1 KORINTNA 5 - Boy Lonana

Dla cora duk suu vina

¹ Suuna ɓak kagi na tew tew ana dlara ka dukugiya, dlara zoŋga ndaɗta suu bay vina lay ndak ka li naɗi, asi di ana sa maa dukugi dew ni vi caŋ bumba ki umu.

² Agi tagira may ni hin ŋga tagi ni ŋgaay na ɗow. Agi a yoo ginni yoori na ɗow, sa ma li dla ndaɗta a dikim ki ginni dukugiya.

^3-4 Ko an na ni ka dukugi u tandaɗi, ni an ka dukugi hu ŋgussa, sa ma li co namma an kaɓakŋa ki kam u sem Bu Suuna Yesu ko an dukugi u tanda na. Hu li ma agi tok wa an ka dukugi hu ŋgussa ni, saɓakŋa vi Bu Suuna Yesu hin li dukugiya.

⁵ Sa namma agi gam ha ki maŋ Satanna, nam lasam tamu a ŋgus mamba hin suɗ ki hu buu ma vi Bu Suuna Yesuna.

⁶ Boy ma agi ŋga tagi kam kaɗi, agi wagi vun ŋgolna di ana, «Kuffa ewra cukuɗ duk futta yarsira wanni ndaɗ buuɗ ki halaŋ.»

⁷ Hinigi kuffa basira vi cora kiyo, kay agi mba mbuɗ ki teteɗ. Agi mbuɗ ni fu ma wili ma bay kuffa dukumma, a gasira ni agi kii mbuɗi gaw. Luu maygi ma Pakŋa gijaŋŋa, kay mege Kristu ni ko goo timii ma ɓivunna ŋgaɗ ki wa.

⁸ Laygi luu maygina u kuffa basiraɗi, kuffa vi cora u dlara zoŋgaɗi u fu ma bay kuffa, fu ma teteɗna u gasira.

⁹ Hu magaa manda an ɓiirigira hara, an dagi ana taɓagi u suu dla co ndaɗtaɗi.

¹⁰ Saa manda ka ana agi taɓ u suu hu duliyara halaŋgira ka naɗi, suu li dla cora, suu ŋgiziɗ tlena vi suuna, suu kulna, suu cen lo ɦawana, agi noyosi ki halaŋga ni agi cuk ki hin duliyara kiyo.

¹¹ An min dagi anaba taɓagi u sa di kay tam ana nammi sa ma vina, hin li dla cora, ŋgiziɗ tlena vi suuna, cen lo ɦawana, ŋgul suuna, ma guruɗ u summa, ma kulna, taɓagi u nambi, ti fu u nambi lay.

^12-13 Suu bay vina an ka kaasi ɓakŋa kasi ni anɗi, Lona hin kaasina kasi ni namu. Na ɗaŋi agi ka kaɓakŋa kay suu dukuginaɗi su? Ko magaara di ana, «Dik suu cona ki dukugiya.»