidna. Goromma Joram varak balamam a mulna ni namu.

Akaziyas, mul ma Israelna

⁵² Akaziyas, ma goŋ Akabma, mbuɗ a mul ma Israelna ni hu li ma Josafat, mul ma Yudana, basaɗ ki hu mulla doogo yam kiɗisiya. Nam ti mulla kay suu Israelna ni basara mba'.

⁵³ Nam li dlara ka ii Yawe jiviɗira. Nam tli ni dlara vi bumba olo u dlara vi sumba u dlaŋ Jeroboam, ma goŋ Nebatna, ma cuk suu Israelna hu dla cora halaŋ.

⁵⁴ Nam sunni Baal, goɓ kaŋga fokomu. Nam ɓalak huu Yawe, Lona vi suu Israelna. Ni ko ndal bum lira na dege dege.