1 MULINA 20 - Boy Lonana

Akab su kay Ben-Hadad, mul ma Sirina

¹ Ben-Hadad, mul ma Sirina, tok suu mam suu duuna na halaŋ halaŋ. Muli suu taɓ ay ki umma na dok-hindi yam mba', u kulumina cocoo, suu u pus pus ma kuluminana coco lay. Asi mbay ŋguf ɦoŋzi ma Samarina a duu u asira.

² Asi cuk suu vun sunda tuɗ di Akab, mul ma vi suu Israelna, ha ki ana,

³ «Gola ni boy ma Ben-Hadad, mul ma Sirina, damma, ɦan gursu maŋŋa u lor maŋga u boyogoŋu u goryoŋ suu jivi cocona ay kiyo.»

⁴ Mul ma Israelna hoŋom dira ana, «Sa ŋgolna an hum u gaɗ maŋga. An tanda lay ɦal tan ha ki ni maŋ lay u tlegeyen suu vo konna halaŋ lay.

⁵ Suu vun sunda hoŋ ay egem a mbara mba dam boy ma vi mulna Ben-Hadadna olo ana, an sun ha egeŋŋi ana aŋ ɦan gursu maŋŋa u lor maŋga, boyogoŋ u goryoŋ ay kiyo.

⁶ Vini ko ndal wanda na an hin sun suu sun mansina haa. Asi tuɗ halaŋ huu ziiŋ kiyo, hal huu ziŋ suu maŋ suu ŋgolona ki lay. Asi hin yow tlesuu jivi suu ka vo varaŋŋa halaŋ, hin mbaaransina ay ki tani.»

⁷ Mul ma Israelna yi suu ŋgolo mam suu hu mbas mambana egem halaŋ dasi ana, «Agi wi ana sa namma min a lan egenni dla cora. Hu li ma nam joɓon suu mansina, boyogonu, goryonu, gursura u lorra ni an dorom ka kasiɗi.»

⁸ Suu ŋgolona halaŋ u suu Israelna halaŋ dam ana, «Hum boy nammaɗi, vi boy namma kaŋgi lay.»

⁹ Asi di suu Ben-Hadad sunusi ayna ana, «Tuɗ dagi sa ŋgolna mulna ana, dlara aŋ mba joɓoɗ jew kay a li sun maŋgara bel ni ami hin laɗu. Ta dagan wanda ni an min laɗɗi.» Suu vun sunda hoŋ vo, tuɗ cuɗum boy namma may.

¹⁰ Ben-Hadad hoŋ sun suuna ay a yamba hindira eg Akab dam ana, «Ko loogina lan dla cora egenu, nam hin di hu ana, lini gugum ndaŋgara Samarira ndak a oy duk ko suu a tuɗ ha kay ceerenna ni an hin wi tuwa.»

¹¹ Mul ma Israelna hoŋom dira ha ana, «Ɓakagi ay na gak gak ɗow, ka sa ma njun gandi mamma hurum kay tamma ŋga tam ko sa ma buɗum gandina ki hurumma naɗi.»

¹² Hu li ma Ben-Hadad ka kaki ci u muli mamsina hum boy namma na ni, di suu sun mamsina ana, «Tuɗ ndugugi ɦoŋzina.» Asi min tasi ki a ndug ɦoŋzinara may.

Mulna Akab su kasiya

¹³ Sa ma jok vun Lona dew ɦuɗ tam ay eg Akab dam ana, «Gola, Yawe di ana, suu moli bolow coco wanna ni aŋ wasiɗi su? An hin ɦaŋsina ki karam hu duk koŋu. Aŋ hin wi ki ana an ni Yawe daŋ may.»

¹⁴ Akab hin joɓ ana, «Aŋ hin ɦansina ki u saɓakŋa vi ge ma a col fokŋa ni ge?» Nam hoŋom dira ana, «Yawe di ana, ni u gorzoŋii suu asi manasi ay hu ɦoŋzi ma ŋgolonana.» Akab hin joɓ olo ana, «Sa ma hin gijaŋ duuna jewna ni gege?» Nam hoŋom dira ana, «Ni aŋ taŋga.»

¹⁵ Nam cuk gorzoŋii suu mulna varasi kina ha fok jewe. Asi bel ni 232. Ŋgorosi dagan nam cuk suu Israelna ha ŋgorosi may. Asi ni buɓ buɓ kiɗisya.

¹⁶ Asi cuk ay ki faali faɗta coli duk gayra, fiya ni Ben-Hadad guruɗ ki u summa may. Asi ka ci summa u muli mam suu taɓ ay um dok-hindi yam mbana ca may.

¹⁷ Gorzoŋii suu muli suu vona varasi ay kina cuk ay ki fok jew ni asiya. Ben-Hadad hum boy namma may, asi dam ana. «Suuna ay hu Samari cuk ay kiwa.»

¹⁸ Nam di ana, «Lini asi cuk ay ki ni u heɓpa ka li yaɗi ni, vagisina iiriya. Lini asi cuk ay ki ni a duuna lay ni, vagisina iiri lay.»

¹⁹ Suu cuk ay ki hu ɦoŋzina asina ni gorzoŋi suu mulna varasina suu asgaarina ay kay ceeresi may.

²⁰ Gegelay ni ci saamma, saamma, suu Aramena halaŋ tum liŋŋa. Suu Israelna dikisi usi ha may. Ben-Hadad, mul ma Sirina, pii suɗ tam ki u kulumma u suu kulumi suu daŋŋa kay ceerem may.

²¹ Mul ma Israelna li ni ko ndaɗta na. Nam ci kulumi suu Sirina ki halaŋ, to pus pus kulumina ki lay. Nam ɓalak ɦoŋzi ma Sirina ki cocoo.

²² Sa ma jok vun Lona ɦuɗ tam ay eg mul ma Israelna dam ana, «Tuɗ iriŋ ha fok na ɗow ɗow. May ni aŋ saa ki jivi kay dlara fokka, kay hu basara daara ni mul ma Sirina hin col duuna u aŋu.»

Akab su kay suu Sirina olo

²³ Suu ŋgolo suu vi mul ma Sirina dam ana, «Loosina ni Lo ma kolo kay ɦinirana. Kay ndaɗta asi li ay saɓak suuygi ni na. May tuɗuygi duuruygisina hu li ma gana tuwa, ni aygi hin li ni saɓak suusiya.

²⁴ Cemi ni aŋ li ni ko ndal wanda na, hin mulina kiyo, varakasi muli suu gorina ki balamasiya.

²⁵ Aŋ may ni yow asgaa suu daŋŋa, suu saɓak coco suu maŋ suu li fok jewna, kulumina u kulumina, pus pusna u pus pusna, tuɗ duuruygi ni ga hu li ma ɦawana. Lini nanagelay ni aygi hin su kasiya.» Nam hum boy masina, li ko ndal asi dira na may.

²⁶ Hu basara fokka ɗaŋŋi, Ben-Hadad yow suu mamsina. Nam mbuɗ asgaa suu Sirina ki halaŋ. Nam yow suu duuna ay hu Siri tuɗ ta ta hu Afek a duu u suu Israelna.

²⁷ Asgaa suu Israelna mbay fok mulna Akab may, ɦasi tlena ta ta ni asi tuɗ a ŋgaf asgaa suu Sirina a duuna may. Suu Israelna vi kaŋ masina ay fokosi irisi kaay na mba'. Ni ko ndal suu taa ɦugunina ɦawana ka bolowɗi, may asgaa suu Sirina oy yam ndaŋga ndaɗta ki halaŋ halaŋ.

²⁸ Sa ma jok vun Lona ɦuɗ tam ay eg mul ma Israelna olo dam ana, «Gola, Yawe di ana, suu Sirina di ay ana Yawe ni Lo ma kolo kay ɦinirana, ka lo ma ga kay ndaŋgaraɗi. An hin ɦaŋ suu bolow coco wanna ki ni hu duk koŋ halaŋ. Agi hin wi ki ana an gasi ni Yawe daŋ may.»

²⁹ Asi pi kaŋ masina vok tasi na ca ta ta buuna kiɗisiya, hu buu ma kiɗisiyana ni asi gijaŋ duuna may. Suu Israelna ci suu duu suu Sirina suu nam varasi ayna na buɓ buɓ kis hu buu ma dewna.

³⁰ Suu hin iirina pii tuɗ hu ɦoŋzi ma Afekŋa. Na may gulumunna bow kay suu hin iiri buɓ buɓ dok-mba' yam kiɗisiya asina. Ben-Hadad u tamba pii may. Nam tuɗ kal hu ɦoŋzina, ŋgay tam hu ziginina ni jok um hu zi hiŋga tani tani na gak gak.

Akab hin mul ma Sirina iiri bay camu

³¹ Suu ŋgolo mamsina dam ana, «Ami hum ana muli suu Israelna ni muli suu wi hahaw suuna, njunuygi baraw bolna huruygi njun njunni, njunuygi njeɓereygi ki kolo kaygi may, tuɗ ŋgafaygi mul ma Israelna lini nam mba hiniŋ kak iiri kalage.»

³² Asi njun baraw bolna hurusiya, njun njeɓeresi ki kolo kasi may, mbay vi mul ma Israelna dam ana, «Saaŋ ma sunda Ben-Hadad di ana, an joɓmi ana aŋ hinin iiri na tage.» Akab joɓosi ana, «Nam ka doli iiri tu su? Nammi wayanna.»

³³ Suu asina wi ki ana dlara a li ni jiviya. Asi ɓaɗ tasi a wi dlara nam hin a takasirara, hin hoŋ dira ana, «Ben-Hadad ni wayaŋŋa.» Akab hin dasi ana, «Tuɗugi halagina.» Ben-Hadad kal ay ki egemu. Akab tlam kolo hu pus pus mamma tamba.

³⁴ Ben-Hadad dam ana, «Ҥoŋzi ma bun yowom ka ki ko buŋŋa halaŋ, an hoŋoŋŋa. Aŋ ndak a tuɗ gus tlegesuu aŋ lasina ay ki hu Damas lay. Ko ndal bun gus mamsina ay ki hu Samarira na may.» Akab dam ana, «An hin hiniŋ tuɗ vo, yaŋ ki buɗiya.» Hu li ma asi vi galam ndaɗta vina ni, nam hinim nam tuɗ voo.

Lona kaɓakŋa kay maŋiira vi Akabba

³⁵ Sa maa dew duk goryoŋ suu jok vun Lonana di ndaram ma tuɗ ko tasina ko Yawe damba na ana, «An ceneŋu, can aya.» Na may sana min ka a cambi.

³⁶ Sa ma jok vun Lona dam ana, «Aŋ min ka a hum u dlara Yawe daɗtaɗi. Hu li ma aŋ garak u an na ni, dlona hin vaŋ kiyo.» Asi garak ki may ni, dlona mba ŋgaf u nam, vam kiyo.

³⁷ Sa ma jok vun Lona ŋgaf u sa ma daŋŋa dam ana, «An ceneŋu, can aya.» Sana cam na ni, dakammi na gaw.

³⁸ Sa ma jok vun Lona tuɗ juɓ vok mulna ha ki hu voɗta. Nam tuɗ ha wanna ka sa wambi baa barawna ki kamu, kuluɓ irim kiyo.

³⁹ Hu li ma mulna a jaka ni, nam sawalla ha kolo ana, «Saaŋ ma sunda kal ay ki a tuɗ hu li ma yara. Sa ma dew col ay hu li duuna, mbaaran sana ay egen wanni dan ana aŋ golom ka jiviya. An mba fam kaɗi ni, ba ki ni iiri maŋ taŋgara, kaɗi ni aŋ hin warak u gursura buɓ buɓ hindi may.

⁴⁰ Saaŋ ma sunda irim ki u sunda daŋga na ni, gol irimu ni sa namma kaɗi.» Mul ma Israelna hin dam ana, «Aŋ kaɓakŋa ay kay taŋŋi u taŋga tok.»

⁴¹ Sa ma jok vun Lona yow baraw ma ay ki boɗi kamma ki ni na zak gaw. Mulna wi ki ana ni sa maa dew duk suu jok vun Lona.

⁴² Sa namma hin dam ana, «Yawe di ana, aŋ hin sa ma an daŋ ana cam kiyona suɗa ni, iiri maŋga hin varakŋi kay balam iiri mamba. Suu maŋ suu Israelna ni kay balam suu mamsina may.»

⁴³ Mul ma Israelna hoŋ vo hu ziim hu Samari ni ki mbuɗi ndaa cocoo, ya coco lay.