1 MULINA 17 - Boy Lonana

Eli kak hu Kerit u Sarepta hu li ma lona ka siɗina

¹ Eli sa ma ay hu ɦoŋzi ma Tisbena hu mbassa Galaadta mba di mulna Akab ana, «U sem Yawe, Lona vi suu Israelna, ma ka iiri tew tewna, ma an ka sunum wanna, basara hin fok cara ni lo ka siɗi, mbaɗagi ka gi kay ndaŋgaraɗi lay, bay an di an na baɗi.»

² Yawe hin di Eli ana,

³ «Tuɗa, hin li ma aŋ hu wanna, tuɗ iriŋ ha u maɗiina na. Tuɗ ŋgay taŋ ha ki fun mbo ma Keritna, ii u maɗiina vi lum ma Yurdanna na.

⁴ Ni aŋ ndak a ci yona hu lum namma. An hin di gagawna nam hin ɦaŋ tina ha hu li namma.»

⁵ Nam tuɗ may, li ko ndal Yawe damba na may. Nam tuɗ kak ha ki duk bubura fun mbo ma Keritna ii u maɗiina vi lumma Yurdanna na.

⁶ Gagawna mbaaram funa ay may, tliwna may. Maɗii ni funa u tliwna may, fiɗigi ni na lay. Nam ci ni yo lumma may.

⁷ Buu na ca ni mbo goloŋ namma so kiyo kay ana lo ka siɗi.

Eli vo vi ca dora Sareptara

⁸ Yawe mbay egem dam ana,

⁹ «Col kolo, tuɗ hu ɦoŋzi ma Sareptana, ni hu mbassa Sidonda. Aŋ tuɗ kak ha ki huwa. An di cara donora dew ha huwa ni ndaɗ hin ɦaŋ tina.»

¹⁰ Nam col kolo gi tam a tuɗ Sarepta, mba tew vun grekŋa hu ɦoŋzina may ni fi cara huwa. Cara donora mba a njun guna. Nam yaɗ daɗ ana, «An ceneku tuɗ goon yo ay hu gegel makŋa na nde an ciya.»

¹¹ Ndaɗ tuɗ a halam yona may ni, nam yaɗ ha dagan daɗ ana, «An ceneku halan u fu ma ay kok hu na nde may.»

¹² Ndaɗ hoŋom dira ana, «U sem Yawe, Looŋŋa, komnjoɗi ha ka konɗi. U fuɗta hin ha hu gegelna ni duk kon na dew, mbulna hu gegelna ni na ew daŋ may. An njun gin guna wa ni, an tuɗ li tle asina tami u goronna ti ni, juɓumi ni miɗimiya.»

¹³ Eli daɗ ana, «Li ndaaɗi. Tuɗ voo, li ko ndak dira na. Na may u tlesuu kok ew asina ni ndak yeresen maa ay ki jew tu na nde, ɦanna ay tani. Ndak hin li makŋa u goorokŋa dagan tuwa,

¹⁴ kay Yawe, Lona vi suu Israelna, di anaba, Gegel ma fuɗta ka daɓ kiɗi, vun gegel ma mbulna ka tuɗ kaŋgaɗi lay ta ta hu buu ma Yawe hin si mboom ay kay ndaŋgarana.»

¹⁵ Ndaɗ tuɗ voo, li ko ndal Eli daɗ hara na may. Ndaɗ ti u gooroɗu u suu maɗsina halaŋ u Eli lay buuna ŋgolo.

¹⁶ Gegel ma fuɗta ka daɓ kiɗi. Vun gegel ma mbulna ka tuɗ kaŋgaɗi lay ko ndal boy ma Yawe dam ay ki fun Elina na may.

Eli col goŋ cara donora ki kolo iiriya

¹⁷ Gola ni dlara mbay ŋgoo boy namma daganda. Cara dono ta malaŋ zina gooroɗna ndi tuguɗiira, musukum hin ka ŋgol oloɗi.

¹⁸ Cara di Eli ana, «Va ma ndolon u aŋŋa ni mege? Aŋ mbay varan a gan u coonda ki can goona ki wanni kay mege?»

¹⁹ Nam hoŋoɗ dira ana, «Ҥan gorokŋa aya.» Nam vam ko cara kemmi, tuɗum hu zira ha kay ndaraɗta kolora hu li ma nam buu huna, buurum kay lay mamma.

²⁰ Nam cen Yawe di ana, «Yawe Loonna, aŋ min li cora eg cara an mba cuk vo varaɗta lay su? Aŋ tuɗ ta ta caɗ gooroɗna ki su?»

²¹ Eli buu kay goona yam hindi cen Lona di ana, «Ҥii, Yawe, Loonna, hoŋ musuk gogoona ay hurum na hoŋge.»

²² Yawe hum cenda vi Eli. Musuk gogoona hoŋ ay hurumu. Nam hoŋ ki iiriya.

²³ Eli tli gogoona hoŋ ay ki ga u nam hu zira, mba ɦam maŋ sumu. Eli daɗ ana, «Gola goorokŋa ka iiriya.»

²⁴ Cara di Eli ana, «Na daŋ may cemi ni an wi ki wa ana aŋŋi sa ma vi Lonna. Boy ma vi Yawena ka funuŋŋi nam daŋ may.»