1 MULINA 1 - Boy Lonana

MULNA DAVID MI Ɗ KIYO, SALOMON MBU Ɗ NI MULNA Mulna David mbuɗ ki maari

¹ Mulna David mbuɗ ki maari, basaɗam ki ŋgol cocoo. Asi boɗom barawna kam lay ni tam ka cikgi.

² Suu mam suu sunda dam ana, «Mariyaɗ ni asi hal go tamara jeŋi bay ŋgaf u sa njuf tura ay maŋ sa ŋgol manna mulna. Ndaɗ hin li sunda maŋ mulna. Ndaɗ hin mbuɗ ni ko caamba na. Agi hin buu ni eg tagiya, ni sa ŋgol manna mulna tam hin cika.»

³ Asi hal goo wayra jiv coco ɦayra hu mbassa Israella halaŋ. Asi fi ay ni Abisag, cara Sunemba. Asi mbaaraɗ ay maŋ mulna.

⁴ Goo ndaɗta jivi coco ɦay. Ndaɗ mbay egemmi a caamba ka sunum may. Na may ni mulna buu ka u ndaɗɗi.

Adoniya min a vi mul bumba kiyo

⁵ Adoniya ma goŋ Hagitna ŋga tam di ana, «An hin kak a mulna ni anu.» Nam tuɗ hal pus pus ma kulumina aya, yow kulumina ay may. Suu may suu tuɗ kay ceeremma dok-vadl may.

⁶ Ay u goorom day ni bum bayam ka ɦoy ana, «Aŋ a li dla ndaɗta na amege?» tuɗi. Nam jiv coco ɦay, sum vuɗum ka ni balam Absalom.

⁷ Nam vi vunummi u Joab ma goŋ Seruyana u mul ma li ɓivunna, Abiyatar may. Asi ni suu soom um hana.

⁸ May mul ma li ɓivunna, Sadok, Benaya ma goŋ Yoyadana, sa jok vun Lona, Natan, Simey, Rey u suu ŋgolo suu duuna vi David vunusi ka duk boy nammaɗi.

Natan u Batseba ki ni u Salomon

⁹ Adoniya li ɓivunna kay gogoyra Zoheletta u Timigiina, mbutli suu ɗorina u gor mbutli suu ɗorina, keŋ mbo ma Rogelna. Nam yi gorsem suu goryoŋ mulnana ay halaŋ, yi suu hu Yudana ay halaŋ may, ni suu ka li sunda maŋ mulnana.

¹⁰ May yi Natan, sa ma jok vun Lona, kaɗi. Benaya u suu juɓ u mulnana u wayamma, Salomon, nam yasi kaɗi may.

¹¹ Natan tuɗ di Batseba su Salomon ana, «Adoniya ma goŋ Hagitna mbuɗ ki mulna ni ndak hum kaɗi su? Cemi nam tli mulla vi sa ŋgol mayna David kiwa.

¹² Cemi ni ndak tuɗa, an min dak boyna haa, tuɗ suɗ tak kiyo, suɗ gorokŋa Salomon ki may.

¹³ Ndak tuɗ kal u mulna David dam ana, Aŋ sa ŋgol manna, mulna vi vunuŋ u caaŋga sunda ana gorokŋa Salomon hin kak a mulna balamanni namu ni ka aŋgi su? Nam hin kak ka kay dlamba mulla ni namu naɗi su? Cemi ni Adoniya hin mbuɗ ki a mulna ni kay mege?

¹⁴ Hu li ma ndak njaɗ u mulna tu nana ni an hin kal ha faɗ vun boyna kiyo.»

¹⁵ Batseba kal u mulna kalafi hu ziimba buuna kalafi vay dam dewra. Mulna ki maa cocoo. Abisag ta Sunemba ka sunummi ndaɗu.

¹⁶ Batseba gi yaɗ kaŋgaa, goɓ kaŋga fok mulna. Nam joɓoɗ ana, «Ndak min mege?»

¹⁷ Ndaɗ hoŋom dira ana, «Sa ŋgol manna, aŋ vi vunuŋ u caaŋga sunda fok Yawe, Looŋŋa, ana, goorokŋa, Salomon, hin kak ka mulna balamanni namu. Nammi sa ma hin kak ka kay dlamba mulla naɗi su?

¹⁸ Cemi ni Adoniya ki a mulna ni namu. Doli ɗini aŋ sa ŋgol manna mulna wi boy namma kaɗi lay.

¹⁹ Nam li ɓivunna u bolo mbutlugina u gor mbutli suu ɗorina u timigiina tlena ŋgol coco. Nam yi goryoŋ mulnana ha egem halaŋ halaŋ u mul ma li ɓivunna Abiyatar lay, sa ma ŋgol asgaana Joab lay, saaŋ ma sunda Salomon nam yam ka dukgi.

²⁰ Aŋ may ni sa ŋgol manna, suu Israelna halaŋ irisi ka cuki ni kaŋu, a aŋ takasi sa ma hin kak ka hu dlamba mulla vi sa ŋgol manna ŋgorom daganna.

²¹ Hu li ma sa ŋgol manna mulna hin buu ki kaŋga eg somoyomwa ni, an u gooronna Salomon asi hin lami ni ko suu dlara vasina na.»

²² Ndaɗ njaɗ u mulna na tu may ni sa ma jok vun Lona, Natan, kal ay usi may.

²³ Asi di mulna ana, «Gola sa ma jok vun Lona, Natan, mbawa.» Nam mba goɓ ga fok mulna, goɓ vogom ki ga duk ndaŋgara,

²⁴ hin di ana, «Sa ŋgol manna, mulna, aŋ li dla ndaɗta ha na ni aŋ daŋ may su? Adoniya hin ti mulla ka balamaŋŋi namu. Nam ni sa ma hin kak ka kay dlamba mullana ni na su?

²⁵ Kay cemi ni nam tuɗ ga fun mbo ma Rogelna, nam li ɓivunna u bolo mbutlugina, u gor mbutli suu ɗorina u timigiina lay, tlena ŋgol cocoo. Nam yi goryoŋ mulnana ha halaŋ. Suu ŋgol asgaana u mul ma li ɓivunna Abiyatar. Cemi ni asi ka ti may, ci may fokomu. Asi di ana, Gi deɓ maŋ mulna Adoniya.

²⁶ May an saaŋ ma sunda asi yan ka dukgi. Mul ma li ɓivunna Sadok asi yam kaɗi lay u Benaya ma goŋ Yoyadana u saaŋ ma sunda, Salomon.

²⁷ Dla ndaɗta li gasi ni u dira vi sa ŋgol manna mulna daŋ may su? Doli ɗini aŋ hin di boy namma ka maŋ saaŋ ma sunda ma hin kak ka hu dlamba mulla vi sa ŋgol manna mulnaraɗi gaw may.»

²⁸ Mulna David hoŋ dira ana, «Yangi Batseba aya.» Ndaɗ mbay fok mulna, mba col fokomu.

²⁹ Mulna su tam di ana, «U iirira vi Yawe, Lona ma buɗun ay ki hu dlara yoora, halaŋŋa,

³⁰ ko ndal an suruk u Yawe Lona vi suu Israelna, gorokŋa Salomon hin ti mulla ka balamanni namu. Nam hin kak ka kay dlam manda mulla balammi namu. Cemi ni gaw ni an hin li dla ndaɗta kiyo.»

³¹ Batseba gi yaɗ ga fok mulna, goɓom di ana, «Gi deɓpa ka daɓ kiɗira maŋ sa ŋgol manna, mulna David.»

Salomon mbuɗ mulna

³² Mulna di ana, «Yangi mul ma li ɓivunna Sadok u sa ma jok vun Lona Natan u Benaya ma goŋ Yoyadana aya.» Asi mbay fok mulna may.

³³ Nam dasi ana, «Yowogi suu sun suu vi sa ŋgol maginana fokogiya, tuɗ tlagi Salomon, goonna, kolo kay koro Makka manda. Agi tuɗum ga hu Gihon.

³⁴ Hu li namma mul ma li ɓivunna Sadok u sa ma jok vun Lona Natan fuurum u mbulna a mbuɗum ki mulna kay suu Israelna halaŋ. Agi hin bu tokolomma, sawalla kolo di ana, Gaŋdeɓe, mulna Salomon.

³⁵ Agi hin hoŋ ay u nam kolo kay ceeremu. Nam mba kak hu dlam manda mulla. Nammi sa ma hin ti mulla ka balamanna. Nammi sa ma an kakam a mulna kay suu Israelna u suu Yudana halaŋŋa.»

³⁶ Benaya ma goŋ Yoyadana hoŋ dira maŋ mulna ana, «Amin, Yawe, Lona, vi sa ŋgol manna mulna.

³⁷ Ko ndal Yawe ka u sa ŋgol manna mulnara na, nam hin li u Salomonni na may. Nam hin mbuɗum dlam mamba mulla ki ni jivi zeɗ sura vi sa ŋgol manna mulna Davidta olo.»

³⁸ Mul ma li ɓivunna, Sadok, sa ma jok vun Lona, Natan, Benaya, ma goŋ Yoyadana, u suu Keretina u suu Peletina tuɗ gaa. Asi tli Salomon kolo kay koro Makka vi bum, mulna Davidna. Asi tuɗum kaŋga hu Gihon.

³⁹ Mul ma li ɓivunna Sadok tli mek ma mbulna ay ki hu Mbutluɓma. Nam fuu Salomon u mbulna, mbuɗum ki mulna. Asi bu tokolomma. Suuna halaŋ tum soora. Sawalla ha kolo ana, «Gi deɓ maŋ mulna Salomon»

⁴⁰ Suuna halaŋ hoŋ ay kolo u namu. Suuna bu diffa may, furi coco may ta ta ndaŋgara lay mbuɗ geŋeɗ ki u sesiya.

⁴¹ Adoniya hum boy namma hu li ma kosi daɓ tina ki u banayammana may. Joab hum del tokolomma bu ni u tamba hin di ana, «Vunna soo ay vo hu zi ŋgolna na ni nanage?»

Salomon hin Adoniya bay camu

⁴² Vunum bay ndi kaŋga tu may ni Yonatan, ma goŋ Abiyatar, mul ma li ɓivunna, mba ni na gaw. Adoniya joɓom ana, «Mbay gige. Aŋŋi sa njufna, an saa ana boy ma jivi li ka funuŋ a diya.»

⁴³ Yonataŋ hoŋ dira maŋ Adoniya ana, «Boy ka konɗi. Sa ŋgol maygina mulna David ɦal mulla ha ki maŋ Salomonwa.

⁴⁴ Mulna sunum suuna umu, gi Sadok, mul ma li ɓivunna, Natan, sa ma jok vun Lona, Benaya, ma goŋ Yoyadana, u suu Keretina, suu Peletinna may. Asi tli Salomon kay koro Makkara vi mulnara.

⁴⁵ Mul ma li ɓivunna, Sadok u sa ma jok vun Lona, Natan, fuurum ki u mbulna may ay ni hu ɦoŋzi ma Gihonna. Asi tuɗ kolo hu ni u furira cocoo, ɦoŋzina halaŋ ka furiya. Agi hum ay ki ni vun ma ka soo namma.

⁴⁶ Salomon u tamba lay kak ki kay dlamba mullawa.

⁴⁷ Hu olo ni, suu li sunda vi mulna mba gi deɓpa maŋ sa ŋgol maygina, mulna David, di ana, Ko Looŋŋa tii sem Salomon ki suuŋ olo, nam mbuɗum dlam mamba mulla ŋgol a su maŋga. Mulna goɓ vogom ga kay lay mam ma buuna.

⁴⁸ Nam hin di ana, Gi deɓ maŋ Yawe, Lona vi suu Israelna, kay nam man sa ma kak kay dlam manda mulla karam wa, irin wam ki u tanda wa lay.»

⁴⁹ Suu Adoniya yasi ayna halaŋ mbuɗ ki ndaa cocoo. Gegelay ni tin irim siira a suɗ tamba ni na gaw gaw.

⁵⁰ Adoniya ko ndaa Salomon paɗ liŋŋa, tuɗ kaw kom eg mek ma kay givin ma togolla.

⁵¹ Asi tuɗ di Salomon ana, «Aŋ gola Adoniya mbuɗ ki ndaana ko mulna cocoo, paɗ liŋŋa, tuɗ vi kom eg mek ma ka hu givin ma togollana di ana, ko mulna Salomon suu tam ay ki ana nam ka can ki u ŋgewnaɗi.»

⁵² Salomon hoŋ dira ana, «Lini nam li tam wa a sa ɦawana ni tlimit yam na dew lay ni ka viɗ kiɗi. Lini hurumma daŋ mbusuk hurum wa na nde gaw ni, nam hin miɗa.»

⁵³ Mulna Salomon sun suuna ha ana asi tuɗ taɗam ay ki ga hu givin ma togolla. Nam mba goɓ ga fok mulna Salomon. Salomon hin dam ana, «Tuɗ vo hu ziiŋu.»