1 KORINTNA 2 - Boy Lonana

Di ki kay Kristu ɓali kolo hu gu ma garakŋa

¹ Gorsenna hu li ma an mba varagi a dagi gasira ŋgayra vi Lonara, ni an ɓakagi ka u boy ma hum loɓ ana an sa neeya naɗi.

² Buu ma an buu ay varagina an min ana an wi va ma daŋ dukugiɗi, va ma an minim ŋgolna ni ana Yesu Kristu ɓali hu gu ma garakŋa doy hol.

³ Ni kay ndaɗta an mba dukugi ni saɓakan kaɗi, dlak ko ndaana,

⁴ Haɗta an haɗagi u boy ma an damma halaŋŋi ka u yalna vi sa warnaɗi, ni kay tak dlara vi sanara u saɓakŋa vi Musuk Lonara.

⁵ Viigira ka tini kay nera vi suuna ɦawaɗi, ni kay saɓakŋa vi Lona.

Nera vi Lonara

⁶ An di boyna kay nera vi Lona maŋ suu vina suu ki ndakina, ni ka nera vi suu kay ndaŋgara tani ɦawaɗi, ka kay saɓakŋa vi suu kak ki kay ndaŋgara tani suu hin ba kina ɦawaɗi.

⁷ An dini kay nera vi Lona ta ŋgay ii suu neeyna Lona ŋgaɓaygi ŋgolla ay ni maygi aygi hu li ma duliyara bay li tuwa.

⁸ Hu ndaŋgara tani sa ma ndak a wi nera ndaɗta kaɗi, lini asi waɗu ni asi ka ndak a ɓal Bu Suuna vi ŋgolla ki kolo hu gu ma garakŋaɗi.

⁹ Ko magaara dira na, «Sa ma wi boy namma ay kaɗi lay, ma hum kaɗi lay, sa saa ka kambi ni kay mege, Lona min tle asina ni kay suu minimma.»

¹⁰ Lona gaygi u ŋgay mamba kini u Musukka. Musukka ndak hal u dla mayra vi Lona ta ŋgay ga dayra ki lay.

¹¹ Sana ŋgus mamba ndak wam u dlamba kamba ki halaŋ, Musuk Lonara wam dlamba ki halaŋŋi na may.

¹² Aygi faygi ka ŋgussa kay ndaŋgara tanɗi, aygi faygi ni Musuk Lonara, kay a aygi waygi u tlesuu Lona ɦaygisina halaŋ.

¹³ Aygi ɓakaygi ka u dlara sa haɗaygira hu ndaŋgara tanɗi, ni dlara Musuk Lonara haɗaygira. Ni kay mayra aygi vaygi ni u gasi mayra vi Musukkara maŋ suu ka u ndaɗna.

¹⁴ Sa ma ka u Musuk Lonara hurumbina ndak ka wi gasira vi Musukkaɗi may. Gasi ndaɗta irimmi ko va ma laɓa na, nam ndak ka a hum u boy nammaɗi, sana ndak a gi ii dlara kini u Musukka.

¹⁵ Sa ka u Musuk Lonara gi ii dlara kini u voɗoɗ halaŋ, sa ma ndak a gam ii dla kom kaɗi.

¹⁶ Ko magaara dira na, «Sa ma wi saara vi Bu Suuna ni gege? Sa ma ndak a gaɗamma ni gege?» Aygi may ni ka u saara vi Kristu huruygiya.