1 KORINTNA 8 - Boy Lonana

Tliw ma ɓivunna maŋ fulina

¹ Goloygi u boyna vi tliw ma ɓivunna maŋ fulina. A gasira ni suuna halaŋ wi ko agi dira na lay. Wi mayra ndaɗta mbuɗ sana ŋga tamu, ni ndaɗ minda wulugi hu vira may.

² Sa ma saa hurum ana nam wi vana ni nam bay wi ki halaŋ tuwa.

³ Sa ma min Lona, Lona wamu.

⁴ Boy ma namma, ni anaba, Tliw ma ɓivunna maŋ fulina na ndak a komom su? Agi wi ana hu duliyara tani ful kaɗi, Lona ka dew daŋŋi namu.

⁵ Lini tlesuu asi yasi ko lona nana, kolo huulona lay kaŋga kay ndaŋgara lay, kay «logina» u «bu suuna» ka bolow lay.

⁶ Irigi aygi ni ay wi ana Lona ni dew, Buy ma li tlena belna, aygi kak iiri ni um nam lay, Bu Suuna ni dew, Yesu Kristu tlena halaŋ ka ni kom namu, aygi kak iiri ni um lay.

⁷ Suuna ka wi gasi ndaɗta halaŋgi, suu daŋŋa haɗ tasi ki u boyna vi fulina ta ta cemi lay. Asi kom tliwna ni tliw ma ɓivunna maŋ fulina na, wiisira maŋiya, mbuɗ tasi njenje u ti ma namma.

⁸ Doli ni ka ti ma mbaaray eg Lona tokgi lay. Lini aygi ka tiɗi ka ba va kiɗi lay, lini aygi ka ti lay ka fi va huɗi lay.

⁹ Gologi tagi jivi kay buɗ magira, li va ma cuk gorsegi suu maŋina kaŋga hu viraɗi, kaŋga hu coraɗi lay.

¹⁰ Lini ma maŋina waŋ aŋ sa wira kagi ti hu Ziŋ fulinana, nam hin wi tam saɓakŋa ti hu Ziŋ fulinana lay?

¹¹ Lini wayay ma maŋi ma Kristu miɗ kamma a ba ki kay wiiŋga ɦawaa.

¹² A li cora ko wanni na eg gorsegi suu wiisira maŋina, ni agi li cora ni eg Kristu u tamba.

¹³ Kay ndaɗta lini wayanna ndi kaŋga hu cora ni u va ma tira ɦawaa, an ka kom tliw oloɗi a fafatɗa kay an min a ba wayanna kiɗi.