1 KORINTNA 10 - Boy Lonana

Gol tagi jivi ko tlesuu suuna vi usi ko Lona nana

¹ Gorsenna an min gagi humugi kay dla mayra somoyoygi suu jewna poy ko tasi u Moizza. Asi poy u ŋgus ɗugulla, suu calaɗ ay ki kay lumma tlawna.

² U ŋgus ɗugulla hu yo lumma asi taɓi mbus batemma taɓi Moiz.

³ Asi ti ti ma ŋgussa ko tasi dew.

⁴ Asi halaŋ ci ci ma ŋgussa ko tasi dew. Asi ci hu ɦini ma ŋgussa ma tuɗ usina ɦini namma ni Kristu.

⁵ Kay ndaɗta suu dukusi ɦiw ay ka jivi ii Lonaɗi, asi miɗ ay ki bagi ŋgolla ni u boy namma.

⁶ Dlaasira halaŋ takay ki ana ay mba saaraygi ko asi naɗi.

⁷ Ni agi vagi u tlesuu suuna golosi ko Lona nana, ko suu ɦiw dukusi lira naɗi. Ko magaara dira na, «Suuna laki kaŋga kay tiya ciya, hin yow kolo luura.»

⁸ Hiniygi taygi kay dlara zoŋgaɗi, ko suu dukusi ɦiw li ko ndaɗtana, suuna bup bup dok mba' yam hindi miɗ hu buu ma dewna.

⁹ Tukuygi Bu Suuna u dlaraɗi, suu dukusi ɦiwni li na, guygina casi ki halaŋ.

¹⁰ Gurnugi umbi, ko suu dukusi ɦiw li na ni sa sunda huulona ma ba suuna kina baasi kiyo.

¹¹ Yoo mayra ndaɗta mbay kasi ni kay a takasi ki maŋ suu hiŋŋa, boy namma ɓiirim ay ni kay a neeygi aygiya, kay aygi cecemi fun daɓpa hin tok.

¹² Kay ndaɗta sa ma ka saa a col kolona, gol tam jiviya kay nam mba ndi kaŋga oloɗi.

¹³ Ndemba agi waɗ halaŋ wanda li ay ni eg suuna gasi, Lona ka hin va ma nam damma ki ɦawaɗi, nam ka hinigi ndemba mba su kay saɓakagiɗi, hu li ma ndemba mba kakina wanni nam hin ɦagi saɓakŋa agi mba su kaɗu. U dlara agi hin mba puruɗ tagi ki koɗta lay.

¹⁴ Kay ndaɗta banayanna gologi tagi jivi ko tlesuu suuna lasi ndarasi ko Lona nana.

¹⁵ An ɓakagi ko ɓak maŋ suu yalna na, kaagi duk ɦoŋ boy namma u tagira.

¹⁶ Saaragi kay va cira ma Lona paɗ vunum ki kamma kay aygi mba gam deɓpa, hu li ma aygi caygina ni aygi taɓi dew u busu Kristuɗi su? Fu ma aygi ka ɓorowomma hu li ma aygi taygina na ni nam ka taɓaygi dew u mbalata Kristuɗi su?

¹⁷ Funa nam dew aygi suu tamma bolow lay, aygi taɓaygi ni mbalata sa dewna, kay aygi halaŋ tini fu ma dewna.

¹⁸ Gologi suu Israelna gige? Suu ti ɓivun ma ɦam maŋ Lonna, asi taɓi ni u namu, kay givin ma togolla ni maŋ Lona.

¹⁹ An di na ni ana tliw ma ɓivunna maŋ tlesuu suuna lasi ndarasi ko Lona nana saɓak masina kaa na su?

²⁰ Ҥawaa an di na ni kay suu bay vina li ɓivunna ni maŋ fulina, ka maŋ Lonaɗi. An ka min ana agi taɓ u fulinaɗi.

²¹ Agi ka ndak a ci va cira vi Bu Suuna u ma vi fulina jakgi, agi ka ndak a ti funa vi Bu Suuna u ma vi fulina jakgi lay.

²² Ɗowba aygi ndak a li yowmusna eg Bu Suuna na su? Agi saa ana aygi saɓak suum su?

Li tlena halaŋ a ɦal geleɗta maŋ Lona

²³ Suu ɦiw di ana tlena halaŋ voɗta ka kay lasiya va doorosi kaɗi. Na may tlena ka jivi kasi belɗi. Tlena halaŋ voɗta ka kay lasiya, asi ka jivi kay suu vina belɗi.

²⁴ Sana hal a li jivi mamba kay tam holɗi, li tlesuu jivina ni eg ndarayamma.

²⁵ Voɗta ka kay ti tlesuu gus u sukŋa halaŋ, lini tliwna kala joɓogi va kay saa magira ɦawaɗi.

²⁶ Ko magaara dira na, «Ndaŋgara u tlesuu kaɗna halaŋ ni vi Bu Suuna.»

²⁷ Lini sa ma bay vina yaŋ hawa ana aŋ tuɗ ti varamu ni, aŋ vi kaŋ wa a tuɗa ni ti tlesuu nam ɦaŋsina halaŋ, joɓ va kay saa maŋgaɗi.

²⁸ Lini sa daŋ wa ana, «Tliwna wanni tliw ma ɓivunna,» ni aŋ tiɗi, kay boyna vi sa daŋŋa, kay saara lay.

²⁹ An daŋŋi ka kay saa maŋgaɗi ni kay saara sana daŋgara. Sana di na ni, «Kay mege? Sa daŋŋa hin kaan ɓakŋa kan kay saa manda ni nanage?

³⁰ Lini an gi deɓ Lona kay va an tamma, sana hin tumun un kay va an gi deɓ Lona kamma ni nanage?»

³¹ Lini agi ti lay ci lay li megelay ni lagi tlena halaŋ u geleɗta eg Lona.

³² Lagi dlara a ba sa kiɗi, ko suu Juifna suu hu njaf ma daŋŋa, u suu vi suu vi Lonna kiɗi.

³³ Lagi ko an na an hal ana an a li jivira maŋ suuna halaŋ u tlena halaŋ, an ka halni jivi manda kay tanda ɦawaɗi, jivira kay suuna halaŋ kay asi mba suɗ kiyo.