1 KORINTNA 7 - Boy Lonana

Boy dla ɗumba

¹ Tlaygi vunuygi u boy ma agi ɓiirin ha kamma. A jivira ni sana ɗum caɗi.

² Kay boyna vi zoŋga mariyaɗ ni sana li u caamba umu. Cara li u njufuɗ may.

³ Sana li dlaamba sa njufna eg caamba, cara li dlara cara eg njufuɗ may.

⁴ Cara ka ndak a li va ma u min maɗta kay taɗtaɗi, mbalataɗ ni maŋ njufuɗu, sa njufna ka ndak a li va ma u min mamba kay tambaɗi ni na may, mbalatammi maŋ caamba.

⁵ Gi vun tagi kiɗi, gagi gagara ŋga lina duk tagiya, kay agi hin a li cenda, ŋgoo dagan hoŋogi eg tagi olo, kay Satanna kal dukugi a ndemegiɗi.

⁶ Va an dagina ni ka ko gaɗta naɗi ni mal voɗta na ɗow.

⁷ A gasira an min gin ni ana suuna halaŋ lini ko an na, na may Lona ɦal dlara maŋ suuna ni zeɗ zeɗ, sa ɦiŋŋa nam ɦam mamba hiŋga may, ma hiŋŋa nam ɦam mamba iriɗ ki na may.

⁸ An dagi hana magi agi suu bay ɗum tuna, u suu ɗum gini hin hin ki duk ɦawana lay. A jivira ni agi lakagi kay tagi ko an na.

⁹ Lini agi ka ndak a doo tagiɗi ni, mariyaɗ ni agi ɗumugiya. Jivira ni aŋ ɗuma, su mayra huruŋ haɗta.

¹⁰ Agi suu vi suu ɗumina an dagi gaɗta hana magiya, ni ka gaɗ manda kay tanɗi (ay ni vi Bu Suuna) cara ɗumira ɓorow duk ɦoŋosi ki u njufuɗɗi.

¹¹ Lini ndaɗ ɓorow duk ɦoŋosi ki u njufuɗ wani, vi njuf ma daŋ oloɗi, li ka naɗi ni ndaɗ hoŋ u njufuɗu, sa njufna gi caamba kiɗi.

¹² Magi agi suu hiŋŋa an dagi hana (anu ka Bu Suunaɗi) lini a sa ma vina caamba bay viya ndaɗ li min kak u namu ni, nam hiniɗ kiɗi.

¹³ Lini cara vira njufuɗ bay viya, nam li min kak u ndaɗuni ndaɗ hinim kiɗi may.

¹⁴ Cara vira mbuɗ njufuɗ ma bay vina ki teteɗ u taɓ masira. Njuf ma vina mbuɗ caamba bay vira ki teteɗ u taɓ masira. Lini ka naɗi ni goryosi ni ko suu bay vina na, a gasira ni asi teteɗ ii Lona.

¹⁵ Lini sana u caamba maa dukusi bay vina a ɓorow duk hoŋosi kini namu ni, hinisi ko ndaɗta na. Hu li namma ni wayayna u wayayra vira ki buɗiya. Kay Lona yaygi ni ana aygi kak u heɓpa.

¹⁶ Ndak cara vira lini ndak hin suɗ njufuk ki kala ni ndak wi u mege? Aŋ sa ma vina lini aŋ hin suɗ caaŋga ki kala ni aŋ wi u mege?

Lakagi ko Lona yagira na

¹⁷ Gegelay ni kak ko ɦala Bu Suuna ɦambara na, ko Lona yam ay jewra na. Gaɗta an a tiniɗ hu zira vi Lona halaŋga ni na.

¹⁸ Lini sana Lona yam jew ni ɗiwim ki cawiya ni, nam hal dla mayra bulum caw ɗiwra ki egemuraɗi. Lini sana Lona yammi nam bay caw ɗiw tuwa ni, nam hal dla mayra caw ɗiwim oloɗi,

¹⁹ caw ɗiwra lay bay caw lay ni va ŋgol ka huɗi, va ma ŋgolna ni hum u gaɗta vi Lonara.

²⁰ Lini gegelay ni kak u dlara Lona yam ay huruɗta.

²¹ Lona yaŋ ay ni aŋŋi mbaɓuna su? Yoo taŋgi mbuɗ wa ana aŋ ki buɗiya ni aŋ li na.

²² Sa ma mbaɓu ma Bu Suuna yamma nam mbuɗ ki buɗiya, ni ko Bu Suuna. Sa ma vuɗi ma Kristu yamma nam mbuɗ ni mbaɓu mamma may.

²³ Lona warak kagi a gusugira ni warakiya, kay ndaɗta mbuɗugi tagi ki mborɓiina vi suunaɗi.

²⁴ Gorsenna lini gegelay kak fok Lona hu dla mayra Lona yam ay huruɗta.

Boyna kay suu bay ɗum tuna, u suu ɗum gini hin hin ki ɦawana

²⁵ Kay boyna vi suu bay ɗum tuna, an min di saa manda an sanara kay boy namma, ni ka gaɗta vi Bu Suunaraɗi, kay oora Lona handara boy manna ndaki kay sa vi umu.

²⁶ Ko dla mayra loɓ tara ka mbay kayra a li jivira ni sana kak ɦawaa.

²⁷ Aŋ ka u ca uŋ su? Aŋ li u ca uŋu ni hal dlara busuɗ kiɗi. Aŋ bay ɗum tu su? Aŋ li bay ɗum tuwa ni hal dlara ɗum caɗi.

²⁸ Lini aŋ ɗum lay ni aŋ li ka coɗi, lini go tamara kak njuf lay ni ndaɗ li ka coɗi kay suu may suu ɗum tasi kina hin fi wihawra hu iiri masira kaŋga tanda, an min a ɓorowogi duk ɦoŋogi ki u las mayra ndaɗta.

²⁹ Gorsenna va ma an min dagina ni lina hin tok daŋ, cecemi gaw suu ana asi ɗumiyana kak ko asi bay ɗum na.

³⁰ Suu ka tiina kak ko asi ka tiiɗi na, suu ka furina li ko asi ka furiɗi na, suu ka gus tlena li ko asi gus va kaɗi na.

³¹ Suu ka u tlena kosina, li ko va ka kosiɗina, duliya mayra aygi ka huruɗ wanda hin ka a kak na gak gakgi.

³² An min agi buɗ ki kay yoora yoo tagi kay tlena halaŋ. Sa ma bay ɗumma loɓ tammi kay tlena vi Bu Suuna, nam hal ni ana nam li jivi ii Bu Suuna.

³³ Sa ma ɗumma loɓ tammi kay tlesuu hu duliyarana nam hal ana nam li ii caamba jiviya.

³⁴ Ii dlara ɓorowi kay dlara sana loɓ tam kaɗta na mba'. Ni na may cara kak njuf kaɗira, u go tamara bay ɗumba loɓ taɗ ni kay tlena vi Bu Suuna, kay ndaɗ min ɦal taɗ u ŋgussuɗ halaŋ maŋ Lona, ca mayra ki ɗumira loɓ taɗ ni u tlena vi duliyara kay ndaɗ hal a li taɗ jivi ii njufuɗ may.

³⁵ An di dla ndaɗta ni a li kagi jivi na ɗow, ka ana mbaaragi kagi ni dlara coo naɗi, an min ana agi kakŋi jivi kay a li sunda vi Bu Suuna.

³⁶ Ɓakaygi kay suu ŋgaɓ gin tasi a ɗumba, hin ana asi kak ɦawana, lini goozoŋŋa wi ana man ka li jivi ii go tamaraɗi, kay hurum ka tini kaɗ a miniɗu, li wa na ni nam mba li u min mamba, ni nam li ka coɗi, mariyaɗ hinisi ɗum tasiya.

³⁷ Lini goozoŋŋa tin hurum ki hurum ana nam ka ɗumbi lini dlara doorom kaɗi lay, lini nam ndaki a doo tamu a li u min mam ndaɗta nam liya, ni jiviya nam kak ɦawa bay ɗum caa.

³⁸ Sa ma ɗumma li jiviya, ma ɗum kaɗina li jivi su olo.

³⁹ Cara ɗumira njuni u njufuɗ hu iiri mamba gak gak, lini njufuɗ miɗi wa ndaɗ buɗiya kay kak u sa ma daŋŋa u min maɗta, kakŋi u sa ma vi ma daŋŋa.

⁴⁰ Lini ndaɗ kak ɗegeere ni ndaɗ hin fi furira suwa. Ni saa manda, an saa ana Musuk Lonara ka egen lay.