1 MULINA 19 - Boy Lonana

Eli tuɗ kay ɦinira Horebba

¹ Mulna Akab cuɗ dlara Eli laɗta ki maŋ caamba Jezabel halaŋ halaŋ, cira nam ci suu joɓpa kira bel bel.

² Jezabel gi sana a vun sunda eg Eli dam ana, «Vin maɗii ko wanda na aŋ li ka iiri tuwa, an caŋ ka ki ko ndal aŋ ci suu joɓpa ki wandara naɗi ni logina lan cora egenu.»

³ Eli wi na ni, col kolo pii ki a suɗ tam kira. Nam mba tew hu Berseba ni hu mbassa Yudara hin saam ma sunda ka huwa.

⁴ Nam tamba tin irim ŋgoo bagi hu fulla, basa kay tuɗta. Nam tuɗ kak kaŋga u ŋgus guna ki vay dam na dew. Nam joɓmi miɗna gaw di ana, «Yawe an ka ndak oloɗi, tlan iiri manda kay an ka su somoyonɗi.»

⁵ Nam hin buu kaŋga lagaɗ senna u ŋgus gu namma. Gola ni sa sunda huulona mba ŋgenem dam ana, «Col kolo, ti funa.»

⁶ Nam gol irim kay yam na ni komdjoɗina zali kay ɦinira ku cocora tini ta. Gegelna u yona hu tini ta may. Nam ti may, ci may, hoŋ buu kaŋgaa.

⁷ Sa sunda vi Yawe hoŋ ay ŋgenem dam ana, «Col kolo, ti funa kay voɗta fokoŋ a tuɗta ni fiyek cocoo.»

⁸ Eli col kolo ti funa, ci yona may. Nam fi saɓakŋa coco u ti namma. Nam tuɗ ta ta buuna dok-fiɗi ta ta tuɗ tew ki kay ɦinira vi Lonara hu Horeb.

Lona hoŋ ɦal ɦiŋga daŋga maŋ Eli olo

⁹ Nam mba tew hu Horeb may ni, kal hu zul ɦinira buu huwa. Yawe mba dam ana, «Aŋ ki tani ni kay mege, Eli?»

¹⁰ Nam hoŋom dira ana, «Yawe Lo ma Saɓakŋa, an hurun miniŋ cocoo. An ka ndak a siɓ dlara suu Israelna laɗtaɗi. Asi bus galamba vaɗ u aŋga kiyo. Asi hawaɗ givin ma togolla ta laŋ ɓivunna hura ki lay. Asi ci suu maŋ suu jokoŋ vunuŋŋa ki bel bel, maa ay ni an dew. Cemi asi hal a baan iiri manda ki lay.»

¹¹ Yawe dam ana, «Kal ay kiyo. Mbay col ki kolo kay ɦinira fok Yawe. Gol iriŋu, Yawe hin jaka.» Babaa ma ŋgolna mbay coco fok Yawe, wak ɦinira ki lay, to ɦinira ay ki ga coco fok Yawe. Na may Yawe ay ka duk babaa namma gawɗi, ŋgoo babaana ni ndaŋgara ŋgeŋeɗ cocoo, Yawe ay ka duk ŋgeŋeɗta ndaŋgara ŋgeŋeɗ ndaɗtaɗi lay.

¹² Ŋgoo ŋgeŋeɗta ndaŋgara ŋgeŋeɗta ni kura kal ay kiyo. Yawe ay ka duk ku ndaɗtaɗi lay. Ŋgoo ku ndaɗta ni soora soo ay na nde u semeɗna.

¹³ Hu li ma Eli hum soo ndaɗta na ni, baa yam ki u baraw mamma, nam kal ay ki mba col ki fun zul ɦinira, della ɓakam ay ana, «Aŋ mba ki tani ni kay mege, Eli?»

¹⁴ Nam hoŋ dira ana, «Yawe, Lo ma Saɓakŋa, an hurun miniŋ cocoo, an ka ndak a siɓ dlara suu Israelna laɗtaɗi. Asi bus Galamba vaɗ u aŋga kiyo. Asi hawaɗ givin ma togolla ta laŋ ɓivunna hura ki lay. Asi ci suu maŋ suu jokoŋ vunuŋŋa ki bel bel, maa ay ni an dew. Cemi asi hal a baan iiri manda ki lay.»

¹⁵ Yawe hin dam ana, «Tuɗa, tli voɗta tuɗ iriŋ hu ŋgoo bagira Damassa. Hu li ma aŋ tew ki wa ni, aŋ hin fuu Hazael a mul ma Sirina.

¹⁶ Aŋ hin jak fuu Jehu ma goŋŋimsina a mul ma Israelna. Aŋ hin fuu Elise ma goŋ Safat Abel-Maholana a sa ma jok vun Lona kay balam seŋ may.

¹⁷ Suu may suu suɗ ay ki ko ɓak ma vi Hazaelna, Jehu hin casi ki u ŋgewna. Suu suɗ ay ki ko ŋgew ma vi Jehuna, Elise hin casi ki may.

¹⁸ Na may an hin hin u suuna hu mbassa Israella ni na buɓ buɓ kiɗisiya, ni suu may suu goɓ vogosi ka ga fok Baalɗina, suu ŋgaf vunusi ka u nambi layna.»

Elise mbuɗ a sa ma jok vun Lona balam Eli

¹⁹ Nam tuɗ wanni, tuɗ fi Elise ma goŋ Safatna horoka. U mbutlugi suu zumma fun tasi cuɓ cuɓ doogo yam mba'. Elise zum u suu a doogo yam mbarana ni u tamba gaw. Eli tuɗ ha keŋem na tokŋi, cukum baraw mamma ha kam na gaw.

²⁰ Elise hin mbutlina ha ta ni, liŋ ay u Eli dam ana, «Hinin an tuɗ gi deɓ ay maŋ gi bun u sun si si ni, an hin tuɗ uŋ may.» Eli dam ana, «Aŋ ndak a hoŋ li sun maŋgaɗi su, an ay egeŋŋi daŋ boy ha su?»

²¹ Elise hoŋ dagan di va kaɗi, tuɗ yow mbutli suu mba' suu nam ay li sunda u asina, ɦasi ki a li ɓivunna. Tliw mbutli asina, gu ma kel mbutlina namma nam zalasi tliwi ki ni u nam tok, ɦal tliwna ki maŋ suu mamsina. Asi komomu. Nam hin cuɗ u Eli, kal fokom a lam sunda may.