1 JAŊ 3 - Boy Lonana

Goryoŋ Lonna

¹ Goloygi minda Buygi Lona miniygira ndaɗ ŋgol coco ɦay, min mamba ni kayra nam yaygi ana aygi ni goryomba. Aygi ni goryom daŋ may kay ndaɗta suu kay ndaŋgarana ka waygiɗi, asi ka wi Lonaɗi may.

² Banayanna aygi cecemmi goryoŋ Lonna, aygi li hin mbuɗ ŋgoo dagan ana me kala ni dla ndaɗta uɗ tak ka ki jivi tuɗi. Aygi a wi dla ndaɗta ki jivira wani falira Kristu hoŋ ayra, ni aygi hin mbuɗ ni ko ndal nam na, kay me aygi hin wam ki ni u tamba.

³ Lini gegelay ma tin hurum kay Kristuna, nam hin mbuɗ ki teteɗ ni ko nam na may.

⁴ Gegelay li cora wa, ni nam gi ki ni vun gaɗta vi Lonara, kay me cora ni ana aŋ gi vun gaɗta vi Lonara kiyo.

⁵ Agi wi ana Yesu Kristu mba wa ni a yow cora vi suu warnara kiyo, lini namu ni co ka hurumbi.

⁶ Sa ma ana nam taɓi u namuna hin dlara li cora gaw, sa ma hin yam gak gak li cora ni sa namma wam ay kaɗi ka wambi lay.

⁷ Goryonu hin sa a ganagi yagiɗi, sa ma li dlara ɗegeera ni nam tamba ni ɗegee may. Ko Yesu Kristu ɗegeera na may.

⁸ Sa yam gak li corana ni sa vi Satanna na kay me Satanna li cora ay jew ni namu. Ni kay ndaɗta Goŋ Lonna mba ni kay a ɓeŋ sunda vi Satannara kiyo.

⁹ Gegelay ni goŋ Lonna nam hin dlara li cora kiyo, kay me iirira vi Londa saɓakaɗ ka egemu, kay me Lona ni Bumu nam ndak ka a li co na gak gakgi.

¹⁰ Ni va ma tak goryoŋ Lonna ki jivi ɗal ɗal u suu vi Satannana, sa ka li dlara ɗegeeraɗi min wayammaɗi layna, ni ka goŋ Lonnaɗi.

Miniygi taygi duk taygiya

¹¹ Gola ni dlara agi humuɗ ay ki fok jew day dayra ana miniygi taygi duk taygiya.

¹² Aygi ka a li ko Kain naɗi, nammi vi sa cona ci wayamma kiyo, nam cam ki ni kay mege? Ni kay me sunda Kain laɗta tew tew ni coo. Sunda vi wayammara li ɗegee may.

¹³ Gorsenna lini suuna noyogi ki lay ni haɗagi hurugi kay boy nammaɗi.

¹⁴ Aygi wi ana aygi hin maɗna ha ki tani kal ni hu iirira, aygi wi na ni kay me aygi min gorseyginara. Sa ma ana nam ka min wayammaɗina nammi fun maɗna tuwa.

¹⁵ Suu halaŋ ana hurusi haɗ eg gorsesina na asi ni suu ci maɗna, agi wi ana sa ci maɗnana nam ka fi iirira daɓ kiɗiraɗi.

¹⁶ Gola aygi wi ana minda ni ana mege? Ni ana Yesu Kristu ɦal iiri mamba ki kaygiya aygi may ni ɦal maygira ki kay gorseygina may.

¹⁷ Lini sana ɦiziya nam gol wayamma wihawra may nam ka wam hahawambi may ni hin di ana minda vi Lona ka hurumu ni nanage?

¹⁸ Goryonu, miniygi taygi u vunuygi ɦawaɗi u boy ma dam jivinaɗi lay, ndaɗ lini u minda gasira tak taɗ ki ni u dlara aygi laɗ u bik koygira.

Aygi wi taygi gasi fok Lona

¹⁹ Gola ni dlara ay wi taygi ana aygi ni goryoŋ gasirana, gola ni dlara aygi wi ana huruygi tini fok Lona kaɗta.

²⁰ Lini huruygi takaygi cooygira ki iriygiya ni Lona ni ŋgol su huruygiya nam wi tlena bel lay.

²¹ Ni na olo, banayanna, lini huruygi ka takaygi cooygira ki iriygiɗi ni aygi wi taygi gasi fok Lona may.

²² Tlesuu aygi joɓom kasina aygi fasi halaŋ kayra ay hum u gaɗ mambara aygi li tlesuu ndi irimma lay.

²³ Gola ni gaɗta nam daygirara ana tin huruygi kay Goromma Yesu Kristu, miniygi taygi duk taygi may ko Kristu ɦaygi gaɗ mamba kara na may.

²⁴ Sa hum u gaɗta vi Lona nammi hu Lon may, Lona hurum may. Gola ni va ma aygi wi ana Lon ka huruygiyana aygi wi ni u Musuk Lonara nam ɦaygira ka huruygira.