1 JAŊ 1 - Boy Lonana

Boy ma kay iirirana

¹ Ami ɓiirigi ha ni kay boy dla iirira, ndaɗ ay ni u ura tin ayra day, ami hum boy namma u humumiya, ami wam u irimi lay, ami gol boy namma komi ŋgenem lay.

² Iiri ndaɗta gi u taɗ ki sini ami waɗu, ni kay ndaɗta ami mbuɗ a suu vovoɗta kay boy namma ami ɓakagi kay iirira ka daɓ kiɗira, ndaɗ ay ni eg Buna hin gi uɗ ki irimiya.

³ Va ma ami wamma, ma ami humumma may ni ami dagina ki magi agi may, a kay me aygi taɓaygi ki dew hu taɓ mamira u Buna u Goromma Yesura.

⁴ Ami ɓiirigi dla ndaɗta ha ni a furi mamira vunuɗ faɗ kiyo.

Lona ni kiɗikka

⁵ Gola ni boy ma ami humum ay fun Yesu Kristu hin mba jokogina kina ana Lon ni kiɗikka dlara ndufun ka hurum ndeɗi.

⁶ Lini aygi daygi ana aygi taɓi u namu li hin laygi dlaaygira duk ndufunda may ni aygi mbuɗ taygi ni kaboyna u njaɗ maygira u dlara aygi laɗ u bik koygira lay.

⁷ Lini aygi laygi dlaaygira hu kiɗikka ko Lona u tamba hu kiɗikka na may ni, aygi ki taɓi dew u suu hiŋŋa busu Yesu Goromma hin mbusuygi ki ko co maygira halaŋ.

⁸ Lini aygi di ana cora ka huruygiɗi ni, aygi viɗ ii taygi ni viɗiya, gasira ka huruygiɗi lay.

⁹ Lini aygi di cooygira ki fok Lona ni, aygi ndak a ɦam huruygi halaŋ kay me nammi sa ma ɗili ma ɗegeena, nam hin daɓaygi cooygira kiyo hin mbusuygi ki ko dla cooygira halaŋ.

¹⁰ Lini aygi di ana aygi li co kaɗi ni, aygi mbuɗuygi Lona ki ni sa kaboyna, ni boy mamma ka huruygiɗi lay.