1 MULINA 2 - Boy Lonana

Gaɗta David daɗ ka maŋ Salomon a daɓ daganda

¹ David wi ki ana buurum ma miɗna hinni toko ni nam gaɗ goromma, Salomon, ka ana,

² «An tuɗ ni hu voɗta suuna halaŋ tuɗ huruɗta. Aŋ li ka saɓaki, kak eŋ a sa njufna.

³ Gol gaɗta vi Yawe, Looŋŋara jiviya, tuɗ ni hu voɗ mamba, li u gaɗ mamba u neemba, dlara nam miniɗta u gaɗta nam coli kaɗta ko ndal ɓiiri hu magaara gaɗta vi Moizza na. Aŋ liwa na ni hin fi hu dlaaŋga aŋ a laɗta halaŋ,

⁴ Yawe hin li dlara nam dandara kiyo ana, Lini goryoŋ poy jiviya, tuɗ fokon u ɗegeera u hurusi halaŋŋi ɦal tasi ki halaŋ may, saaŋ ma ka hin mbay a kak ka kay dlamba mulla fok suu Israelnaɗi.

⁵ «Aŋ lay ni wi dlara Joab landa egenda, goryoŋ Seruyana, dlara nam laɗ eg suu ŋgolo suu mba' suu may suu fok suu asgaa suu Israelnana, eg Abner, ma goŋ Nerna, u Amassa, ma goŋ Yeterna. Nam casi kiyo, vo busuna ki hu li ma heɓpa ka duk suunana, ko hu li ma duuna na. Nam tin busu ma duu namma eg gandi mam ma hurumma, eg tuɓuru ma semma lay.

⁶ Aŋ li ka u yal maŋŋa, hin a yam mbuɗ ki haɓpa kal ga hu zulla u heɓpaɗi.

⁷ Kay goryoŋ Barzila, ma Galaadna, ni aŋ golosi ka jiviya, asi li ni duk suu ti vo varaŋ kay tabul maŋgana kay asi van u furira hu li ma an pii ki ko wayaŋŋa Absalomma may.

⁸ Gola sa ma hiniŋŋa ka egeŋ na tokŋi Simey, goŋ Gerana, ma ka hu dee suu vi Benjaminna hu Bahurim. Hu li ma an col a tuɗ ki hu Mahanaimma ni nam panan cocoo. Nam tuɗ ga ta ta ŋgafan ay ki fun lum ma Yurdanna, na may an suurum u Yawe ana, An ka caŋ u ŋgewɗi.

⁹ Cemi wandara aŋ hinim ɦawa bay gam daŋgay oloɗi, kay aŋ ni sa ma wi dlara cocona. Aŋ hin wi dlara aŋ a lamba egemba. Aŋ hin gam yamba haɓpa ki ga duk busuna hu lina vi suu miɗina.»

Salomon mbuɗ ki mulna. Miɗ ma David miɗna

¹⁰ David buu gaa duk somoyomwa. Asi pammi hu ɦoŋzi ma yam ana Ҥoŋzi Davidna.

¹¹ David li basara hu mulla ni dok-fiɗi. Nam ti mulla kay Yuda hu Hebron basara kiɗisiya. Ti mulla kay Israel ni basara dok-hindi yam hindi may.

¹² Goromma Salomon kak kay mulla hu dlamba mulla vi bum David. Mul mamba kak saɓak cocoo.

Salomon ci Adoniya u suu ŋgolo mam suu kay ceremma kiyo

¹³ Adoniya ma goŋ Hagitna mbay eg Batseba, su Salomon. Ndaɗ joɓom ana, «Mbara nam mbay egeɗ na ni ɦawa ko su?» Nam hoŋoɗ dira ana, «Ҥawaa.»

¹⁴ Nam hin daɗ ana, «Boy ka kon na nde a daku.» Ndaɗ hin dam ana, «Njaɗ aya.»

¹⁵ Ndak wi lay ana mulla ginni manda, suu Israelna halaŋ ay ki toki ni unu ana anni mulna, mulla hin suɗ ki konu, tuɗ ki ni vi wayanna nam faɗ na ni u minda vi Yawera daŋ may.

¹⁶ Cemi ni joɓ manda ka egekŋi na dew daŋ. Ndak hin bay lan dla ndaɗta kiɗi. Ndaɗ hin dam ana, «Njaɗ aya.»

¹⁷ Nam hoŋ daɗ ana, «An dak ha wanna. Salomon ka gak vunuk kiɗi mayna, ndak tuɗ dam ana nam ɦan Abisag, goora Sunemba, a caanda an cenekŋi ceniya.»

¹⁸ Batseba hoŋom dira ana, «Jiviya, an hin tuɗ cuɗuŋ dlaaŋ ndaɗta ki maŋ mulna.»

¹⁹ Batseba tuɗ vi mulna Salomon a ɓakam kay dlara vi Adoniyara. Mulna col ay ki kolo ŋgafaɗ aya, mba goɓ ga fokoɗu. Ŋgoo dagan nam hin kak hu dlam mamba mulla, tin dlamba daŋga dew maŋ su mulna may. Ndaɗ kak kay bikim ma njufna na.

²⁰ Ndaɗ dam ana, «An min joɓoŋ goo joɓ taa na nde ni aŋ silin kiɗi.» Mulna hoŋoɗ dira ana, «Joɓ aya, sunu, an ka silik kiɗi.»

²¹ Ndaɗ dam ana, «Na ni sa ndak a ɦal Abisag, goora Sunemba, maŋ wayaŋŋa Adoniya a cara su?»

²² Mulna Salomon hoŋ dira maŋ sum ana, «Ndak min a joɓ Abisag, goora Sunemba, maŋ Adoniya a cara ni kay mege? Nam ni wayan ma ŋgolna may ni ndak joɓom ta mulla na gawɗi su? Mam may, maŋ mul ma li ɓivunna Abiyatar may, maŋ Joab ma goŋ Seruyana gaw mayɗi su?»

²³ Mulna Salomon su tam ki u Yawe ana, «Ko Lona gan daŋgayna, li ni an li dla ndaɗta ka kiɗi, Adoniya joɓmi kay iiri mamba taɗta.

²⁴ Cemi ni u sem Yawe ma kakan kay dlamba mulla vi bun Davidna, nam gan ki duk ndum suu mulina. Cemi ni gak gak Adoniya namma hin miɗ kiyo.»

²⁵ Mulna Salomon sun Benaya ma goŋ Yoyadana kay Adoniya. Nam cam kiyo.

Salomon dik Abiyatar kiyo

²⁶ Maŋ mul ma li ɓivunna Abiyatar ni mulna dam ana, «Aŋ hoŋ ki vo hu mbas maŋga hu Anatot kay aŋ ginni sa ma a ci kina, may cemi ni an ka caŋ kiɗi kay ana aŋ zii Zanduk Bu Suuna, Yawera, fok bun David aŋ las coco u nam hu dlara nam fi lassa huruɗta.»

²⁷ Salomon dik mul ma li ɓivunna, Abiyatar, ki hu sun mamba li ɓivunna fok Yawera ni a faɗ ki ni vun boy ma Yawe dam kay ziŋ Helina ay hu Silo wanna.

Salomon ci Joab kiyo

²⁸ Boy namma mba tew ki eg Joab (Joab taɓi ni u Adoniya hol, ka u Absalombi). Joab tuɗ ŋgay tam ki hu mbutluɓma vi Yawe, kaw kom eg mek ma kay givin ma togollana.

²⁹ Asi mba di mulna Salomon ana, «Joab tuɗ ŋgay tam ha ki hu zira vi Yawe Lonara, na ni ha coli keŋ givin ma togolla.» Salomon sun Benaya ma goŋ Yoyadana dam ana, «Tuɗa, tuɗ bowomu.»

³⁰ Benaya tuɗ kal hu mbutlub ma vi Yawena, di Joab ana, «Mulna di ay ana aŋ kal ay kiyo.» Joab hin di ana, «Ҥawaa, an miɗ ni ga tani.» Benaya tuɗ di boy namma maŋ mulna ko ndal Joab ɓakka na may.

³¹ Mulna hoŋom dira ana, «Aŋ tuɗ lam ko nam dira na may. Suɗun ki u suu vi bunna ko busu suuna ma nam voom ki kaŋga bay asi li dla corana.

³² Yawe hoŋom busuɗummi kay duu duu yamu, nam sa ma ci suu ɗegee suu mbana kina. Nam casi ki u ŋgewna bay bun David wi duku. Ni Abner ma goŋ Nerna sa ma ŋgol asgaa suu Israelna u Amasa ma goŋ Yeterna sa ma ŋgol asgaa suu Yudana.

³³ Ko busuusi hoŋ ha ni kay Joab u njafam halaŋ ha fok na gak gak. May kay David u njafam halaŋ u dlam mamba mulla lay, jivira ha kasi fok Yawe ni na gak gak a fafaɗta.»

³⁴ Benaya, ma goŋ Yeyadana, ful ha kolo tuɗ vi Joab, cam kiyo. Joab asi pammi vo hu ziim ŋgoo bagi hu fulla.

³⁵ Mulna varak Benayada balam Joab a ŋgol asgaana, varak Sadok balam Abiyatar a mul ma li ɓivunna may.

Ŋgel vunna u miɗ ma vi Simena

³⁶ Mulna yi Simey ha dam ana, «Tuɗ min ziiŋ vo hu ɦoŋzi ma Yerusalemma kak huwa, tin seŋ ki keŋ hu zi ma daŋgi.

³⁷ Lini seŋ calaɗ ii hakara ki a tuɗ ki hu zi ma daŋi ni aŋ hin miɗ ni hu faɗ ndaɗta gaw may. Busuɗuŋ hin hoŋŋi kay duu duu yaŋu.»

³⁸ Simey hoŋ di mulna ana, «Boy namma ni jiviya ko sa ŋgol manna mulna damba na. Saaŋ ma sunda hin li ko ndal aŋ dira na.» Simey basaɗ ŋgol hu ɦoŋzi ma Yerusalemma.

³⁹ Ŋgoo dagan basara na hindi ni mborɓii suu vi Simena mba' pii tuɗ ki vi Akis ma goŋ Maakana, ni mul ma Gatna. Asi tuɗ di Simey ana, «Suu sun maŋsina ha ki hu Gat.»

⁴⁰ Simey gan kor mamba ful tuɗ hu Gat vi Akis a hal suu mam suu sunda. Sime tuɗ ni sem dew ɦawaa a hal suu mam suu sunda ay hu Gatta hol.

⁴¹ Asi tuɗ di boy namma ki maŋ mulna Salomon ana «Simey col ha Yerusalem tuɗ ay Gat, cemi ni nam hoŋ ay vowa.»

⁴² Mulna yi Simey ay dam ana, «An suuruŋ ki fok Yawe daŋ ka ana, hu buu ma aŋ kal ki hu ɦoŋzi ma Yerusalemma wa ni aŋ miɗa naɗi su? Aŋ hoŋon dira ana boy ma an damma ni jivi daŋ may naɗi su?

⁴³ Aŋ hin li ka u suura suu ki fok Yaweraɗi ni kay mege? Aŋ hum gaɗta an daŋgara kaɗi ni amege?»

⁴⁴ Mulna hin di Simey ana, «Aŋ wi lay huruŋ ka takaŋ dla cora aŋ laɗ eg bun Davidta. Yawe hoŋoŋ cooŋ ndaɗta ni kay duu duu yaŋu.

⁴⁵ May ni mulna Salomon paɗ vunna hin li kamu, dlamba mulla vi David hin li tini gak gak fok Yawe.»

⁴⁶ Mulna ɦal voɗta maŋ Benaya ma goŋ Yoyadana, nam kal ki vi Simey, cam kiyo. Ni kay ndaɗta mulla hin ki hu duk ko Salomon a fafaɗta.