1 JAŊ 2 - Boy Lonana

Yesu njunuygiya

¹ Goryonu, an ɓiirigi dla ndaɗta ha ni ka agi li dla co oloɗi. Lini sa kom kal a li dla co wa ni sa njun kaygi eg Buygina kaa, ni Yesu ma ɗegeena.

² Kay me Yesu ni sa ma ɦal tam ki ana cooygira daɓ kiyo na ka co maygi aygira doy holɗi, ni cora vi suu warna halaŋ.

³ Lini aygi vi vun gaɗta vi Lonara ni aygi wi ki kaygi ana aygi wi Lona na lay.

⁴ Lini sana vi kam wa ana nam wamu, li ka vam vun gaɗ mambaɗi ni, nammi sa kaboyna, ni gasira ka hurumbi lay.

⁵ Olo ni lini sana vam boy mamma ni sa namma minda pasiyakka min Lonara ka hurum gasi. Gola ni dla mayra aygi wi ki ana aygi hu Lonara,

⁶ Sa di ki u vunum ana nammi hu Lona li ko Yesu li hara na may.

Gaɗ mayra wilira

⁷ Banayanna, an ɓiirigi ha ni ka gaɗta wiliraɗi, ni gaɗta basira agi humuɗ ay jew hu ura tin ayra dayra, gaɗta basi ndaɗta ni boy ma agi humum ki jew dayna.

⁸ Na ni an ɓiirigi ni gaɗta wilira, gaɗ ndaɗta tak gasi maɗta ki ni eg Kristu egegi may, lii ndufunna jak ki wa kiɗikka hin ni ndaɗu.

⁹ Sa di ki kay tam ana nam ka hu kiɗikkana, li ka li babali u wayamma ni, nammi hu ndufunda tuwa.

¹⁰ Sa min wayammana nammi hu lii kiɗikŋa, va ma puk ndaram hu cora ka hurumbi lay.

¹¹ Sa ka li babalira u wayammana nam tuɗ ni hu ndufunda nam ka wi li nam ka tuɗ hunaɗi, kay ndufunda dugum irim kiyo.

¹² An ka ɓiirigi haa goryonu kayra co maygira u sem Kristura.

¹³ An ɓiirigi ha magi agi somoyosiya kay me agi wi sa ma ura tin ayra ni nam kana. An ɓiirigi ha ni magi agi gorzoŋina kayra agi su ki kay Sa Conara.

¹⁴ An ɓiirigi haa agi gorkemba ni kayra agi wi Lona Buna kira, an ɓiirigi ha ni agi somora ni kayra agi wi sa ma ura tin ayra nam kana kira. An ɓiirigi ha magi agi gorzoŋina ni kayra agi saɓaki, Boy Lonana hurugiya agi su ki kay Sa Conara lay.

¹⁵ Minigi duliyaraɗi, tlegeyeɗɗi lay, lini sana min duliyara ni, minda nam min bum Lonara ka hurumbi.

¹⁶ Tlesuu hu duliyara halaŋŋi ŋgiziɗta vi tliw tara, ŋgiziɗta vi iira, u ŋga tara vi iira, tlesuu asina halaŋ col ay ka vi Lonaɗi, ni vi duliyara.

¹⁷ Duliyara daɓ ki ni daɓiya, tlesuu hu duliyara suu suuna halasina hin daɓ ki ni daɓi lay, na may ni sa li dlara Lona miniɗta hin kak iirira a fafatɗa.

Babali ma vi Kristuna

¹⁸ Gorkem manda, daɓpa vi duliyara hin tok, agi hum ki ana Babali ma vi Kristuna hin mba ki fok jewe, cecemmi babali suu vi Kristuna zul ki cocoo tak ki ni ana duliyara hin tok a daɓa.

¹⁹ Suu asina ka suu maygisina gasiɗi ni kay ndaɗta asi hinigi kini na li gasi asi ni suu maygisina ni asi ka hinigi kiɗi, hin kak ginni u aygiya. Asi tuɗ hinigi kini a takaygi kini ana saaygi maa ka dukusi dewɗi.

²⁰ Lini agiya ni agi fi Musuk Lonara ta Kristu sunuɗ ayra hurugiya agi wi gasira ni kay ndaɗta.

²¹ Ni an ɓiirigi ha ni ka ana agi ka wi gasiraɗira naɗi, ni kay wira agi waɗu, agi wi lay ana kaboyna ka col ay hu gasiraɗi.

²² Sa kaboyna ni gege? Ni sa di ki u vunum ana Yesu ka Sa Suɗtaɗina, sa namma ni babali ma vi Sa Suɗtana, ni nam hinim bum Lona ki lay tamba Goromma ki lay.

²³ Gasi sa noy Goona kina noyom ki ni Bum may, sa wi Goonana wammi Bum may.

²⁴ Ni kay ndaɗta vagi boy ma agi humum ay fok jew dayna hurugi eŋe, lini dlara agi humuɗ ay fok jew dayra hurugiya ni agi hin li taɓira dew u Goona may u Buna may.

²⁵ Gola ni va ma Kristu di ana nam hin ɦayginana ni iirira ka daɓ kiɗira.

²⁶ An ɓiirigi dla ndaɗta ha ni kay suu hal a ganagi yagina.

²⁷ Lini agiya ni Yesu sunugi Musuk mamba ay kagiya, Musuk mamba hurugi may ni agi ka hal sa a takagi dla oloɗi, Musukka takagi dlara ki ni halaŋ, dlara ndaɗ haɗagirara ni gasi, kaboyna ka huɗi ni kay ndaɗta agi vagi vun haɗta vi Musuk Lonara taɓagi hurugi dew u Kristu.

²⁸ Gasi goryonu, hurugi li taɓi dew u Kristu, a falira nam hin a mbara aygi wi ki kaygi gasi ana zolo ka caygi fokombi.

²⁹ Agi wi kagi ana Kristu ni sa ɗegeena, agi wi kagi ana sa ma li dlara ɗegeera ni goŋ Lonna.