1 JAŊ 4 - Boy Lonana

Musuk Lonara ura vi babali mammara

¹ Banayanna tinigi hurugi kay suu di kay tasi ana Musuk Lonara hurusiyana halaŋgi, agi tukusi a hal ki ana musukka hurusira col ay ni vi Lona ko su? Kayme suu jok vun Lona suu cona zul ki kaŋga hu duliyara waɗi.

² Dlara agi hin wi ki gasi ana ni Musuk Lonara sura, ni mayra sana di ki u vunum wa ana Yesu Kristu gasi mbuɗ ki ni sana, Musuk mamba col ay ni vi Lona.

³ Lini sa ma ka min a hum u dlara li eg Yesu ndaɗtaɗi ni saa mamba col ay ka vi Lonaɗi, saara egem ndaɗta ni vi Babali ma vi Kristuna. Agi hum ki ana nam hin mbaya, cecemi nam mba ki hu duliyara da.

⁴ Agi goryon may ni, agi ni vi Lona, agi su ki kay suu jok vun Lona suu cona lay, kayme Musukka hurugira su ki kay musukka vi duliyarara.

⁵ Asi ni suu vi duliyarana, asi ɓakŋi u mbeleŋ dlara hu duliyara lay. Suu hu duliyara humusiya kay asi ni masisina.

⁶ Aygi may ni vi Lona, sa ana nam wi Lona humuygi vunuygi may. Sa ma ka humuygi vunuygiɗina ay ka vi Lonaɗi. Ni u dla ndaɗta aygi ndak a ɓorow ii Musukka gasira ki ura kaboyna ni na.

Lona ni minda

⁷ Banayanna miniygi taygi duk taygiya kay me minda col ay ni ko Lona, lini gegelay li min suuna ni nammi goŋ Lonna nam wi Lona gasi lay.

⁸ Sa ma ka min ndarambina nam ka wi Lonaɗi kay me Lona ni minda.

⁹ Gola Lon tak ki ana nam miniygiya ni ana mege nam sunuygi goromma dewna ay kay ndaŋgara ana aygi fi iirira u namu.

¹⁰ Lon tak min mamba ki ni ko ndaɗta na, aygi min Lona ay jewni ka aygi na ɗowɗi. Lona miniygi ay jewni namu nam sun goromma ay ana nam bulumuygi cooygira ki u ɓivun mamma.

¹¹ Banayanna, lini Lona miniygi ni na ni aygi miniygi taygi duk taygi may.

¹² Sa wi Lona u irim kaɗi lini aygi minigi taygi duk taygiya ni Lona hin li huruygi may, min mamba li ki gasi huruygi wa may.

¹³ Dla mayra aygi wi ki ana Lona ka huruygiya aygi hurum mayra ni ana nam ɦaygi Musuk mamba.

¹⁴ Aygi wi boy namma aygi ɓak ki kam ana Lona sun Goromma ay a Sa Suɗta vi suu warna.

¹⁵ Lini sa ɓak ki u vunum wa ana Yesu ni Goŋ Lonna ni Lona ka hurumu, nam hurum may.

¹⁶ Aygi wi minda Lona miniygira kiyo, aygi tin huruygi kamu. Gasi Lona ni minda, sa ma ka u minda hurumma ka ni hu Lona, Lona hurum may.

¹⁷ Lini minda pasiyakka ka huruygiya ni aygi ka li ndaa hu buu ma kaɓakŋaɗi kay iiri maygira hu duliyara ni ko iirira vi Yesu Kristu na.

¹⁸ Minda ndaana ka huruɗɗi, minda gasira doo ndaana kiyo. Sa ma li ndaana minda pasiyakka ka hurumbi, kay me ndaana ni fun tam u daŋgayna dew.

¹⁹ Aygi li minda kay Lona miniygi jewe.

²⁰ Lini sana di ana, «An min Lona,» nam li gonok u wayamma, ni sa kaboyna, wayamma nam wam u irimu nam ka minimbi, Lona nam ka wam u irimbina nam hin ndak a minimmi nanage?

²¹ Gola ni gaɗta Yesu ɦaygira ana sa min Lona, min wayamma may.