1 KORINTNA 12 - Boy Lonana

Ҥala Musuk Lonara ɦaɗ maŋ suuna zeɗ zeɗta

¹ Gorsenna kay ɦala Musuk Lonara ɦaɗta, An min ana agi wagi u gasira vi ɦal ndaɗta kiyo.

² Agi wi ana hu li ma agi ay bay vi Boy Lonana tura wanni, asi taɗagi ay u fuli suu ndumuna agi vi kagi bay u dlara.

³ Ni kay ndaɗta an min ana agi wagi u boy namma kiyo, sa ma ana nam u Musuk Lonara hurumuna ka di ana, «Yesu ni ma ki baayna,» naɗi, sa ma di ana, «Yesu ni Bu Suuna,» bay Musuk Lonara hurumbi.

⁴ Ҥala vi Musuk Lonara ka zeɗ zeɗta ɓorowoɗ ni ndaɗ Musuk Lonara dew.

⁵ Ii sunda ka zeɗ zeɗ ni sunni Bu Suuna dew.

⁶ Njaf sunda ka bolow zeɗ zeɗni Lona zulu ni nam halaŋ lay.

⁷ Musukka ɦal maŋ gegelay a li jivira kay suuna halaŋ.

⁸ Sa maari Musukka ɦam boyna u nera, ma daŋŋa ndaɗ ɦam boyna u wira.

⁹ Musukka ndaɗta dew ma hiŋŋa ndaɗ ɦam vira, ma hiŋŋa ndaɗ ɦam saɓak ma garaɗ suu tuguɗira kina.

¹⁰ Musukka ɦal saɓakŋa maŋ sa hiŋŋa kay li dlara mbuɗta, sa hiŋŋa kay jok vun Lona, sa ma daŋŋa ndaɗ ɦam saɓakŋa a wi ŋgussa cora ura gasira. Sa ma hiŋŋa ndaɗ ɦam yal ma ɓak vun ma daŋŋa, ma hiŋŋa ndaɗ ɦam yal ma jok boy namma kina.

¹¹ Ni ndaɗ Musukka ndaɗta dew zul dlara halaŋŋi ndaɗu, ndaɗ ɦal maŋ suuna zeɗ zeɗ u min maɗta.

Mbalatara dew ɓorowi zeɗ zeɗ

¹² Ni ko Kristu dew mbalatam ɓorowi bolowo, lini nam ɓorowi bolow lay, nammi dew.

¹³ Aygi halaŋ suu Juifna u njaf suu daŋŋa, mborɓiina u suu vuɗina, aygi halaŋ mbusuygi batemma a taɓmi tara dewra u Musuk ndaɗta, ɦaygi ni kay aygi halaŋ taɓ ci u Musuk ndaɗta dew.

¹⁴ Mbalatara ka ni kay taɗ dewɗi, ɓorowi bolowo.

¹⁵ Lini gayna di ana, «Anni ka konaɗi, kay ndaɗta an ka taɓi eg mbalataraɗi,» doyɗi ni nam ka haw tam ki kay tam dewɗi.

¹⁶ Lini humba di ana, «Anni ka iiraɗi, kay ndaɗta an ka taɓi eg mbalataraɗi,» doyɗi ni ndaɗ ka haw taɗ ki kay taɗɗi.

¹⁷ Lini mbalatara halaŋŋi ira dew ni hin ndak hummi nanage? Lini mbalatara halaŋŋi humba dew ni hin hisni ana mege?

¹⁸ A gasira Lona tin mbalatara zeɗ zeɗ hu liisini u min mamba.

¹⁹ Lini mbalatara halaŋ ka taɓi hu lina dewɗi ni ka liɗi.

²⁰ Asi lii zeɗ zeɗ na may mbalatara ni dew.

²¹ Iira ka di kona ana, «An ka li va u aŋgi,» naɗi, yamba ka ndak di gayna ana, «An ka li va u agiɗi,» naɗi.

²² Ni na ɗow ana mbalata mayra ka iriy saɓakira sun maɗta kaa.

²³ Mbalata mayra dlaɗ ka iri ŋgolɗira, ay goloɗ jivi sura hiŋga, mbalata mayra aygi li zolona koɗta aygi ŋgayaɗ coco may.

²⁴ Mbalata mayra ndakira aygi ka ŋgayaɗɗi, Lona dlaɓ mbalatara kay a ɦal ŋgara maŋ li ma ka ndakiɗina.

²⁵ Kay ndaɗta ɓorowra ka kay mbalataraɗi, mbalatara zeɗ zeɗ halaŋ wi haw tasiya.

²⁶ Lini mbalatan ta dew wi hawra tliwin wi hawra uɗ halaŋ may, lini mbalatan taa dew fi ŋgara tliwin halaŋ li furira uɗ may.

²⁷ Agi halaŋi, mbalata Kristu, agi ni gegelay ni mbalatamu, sa hiŋŋa ni na lay.

²⁸ Ni kay ndaɗta duk suu vina Lona cuk suu vovoɗ mamba jewe, a mbara ni suu jokom vunumma, a hindira ni suu haɗta, ŋgoo daganda ni suu li dlara mbuɗta, hiŋga suu nam ɦasi saɓakŋa a garaɗ suu tuguɗira kina, hin ɦal suu njun u suuna u suu gol suuna, suu u ɦala a ɓak vun ma daŋŋa daŋŋa.

²⁹ Halaŋŋi ka suu vovoɗtaɗi, halaŋŋi ka suu jok vun Lonaɗi, halaŋŋi ka suu haɗ suunaɗi. Halaŋŋi ka suu nam ɦasi saɓak ma li dlara mbuɗtaɗi.

³⁰ Ka suu garaɗ suu tuguɗira kina belɗi, ka suu ɓak u vun ma daŋŋa belɗi, ka suu jokom kina belɗi lay.

³¹ Saa kay ɦal mayra ŋgol su ndarayaɗnara. An min takagi voɗ mayra ŋgol su ndarayaɗna bella.