1 MULINA 14 - Boy Lonana

Dlara kay mulla vi Jeroboam ma jewna tuwa

¹ Hu coki ndaɗta ni Abiya ma goŋ Jeroboamma ndi tuguɗiira.

² Jeroboam di caamba ana, «Jok tak ki zeɗ ka sa wi ana ndakŋi caandaraɗi. Tuɗ hu Silo. Sa ma jok vun Lona, Ahiya, ka cuki ni huwa. Nammi sa ma dan ana an hin mbuɗ a mul ma vi suu Israelnana.

³ Ndak hin yow mappana kok na doogo, yow tlesuu puura may, tli gegel ma mbul yumma kak dew may, tuɗ ha egemu. Nam hin dak dlara li gogoona wanda ay kiyo.»

⁴ Caŋ Jeroboamba li ko ndaɗta na may, ndaɗ col kolo tuɗ hu Silo. Ndaɗ tuɗ tew hu ziŋ Ahiya sa ma jok vun Lona may ni, nam irim ka cemek oloɗi lay, ka wiɗi lay, kay nam mbuɗ ki maa cocoo.

⁵ Yawe di Ahiya ha ki fok jew ana, «Gola caŋ Jeroboamba ay ka hu voɗta a mbay egeŋ a hal u boyna, kay goroɗ ma ka tuguɗiirana aŋ hin ɓakaɗ ni ko ndal wandara na, hu li ma ndaɗ mba egeŋ wa ni, ndaɗ hin mbuɗ taɗ ki ni a cara daŋga.»

⁶ Hu li ma Ahiya humuɗ seɗ ma tuɗ ay vun grekŋa a kal ay vona may ni, nam di ana, «Kal aya, caŋ Jeroboamba. Ndak min a mbuɗ tak ki a cara daŋga ni kay mege? An ka u boy ma eŋ cocona funun a dakŋara.

⁷ Ndak tuɗ di Jeroboam ana, Yawe, Lona vi suu Israelna, di ana, An tlaŋ ki kolo duk suu Israelna. An kakaŋ a mulna kay suu mansina suu Israelna.

⁸ An ɓaɗ mulla ay ki ko suu vi Davidna, ɦaŋga ki maŋu, na may aŋ li ka ko saan ma sunda David ma hum u gaɗ manda jivi u hurum halaŋŋa naɗi. Nam li ni dlara irin jivira doy hol.

⁹ Aŋ li dlara ki ni co su suu may suu kak ay fokoŋ jewna halaŋ halaŋ. Aŋ tuɗ ta ta min loogi suu daŋŋa kay taŋu. Yoo fuli tlena a duu u anda. An tanda may ni aŋ zuɗun ha ki ŋgoroŋ dagan na day.

¹⁰ «Kay ndaɗta an min mbaa dlara yoora kay suu vi Jeroboamma. An hin ci njufii suu taraŋ vi Jeroboamma ki halaŋ halaŋ. Mborɓiina u gor vuɗta lay, ki duk suu Israelna halaŋ. An hin bulum njaf Jeroboam kiyo, ko ndal suuna tok sot zirgitna kira na.

¹¹ Suu vi Jeroboam suu hin miɗ hu ɦoŋzinana halaŋ diginina hin komosi ki ni asiya. Suu miɗ ha ki ŋgoo bagina layagina hin komosi ni asi may. Yawe ɓak na ni namu.

¹² «Lini ndaku ni, col kolo tuɗ voo. Hu li ma ndak hin tew ha vo hu ɦoŋzinana may ni, goona hin miɗ ni na gaw may.

¹³ Suu Israelna halaŋ hin lam hahawamu. Asi hin pam may. Kay nam dew duk suu vi Jeroboamma ni sa ma hin pam ga hu zullana. Nam duk suu vi Jeroboamma a sa ma jivina ni nam dew. Yawe Lona vi suu Israelna wammi nam hol.

¹⁴ «Yawe hin man mul ma bulum njaf suu vi Jeroboamma kina fok suu Israelna. Kay ndaɗta dlara cemira gaw ni hin li ni ana mege?

¹⁵ Yawe hin ci suu Israelna. Asi hin mbuɗ ɦulul kolo ko ndal cerewna gasi kolo duk mbona fun lummara na. Nam hin dik suu Israelna ki hu mbassa jivira nam ɦaɗ ka maŋ somoyosira. Nam hin njayasi ha ki ŋgoo lumma ŋgolna ii ma hiniŋŋa. Kay ana asi min fulina ma asi a goɓomma kay tasiya. Asi duu ni u Yawe.

¹⁶ Nam ɦasi ki ni kay dla cora Jeroboam laɗta. Nam cuk suu Israelna halaŋ ga hu sulukŋa.»

¹⁷ Caŋ Jeroboamba col kolo hoŋ ay voo. Ndaɗ mba tew hu ɦoŋzi ma Tirsana may hu li ma ndaɗ tew tok eg ziiɗna may ni, goroɗna miɗ may.

¹⁸ Asi pamu. Suu Israelna halaŋ lam hahawamu ko ndal boy ma Yawe dam ay fun saam ma jokom vunumma Ahiyara na.

Miɗ ma Jeroboam miɗna

¹⁹ Sunda daŋga Jeroboam laɗta duuna u tira ti mullara halaŋ ka ɓiiri hu magaara Sunda vi Muli suu Israelna. Asi njaɗ dla duu ma nam duuna u mulla nam taɗta huwa.

²⁰ Jeroboam ti mulla ni basara dok-mba' yam mba'. Nam buu ga eg somoyomu. Goromma Nabad varak balamam a mulna may.

Roboam mul ma Yudana

²¹ Roboam ma goŋ Salomonna mbuɗ a mulna hu Yuda. Roboam kak a mulna ni basaɗam tew ki ni dok-fiɗi yam dew. Nam ti mulla ni basara doogo-yam-kiɗisiya ni hu Yerusalem, ɦoŋzi ma Yawe manam ki duk ɦoŋzi ma daŋŋa duk njaf suu Israelna halaŋ tin sem huna. Sem su Raoboammi ana Naama. Ndaɗ ni goora Amonda.

²² Dee suu vi Yudana li dlara ka ii Yawe jiviɗira. Dla cora asi laɗ ndaɗta ɓalakam hurum egesiya, co su dlara somoyosi laɗ ay jewra.

²³ Asi min liisi ma mbuy kolona a li ɓivunna, col ɦinira ceɗi ta teteɗta fokosiya, min fulina tlesuu teteɗna kolo kay li mbuyna na zeɗ zeɗ, hu li ma ŋgusugina ɗufi hu cocona,

²⁴ suu li ɓivun zoŋga dukusi hu lay. Asi li dlara vi njaf suu ɦawana suu Yawe dikisi ki fok suu Israelnana.

²⁵ Hu basara vadlla hu li ma Roboam tli mullana ni Sisak mul ma Egiptena col duuna u suu Yerusalemma.

²⁶ Nam yow begera hu Ziŋ Yawera kiyo, u begera hu ziŋ mulnara ki lay. Nam yow tlena ki ni halaŋ halaŋ. Mbari ma cili u lorrana nam yowom ki lay. Ni mbari ma Salomon hinim kana.

²⁷ Mulna Roboam varak mbari kawi ma tlawna balam ma jew ma asi yowom kina. Nam ɦasi ko sa ma ŋgol suu liŋŋa ma ka juɓ fun ziŋ mulnana.

²⁸ Tew tew hu li ma mulna tuɗ kalafi hu Ziŋ Yawera ni, suu liŋŋa yow mbarina ha kosiya, hin hoŋom ay hu zira vi suu liŋŋa.

²⁹ Sunda daŋga Roboam laɗta halaŋ ka ɓiiri hu magaara Sunda vi Muli suu Yudanara.

³⁰ Duk ɦoŋ gi Roboam u Jeroboammi duuna ka tew tew.

³¹ Roboam buu ga u somoyomu. Asi pammi eg somoyom hu Ҥoŋzi Davidna. Sem sum ana Naama. Ndaɗ ni goora Amonda. Gooromma Abiyam varak balamam a mulna may.