1 KORINTNA 16 - Boy Lonana

Tok begera maŋ gorsegina

¹ Kay boy begera tokka a ɦaɗ maŋ gorsegi suu vi Lona suu ha Yerusalemma. Lagi ko an haɗ suu vina suu ha Galatina lira na may.

² Hu faɗta damassa tew tew gegelay cuk gursura ki egem zeɗ u va ma nam famma, ka ana hu buu ma an mbana ni agi hin tok tlena ni toki tuwa naɗi.

³ Hu buu ma an mba ha wa ni hin sun suu agi mansina u magara a ɦal tlesuu agi tokosina ha Yerusalem.

⁴ Lini an hin a tuɗ may ni ami hin tuɗumi ni ko tamiya.

Koyra vi Pol

⁵ An ka tuɗ ha varagiya lini tli ha ni voɗta Masedoinda (kay an a jak ki kay Masedoin).

⁶ Kay an a kak varagi buu goy ca, an li daɓ til semeɗna ki varagi kala, agi hin njun un tinin hu li ma an tuɗ huna aragelay.

⁷ Ka min a gologi ɦawana jak gawɗi. Kay an min a kak varagi buu goy ca lini Bu Suuna hinin a li na.

⁸ Ni an min a kak tani Efes na gak gak tew luu ma Pantekotna.

⁹ Ni voɗta mal ki kan a li sunda ŋgolla tani, lini suu gonok manda ka ŋgol masi lay.

¹⁰ Timote mba ha dukugi wani agi vam dukugi jiviya, kay nam li sunda vi Bu Suuna ko an na may.

¹¹ Ni sa panambi, njun ummi njuni na ɗow kay nam tuɗ koy mamba u heɓpa, a nam hoŋ ay egen tani ami ka juɓum u gorseyna.

¹² Wayayna Apollos an ka dam tew tew a nam tuɗ ha varagi u gorsey suu hiŋŋa, nam ka min a tuɗ ha cecemiɗi. Nam hin fi voɗta wanni nam hin tuɗ ha ni na tuwa.

Pol gaɗ suuna kay kak jivi hu vira

¹³ Lakagi neeya, kak eŋ hu vira, lagi ɦiŋi, lakagi saɓaki.

¹⁴ Li lagi megelay ni lagi u minda.

¹⁵ Gi Stefanas u suu mamma agi wasiya, hu Gresna asi ni suu vi hu Boy Lonana jewna. Asi cuk tasi duk suu vina a li sunda vi Lona. An min joɓogiya gorsenna,

¹⁶ ko asi na ni agi hum usiya, u suu ka li sunda ɗegee u asina lay.

¹⁷ An furi ŋgolo kay mbara vi Stefanas gi Fortunatus u Akaikus, hu li ma agi ka di na ni asi ka ɦan tlesuu hawasi ka canna.

¹⁸ Asi heɓen hurun ko asi heɓegi hurugira na lay. Ni saaragi jivi kay suu ko asina na.

¹⁹ Suu vina hu mbassa Azira gagi deɓpa. Akilas u Prisiye u suu vi suu ka egesina gagi deɓpa ha coco u sem Bu Suuna ma taɓaygina.

²⁰ Gorseygi suu ka tanina halaŋ gagi deɓpa. Gi deɓpa duk hoŋ tagi halaŋ u furira.

²¹ An ɓii boy namma ni u tanda, gagi deɓpa ni an Pol.

²² Lini sana ka min Bu Suunaɗini, nammi sa ki baayna. Maranata (ni ana Bu Suuna mamina mbaya).

²³ Ko oora vi Bu Suuna Yesu kak u agiya.

²⁴ Min manda li u agi halaŋ hu Yesu Kristu.