1 KORINTNA 4 - Boy Lonana

Suu vovoɗta vi Kristuna

¹ Agi golomi ni ko ami ni suu sunda vi Kristu suu di ki kay dlara ŋgayra vi Lonara.

² Dlara sa fok suuna a laɗta, ni ana nam li ɗegee.

³ An kay tanda ka sa ma agi hin van u ɓakŋa ɗowba fok suu ŋgolona. Ni an kay tanda kaɓakŋa kay tanɗi lay.

⁴ Wiinda kay tanda ni agi ɓeŋ hurugi egenɗi, ni ka di ana anni sa ma bay cora egenna naɗi lay. Bu Suuna ni sa ma hin kaɓakŋa kanna.

⁵ Ni kay ndaɗta kaɓakŋa kay sa jew buu ma ɓakŋaɗi. Juɓ Bu Suuna mba tuwa, tlesuu ŋgay hu ndufundana, nam hin mba gasi usi ki kiɗiki, nam hin vaa dlara ŋgay hu suunara kiyo. Kay ndaɗta gegelay hin fi geleɗta ko Lona kay dlaamba.

⁶ Gorsenna boy ma an dam kay Apollos may kay tanda may na, an min agi haɗam um ki jiviya. An min agi vi ko ami lira na, ni agi hin wi u vun ŋgol ma di ana, «Calaɗ ki kay va ma ay ɓiiri hu magaaranaɗi,» sa ma dukugi mba ŋga tam kay ndarambi.

⁷ Sa ma tiniŋ a ŋgolla kay ndarayaŋŋa ni gege? Tlesuu koŋŋa halaŋ Lona ɦaŋsina ni ka nambi su? Aŋ ŋga taŋ kay tlesuu koŋŋa ko aŋ fasi ka ɦawaɗira na ni nana ge?

⁸ Agi fagi tlesuu agi minisina wa halaŋ, ɦizigi wa halaŋ, agi mbuɗugi ki mulina, ami ka na koɗi, an min ana agi mbuɗugi ki a muli suu gasina, kay ami mba taɓ u agi mbuɗ na may.

⁹ An gol wani Lona cukumi ami suu vovoɗ mamba ni daganda dodora, ami ni ko suu ɓakŋa vasi a casi ki fok suuna halaŋga na, suu hu duliyara halaŋ u suu sunda huulona lay ami ni kosiya.

¹⁰ Ami mbuɗ suu laɓana kay sem Kristu, agi ni suu neeyna kay sem Kristu may. Ami suu maŋina, agi ni suu saɓakŋa may. Ami ni suu suuna panamina, agi ni suu suuna geleɗegina may,

¹¹ cecemi lay ni mayra camiya, laara camiya, baraw ma cuk tami kaɗi lay, suuna poŋomi lay, ami ka kak hu li ma dewɗi lay,

¹² ami loɓomi coco a hal tina funumi u tamira. Hu li ma asi ŋgulumi lay ni, ami paɗ vunumi ki kasiya, hu li ma asi lasami lay ni ami ka noy kiɗi ka siɓa.

¹³ Lini asi di va co kami lay ni ami hoŋosi dira u ɗigilla. Ami hu duliyara ni ko li ma suuna tokom ha ki cukum kina na, njenje gak gak karami.

¹⁴ An ɓii boy namma ha ni ana a mbuɗugi zoloo naɗi, neegi kini u boyna ko goryon suu an minisina na.

¹⁵ Lini suu haɗagi kay Kristuna ka bup bup doogo lay, bugi ni dew daŋ, kay iiri magira hu Yesu Kristu an mbuɗ a bugi ni anu kay an mbaaragi Boy ma Ayra.

¹⁶ An joɓogi ha ni agi lagi ko an na may.

¹⁷ Kay ndaɗta an sunugi Timote haa kay nammi goon ma an minimma, ma gasagi hu Bu Suuna na, nam hin mba gagi humugi kay gasagi mayra tuɗun iri manda u Yesu Kristura, gasi mayra an haɗaɗ maŋ suuna hu Ziŋ Lonana tew tewra.

¹⁸ Suu daŋŋa mbuɗ ŋga tasiya, saa masira ni ko ana an ka hoŋ ay varagi a gologi oloɗira na.

¹⁹ Lini Bu Suuna min wa ni an ka tuɗ ha varagi cecem. An ka tuɗ ha ni kay boyna vi suu ŋga tasina holɗi, kay wi dlara asi ndaki kaɗta lay.

²⁰ Mul Lonara ka ni kay boyna ɦawa holɗi, ni kay saɓakŋa.

²¹ Agi minni mege? An mba egegi ni u tokolora kon su? U huu ma minda u lalamba su?