1 JAŊ 5 - Boy Lonana

Dlaaygira su kay duliyara

¹ Lini gegelay tin hurum wa ana Yesu ni Kristu nammi goŋ Lonna ni, sa min buna hin minim gorom may.

² Gola dlara aygi wi ana aygi min goryoŋ Lona ni u mayra aygi min Lona may vam vun gaɗ mamba jivi mayra.

³ Gola minda aygi min Lonara ni ana aygi vam vun gaɗ mamba, gaɗ mamba ka kaygi loɓbi.

⁴ Kay me goryoŋ Lonna su ki kay duliyara, gola va ma takaygi ana aygi su ki kay duliyara ni huruygi ma tini kamma.

⁵ Sa ma ndak a su kay duliyara ni gege? Ni sa tin hurum ana Yesu ni Goŋ Lonana hol.

Dikira kay sem boy ma vi Yesuna

⁶ Yesu Kristu ni sa mbayna nam mba ni u yo ma batem mamma komu u busu ma miɗ mamma may. Nam mba ni ka u yona doy holɗi yona may busuna may. Musukka ana dla ndaɗta ni gasiya kay me Musukka ni gasira.

⁷ Suu dikina ni hindi.

⁸ Musuk Lonara, yona, busuna, suu hindi asina vi vunusi dew.

⁹ Aygi vi dira vi suunara koygiya ta vi Lonara ni ŋgol suɗi su. Ni dikira nam daɗ kay dlaŋ Gorommara.

¹⁰ Sa tin hurum kay Goŋ Lonna diki ndaɗta ni joki kam gaw may, sa ma tin hurum ka kay Lonaɗina mbuɗ Lon ni sa kaboyna kay me nam tin hurum ka kay dikira Lona daɗ kay dlaŋ Gorommaraɗi.

¹¹ Gola ni boy diki ndaɗta ana Lona ɦaygi iirira ka daɓ kiɗira, aygi mbuɗ a fi iirira ni u Goromma.

¹² Sa ma vam Goorommana fi ni iiri ndaɗta may sa ma vi Goŋ Lonna kaɗina ka fi iiri ndaɗtaɗi may.

Iirira ka a daɓ kiɗira

¹³ An ɓiirigi dla ndaɗta ha ni a agi suu tin hurugi kay Goŋ Lonna wi ki ana iirira ka a daɓ kiɗira ka hurugiya.

¹⁴ Agi gola ni dlara aygi wi taygi gasi fok Lona ana aygi joɓom va maa u min mamba wa ni nam humuygiya.

¹⁵ Aygi wi ana aygi joɓom va wa nam humuygi vunuygiya ni aygi wi lay ana va ma aygi joɓom kamma nam hin ɦaygina lay.

¹⁶ Lini sana wi wayamma a li cora, lini ka cora tuɗum fun miɗnaɗi, nam cenna, Lona hin ɦal iirira maŋ wayamma namma, va namma ni kay suu cora ka tuɗusi fun miɗnaɗina doy hol. May ni cora tuɗum fun miɗnara kaa, an joɓ ka ana agi cen Lona kay co ndaɗta naɗi.

¹⁷ Tlesuu aygi lasi cona halaŋŋi cora, may ni co mayra ka tuɗuŋ fun miɗnaɗira kaa.

¹⁸ Aygi wi ana sa a goŋ Lonna yam ka kay li cora na gak gakgi, kay me Goŋ Lonna nam golom um tew tew, Sa Cona ndak ka a lam va egembi.

¹⁹ Aygi wi ana aygi ni vi Lona, duliyara hin halaŋŋi hu duk ko Sa Cona may.

²⁰ Aygi wi anaba Goŋ Lonna mba wa, nam neeygi ki ana aygi wi Lo ma gasina kiyo. Aygi taɓira u Lo ma gasina ni u sem Goromma Yesu Kristu, nammi Lo ma gasina, iirira ka daɓ kiɗira lay.

²¹ Goryonu, lagi tagi jiviya, goɓ fulinaɗi.