1 MULINA 18 - Boy Lonana

Ɓivun ma lam kay hinira Karmellana

¹ Ŋgoo dagan buuna ŋgolo, basara li ki na hindi lona ka siɗira, Yawe mba tak tam ii Eli dam ana, «Tuɗ tak taŋ ki ii Akab. An min a si mbona ay ga kay ndaŋgara.»

² Eli gi tam a tuɗ tak tam ki ii Akabpa may. Mayra ka li hu Samari ŋgol cocoo.

³ Akab yi Obadiya, sa ŋgol ma vo vi mulnana aya. Obadiya li ndaa Yawe cocoo.

⁴ Hu li ma Jezabel ci suu jok vun Lona kina ni Obadiya yow suu jok vun Lona kis ŋgayasi kiyo, ɓorowosi irisi ki dok-vadl dok-vadl hu zul ɦinira, ɦasi funa may, yona may.

⁵ Akab di Obadiya ana, «Tuɗ poy hu mbassa gol huu goloŋiina ki halaŋ halaŋ, lini aŋ fi usu ma ŋgolom a yoorina ti hu kalage. Ay ndak a ŋgom kulumina u koro Makkana iiri kalage. Ni yoori may suu taa hin hin iiri ɦiwɗi su?»

⁶ Asi ɓorow mbassa ki kosiya. Akab col vay dam dew, tin irim keŋ dew may. Obadiya tin irim vay dam hu voɗta daŋga may.

⁷ Hu li ma Abadiya tuɗ ha voɗ na ni, Eli ŋgafam ay voɗo. Obadiya wam may. Nam goɓ kaŋga u vun givim di ana, «Ni aŋ sa ŋgol manna, Eliɗi, su?»

⁸ Nam hoŋom dira ana, «Ni anu. Tuɗ di mul maŋŋa ana, Eli ka tani.»

⁹ Obadiya hoŋ dira ana, «An li dla co me aŋ a ɦal saaŋ ma sunda ki fun maɗna nage? An tuɗ ha ki hu duk ko Akab ni nam a can kiraɗi su?

¹⁰ A gasira fok Yawe, Looŋŋa, ni mbassa hin ki dew bay mulna halaŋ ay ki huruɗ kaɗi. Suu di ana aŋ ka varasi taniɗina ni nam suu mul ndaɗta ha ki ni suuriya.

¹¹ Cemi ni aŋ hin dan ana, Tuɗ di mul maŋŋa ana, Eli ka tani?

¹² Hu li ma an tuɗ hiniŋ ka wa Musukka vi Yawera tlaŋ ki wa, an ka wi li ma aŋ tuɗ huna oloɗi lay, an hin tuɗ di Akab ha ki ana aŋ ka tani may, nam mba faŋ kaɗi ni, nam hin can ki ni anu. Doli ɗini saaŋ ma sunda li ndaa Yawe ay ni u zoŋ tam day.

¹³ Asi cuɗuŋ dla mayra saaŋ ma sunda laɗ hu li ma Jezabel ci suu jok vun Yawena kira kaɗi su? An ŋgay suu jok vun Yawe ki na kis, ɓorowosi irisi ki dok-vadl dok-vadl hu zul ɦinira. An ɦasi funa may, yona may.

¹⁴ Cemi ni aŋ hin dan ana, tuɗ di mul maŋŋa ana Eli ka tani. Na ni nam hin can kiyo.»

¹⁵ Eli dam ana, «A gasira fok Yawe ma Saɓakŋa Kom Belna, ma an ka sunum, cemi wanna karam gak gak, an min tak tan ki ii Akab.»

Eli ŋgaf Akab

¹⁶ Obadiya tuɗ a ŋgaf Akabpa may. Nam hin damu, Akab tuɗ a ŋgaf u Elira may.

¹⁷ Hu li ma Akab wi Eli na ni, nam dam ana, «Ni aŋ ma mbaa wihawra ay kay suu Israelnana ɗaŋ su?»

¹⁸ Eli hoŋom dira ana, «An mbaa wihawra kay suu Israelna ni ka anɗi, ni aŋ taŋga u suu vi buŋŋa. Agi noy gaɗta vi Yawera kiyo. Aŋ tin iriŋ ki a goɓmi Baal.

¹⁹ Cem wanda ni aŋ tokon suu Israelna ay egen ga u ɦinira Karmella tani halaŋ halaŋ. U suu joɓpa suu vi Baal suu 450 may u suu joɓ suu vi Astarte suu 400 na may, suu ka ti kay tabulla vi Jezabelna.»

Eli u suu joɓpa suu vi Baalna kolo kay ɦinira Karmella

²⁰ Akab sun kay suu Israelna halaŋ halaŋ. Tok suu jok vun Lona halaŋ kolo kay ɦinira Karmella.

²¹ Eli ɦuɗ tam ay eg suu halaŋŋa dasi ana, «Agi hin hinigi dlara yowoɗ kogi na mba' mbara ki ni saɓa tuge? Lini Yawe a Lona ni namu ni vagi um may. Lini Baal a Lona ni namu ni vagi um gaw may.» May suu Israelna sa ma hoŋom di na dew kaɗi.

²² Eli di suu Israelna ana, «An dew ni a sa ma jok vun Lona ma vi Yawena. Suu joɓpa suu vi Baalna ni 450.

²³ Agi halammi bolo mbutlugina ay na mba'. Asi man maa dew ni, ŋgaɗam may, gam kay guna, may cuk ku uɗɗi kama. An lay hin li manna ni na may. An hin gam kolo kay guna, may an ka cuk ku uɗɗi may.

²⁴ Agi hin yi sem loogina. An may ni hin yi ni sem Yawe may. Lo ma hoŋ dira ay u kurana ni Lona gasi.» Suu Israelna halaŋ hoŋ dira ana, «Boy namma ni jiviya.»

²⁵ Eli di suu joɓ suu vi Baalna ana, «Managi bolo mbutl dew ni gagijaŋ sunda jew ni agiya, kay agi ni suu bolowna. Yagi sem loogina may, cukugi ku uɗɗi kama.»

²⁶ Asi vi bolo mbutl ma ɦasinana, gijaŋ sunda. Asi yi sem Baal maɗii day day tew faaliya, di ana, Baal humumi aya. May sa ka hum delɗi lay, ka wi saɗi lay. Asi luu joŋŋa fun givin ma togolla ma asi minimma lay.

²⁷ Tew ki faali may ni, Eli ka panasi di ana, «Oorogi ugi kolo eŋe, nammi lona, nam u sunda kam coco may ni, li ka voɗi kalage. Ɗowba nam li buuri sen kalage. Nam hin dliɗ ay ki tuɗi su?»

²⁸ Asi oo usi kolo cocoo, u gaɗ masira ni suu daŋŋa dak tasi u ŋgewina lay u saɓagina lay, tasi mbuɗ ki ni busu bel bel.

²⁹ Faalira jak ki may ni, asi gijaŋ joɓa may, ta ta tew hu li ma asi a taa tlena, lay ni va li ka na ndeɗi, ka hum del vaɗi lay, sa ka hoŋ diɗi lay.

³⁰ Eli di suu Israelna ana, «Ҥuɗugi tagi ay na tok tok egenu.» Suuna halaŋ ɦuɗ tasi ay egemu. Nam hoŋ min givin ma togolla vi Yawe ma suuna hawamma ki kaŋgana.

³¹ Nam yow ɦinira na doogo yam mba' u ndum dee suu vi Yakobma halaŋ, ni suu Yawe dasi boyna ka masi ana, «Segi hin mbuɗ ki ana Israelna.»

³² U ɦini ndaɗta Eli min givin ma togolla maŋ Yawe. Nam vek zulla ŋguyuɗ ki kay givin ma togolla, uɗ kaŋga ii a sel yona litir va ma dok-hindi.

³³ Nam nja guna kolo kayami, ŋgaɗ bolo mbutlna gam ha kolo kayam hu may.

³⁴ Nam di ana, «Go mbona ay u gegelina fiɗi, mbay voom kay li ma ŋgal ɓivunna kay guna.» Nam hin di olo ana, «Go ay hu dew olo.» Asi voom kayam a mbara hu olo. Nam di ana, «Go ay a hindira hu olo.» Asi vo ay a hindira hu olo.

³⁵ Mbona gi ki baɗta kay li ma ŋgal ɓivunna, oy zulla ŋguy kay givin ma togollara kiyo.

³⁶ Tew hu li ma taa tlena a ɦalla may, sa ma jok vun Lona Eli ɦuɗ tam ay di ana, «Yawe, Loŋ Abrahamma, Loŋ Isaakŋa, Lo ma vi suu Israelna, li dlara asi wi ki karam ana aŋŋi Lona daŋ mayra anni saaŋ ma sunuŋŋa an li dlara ni u boy maŋŋa.

³⁷ Hoŋon dira aya, Yawe, honoŋ dira, a suuna halaŋ wi ki ana aŋ Yawe ni Lona daŋ may, aŋ hoŋ huu suu maŋsina ay egeŋ ni aŋu.»

³⁸ Kura vi Yawera ndi ay kaŋgaa, ŋgal li ma ŋgal ɓivunna ki u tlesuu ɓivun suu gi kolo kamma halaŋ, guna u ɦinira, gugumma u yo ma vooy kaŋga hu zulla ndaɗ soom ki halaŋ.

³⁹ Suuna halaŋ wi na ni, goɓ ki kaŋga u vun givisi halaŋ halaŋ di ana, «Yawe ni Lona, Yawe ni Lona.»

⁴⁰ Eli dasi ana, «Yowogi suu joɓ suu vi Baalna hin maa dew a pii kiɗi.» Asi yowosi halaŋ. Eli tuɗusi ha ki kaŋga fun lumma Kison, ŋgaɗasi ki halaŋ halaŋ.

Lona gijaŋ siya

⁴¹ Eli di Akab ana, «Ɗiŋ koloo, tuɗ tiya, ci lay, kay an hum del lona ka ɦissa.»

⁴² Akab ɗiŋ kolo a ti may, ci mayra, ni Eli ka ki ɗiŋi kolo kay ɦinira Karmella may, cok yam kaŋga duk karam cen Lona may.

⁴³ Nam di saam ma sunda ana, «Ɗiŋ kolo gol iriŋ ha kay mbo lum ŋgolna na gige.» Nam ɗiŋ kolo gol ay hin di ana, «Va kaɗi.» Eli hoŋ dam ana, gol aya, gol ayara yam na kiɗisiya.

⁴⁴ A yamba kiɗisiyara ni, saam ma sunda di ana, «Gola goo ɗugulla ay kay lum ŋgolna na ŋgoloɗ ko ndal duk kona na ga.» Eli hin dam ana, «Ɗiŋ kolo tuɗ di Akab ana, Gan kulum maŋŋa, fula, ka lona faŋ ki voɗɗi.»

⁴⁵ Lona jok tinda ay ni joki na ɗow ɗow. Semeɗna paɗ ay gaw, lona si mbona ŋgol cocoo. Akab ful hu pus pus mamma, tuɗ vo hu Jizreel.

⁴⁶ Ko Yawe Lona ka baari kay Eli. Nam min tam mboɗ liŋŋa fok Akab tuɗ tewem ki ta ta hu Jizreel.