1 KORINTNA 13 - Boy Lonana

Minda

¹ Lini an ɓak vunna vi suuna halaŋ u ma vi suu sunda huulona lay, min manda li kaɗi ni, boy manna an damma hin kini ko gaŋgana a cira ɦawa na, ɗowba ko koŋ koŋŋa a tiira ɦawa na.

² An ndak a fi ɦal mayra di Boy Lonana ki maŋ suuna, an ndak a fi wira halaŋ hum u tlesuu ŋgayna kiyo, an ka u vira ndak a jok ɦinira kiyo, lini min manda kaɗi ni an kini ɦawaa.

³ An ndak a ɓorow tlegeyen ki halaŋ, ɦal tan a ŋgal kira lay, lini min manda kaɗi ni ka li va dewɗi.

⁴ Minda ɗiliya, minda jiviya, ka li huu ma co eg saɗi, minda ka tli yam taɗ koloɗi, minda ka ŋga taɗɗi.

⁵ Minda ka li va zoloɗi, minda ka godlombi, minda ka mbuɗ yaɗi, minda ka vi boy huruɗ gak gakgi,

⁶ minda ka furi kay coraɗi, furi ni kay gasira.

⁷ Minda ka takaŋ ana aŋ siɓ dlara halaŋ, ndaɗ min ana ay tew tew ni hu vira, juɓ u ɗigilla.

⁸ Minda ndaɗ din din ka daɓ kiɗi. Boy ma sana fam ay ko Lonna hin daɓ kiyo, ɦala ɓak u vun ma daŋŋa zeɗ zeɗta hin daɓ kiyo, wira hin daɓ ki lay.

⁹ Kay ay ka way u tlena ki belɗi, way ni nde nde ɦawaa. Boy Lonana ma dam kina lay ni ɦiw ɦawaa.

¹⁰ Ma gasina mba wa ɗaŋŋi tlesuu ka u voɗosiɗina hin daɓ kini na gaw.

¹¹ Hu li ma an ay goo tuna ni an ɓaka, saara, gi ii dlara lay ni, ko gogoona na, hu li ma an mbuɗ ki sana ni hin dlara goora ki halaŋ.

¹² Cecem wanda aygi gol taygi ko ŋgussa hu kotoromma na, aygi hin waygi taygi u iriygiya. Cecem wanda an ka wi ki jiviɗi, ha fokka an hin wi ki jivi ko Lona wanda na.

¹³ Cecem wanda ni tlena hindi kaa, vira, juɓa, u minda, va ŋgol duk tlesuu asina ni minda.