1 KORINTNA 3 - Boy Lonana

Suu li sunda vi Lona

¹ Gorsenna u gasira ni an ka ɓakagi ko suu hu Musukka vi Lona naɗi, an ɓakagi ko suu hu duliyara na may, ko kemba hu Boy Lonana na.

² An ɦagi ni mbira ka fu ma eŋŋaɗi, kay agi ndak ka kam tuɗi. Cecemi lay ni agi bay ndak kam tuwa,

³ kay agi ka li ni ko suu hu duliyara na tuwa. Gi honira u ciwayra ka dukugi tuwa, ni tak kini ana agi ka ni ko suu hu duliyara na tuwa, ni agi poyni ko suu hu duliyara na tuɗi su?

⁴ Hu li ma agi di anaba, «An ni u Pol,» hiŋŋa ana, «An ni u Apollos,» ni agi lagi ni ko suuna lira na layɗi su?

⁵ A ndaɗta ɗaŋŋi Apollos ni gege? Pol ni ge mayge? Ami ni suu sun Lona ɦawaa, mbuɗ ana agi vi Boy Lonana ni umiya. Ami halaŋ sana gege lini sun mamba Lona yam kaɗta,

⁶ an pi guna kaŋga ni anu, Apollos voom yona may, Lona hin wulummi namu.

⁷ Sa pi guna u ma voom yona asi jakŋi ɦawaa, Lona susi bel kay nam wulummi namu.

⁸ Sa ma pi guna u ma voom yona ni fun tasi dew, Lona hin warak sana ni kay sun mamba nam laɗta.

⁹ Ami ni suu li sunda ko tami u Lona, agi ni senena vi Lona. Zii minina vi Lona may.

¹⁰ U oora vi Lona ta nam ɦandara, an li sunda vi Lona ko sa ma yalna na, gi u zira. Ni sa ma daŋŋa hin min kamɗu. Gegelay ni gol jiviya kay va ma nam minim kayamma.

¹¹ U zira tin ki kay Yesu Kristu wa, sa ka gi u zira daŋ oloɗi.

¹² Suu daŋŋa min u lorra, u doonora, u ɦinira jivira kay u zi ndaɗta, suu daŋŋa min u guna, ŋgayna u usuna.

¹³ Ni sunda vi sana hin tak ki hu buu ma kaɓakŋa, tak kini dlaamba nam laɗta. Hu buu namma ndaɗ mba ki kiɗikŋi u kura, kura hin tuk sunda vi sana ni u va nam lamma.

¹⁴ Lini sana min kay u zira, sun mamba ŋgal ka ki ko kura ɗini nam hin fi warakŋa.

¹⁵ Lini sunda vi sana ŋgal ki wa nam ka fi warakŋaɗi, nam tamba hin suɗ kiyo, ko sana calaɗ ay kay kura a suɗ tam kira na.

¹⁶ Agi wi ka ki ana agi ni Ziŋ Lonana, Musuk Lonara kaki hurugi may.

¹⁷ Lini sana ɓeŋ Ziŋ Lonana kiyo Lona hin ɓeŋ sa namma ki may. Ziŋ Lonana co ka egembi, a Ziŋ Lonana ni agiya.

¹⁸ Ko sa ganyam tambi, lini sa ma dukugi saa ana nammi sa ma neeyna hu duliyara tani, nam mbuɗ ni sa ma giniŋŋa kay hin a fi nera.

¹⁹ Nera hu duliyara tanira ni giniŋga ii Lona, kay magara di ana, «Lona vi suu neeyna hu ganyam masira.»

²⁰ Ndaɗ magaara di olo ana, «Bu Suuna wi saara vi suu neeyna ndaɗ ka li vaɗi.»

²¹ Kay ndaɗta sa ŋga tam kay ndarambi, kay tlena halaŋŋi maygisina.

²² Ko Pol, Apollos u Piyer lay, duliyara, iirira, miɗna, dlara cecemba ura ha fokka lay halaŋŋi magiya.

²³ Agi tagira ni maŋ Kristu, Kristu ni maŋ Lona may.