1 DLAŊ MULINARA 29 - Boy Lonana

ɦalla kay a min Ziŋ Lonara

¹ Mulna David di suu tokina halaŋ ana, «Goronna Salomon ma Lona manam ki dewna ni gogoona, maŋi lay, sunda ŋgol cocoo kay zi ma namma ka ni maŋ saɗi ni vi Yawe Lona.

² An min tlena ka kay Ziŋ Loonnara u saɓakan halaŋ, lorra kay tlesuu hin lasi u lorrana, doonora kay tlesuu hin lasi u doonora, walakka kay tlesuu hin lasi u walakkana, kawina kay tlesuu hin lasi u kawinana, guna kay tlesuu hin lasi u gunana, ɦinira keleɗta, ɦinira ceɗira, ɦinira warra taɗ ndalira, ɦinira jivira iriɗ zeɗ zeɗ bel coco may.

³ Kayam hu olo an furi kay Ziŋ Loonnara, lorra u doonora suu kon kay tanna an ɦasi ki kay Ziŋ Loonnara kay tlesuu an minisi ki kay zira teteɗ ndaɗtana.

⁴ Kelew lorra 100.000, lor mayra gusuɗ loɓma ɦayra, Kelew doonora ki yoorira 240.000 a guluɗ pay ziginina.

⁵ Kay tlesuu mini u lorrana halaŋ, kay tlesuu mini u doonora halaŋ, kay tlesuu suu li sunda minisina halaŋ. Sa tam ki mini a ɦal tlena maŋ Yawe karam u hurum dewna ni gege?»

⁶ Na ɗaŋŋi suu ŋgolo suu fok suunana, suu fok suu Israelna, suu fok suu buɓ buɓma, suu fok suu kis kisna, suu hin tasi ki kay dlaŋ mulnarana ɦal tlena u hurusi ma dewna.

⁷ Asi ɦasi ni a li sun Ziŋ Lonara, suu mini u lorra kelew 60.000, u lor daŋga kelew 84, suu u doonora kelewna 300.000, suu u walakkana kelewna 600.000, suu u kawinana kelewna 3,000,000.

⁸ Suu gogoyra gus loɓma ka varasina ɦaɗ ki a begera kay sun Ziŋ Lonara ko Yehiyel ma Gersonna.

⁹ Suuna li furira kay ɦal masira u hurusi dewra kay ana asi ɦal tlena ni u hurusi dew maŋ Yawe. Mulna David furi ŋgol coco lay.

Cenda David cenda

¹⁰ David gi deɓpa maŋ Yawe fok suu tokina di ana, «Ko suuna ŋgaaŋŋi seŋu, Yawe, Lona vi suu Israelna, bumi ma ay day day a fafaɗtana.

¹¹ Ŋgolla, saɓakŋa, bibiŋilla, mulla ni maŋ aŋ Yawe kay ana tlesuu huulonana halaŋ, tlesuu kay ndaŋgarana halaŋŋi maŋsina. Mulla u ŋgolla kay suuna halaŋga ni maŋ aŋ, Yawe.

¹² Begera u saɓakŋa col ay ni koŋu. Aŋŋi sa ti kay tlena halaŋŋa. Eŋga u saɓakŋa ay ni koŋu, saɓak ma tli suuna kolo, ɦasi eŋgana.

¹³ Cecem wanda, Loomina, ami gaŋdeɓe, ami geleɗeŋ seŋ ma saɓakŋa ɦayna.

¹⁴ Kay anni gege? Suu mansina ni gege? May a fi saɓak ma ɦal tlena u hurumi ma dewna ko tlesuu wanna na ni ge? Tlena halaŋ col ay ni koŋu, tlesuu ami ɦaŋsina wanna col ay ni koŋu.

¹⁵ Kay ana ami fokoŋŋi koyogina, suu vi koyogina ko ndal somoyomi li ay halaŋga na may. Burumi ma kay ndaŋgarana ni ko ndal ŋgusna na, ka saaɗi.

¹⁶ Yawe, Loomina, tlesuu bolow suu ami minisi halaŋ ca a miniŋ zira kay seŋ ma teteɗna wanna halaŋŋi col ay ni koŋu, ni maŋsina lay.

¹⁷ An wi ana aŋ, Loonna, wi huu suuna. Aŋ minni ɗegeera. An may ni u hurun ma ɗegeena an ɦaŋ tle asina halaŋ. Cecem wanda suu maŋsuu ka tanina an ka wasi asi ɦal tlena u furira u hurusi ma dewna.

¹⁸ Yawe, Lona vi Abraham, vi Isaak, vi suu Israelna, somoyomi ka u huu suu maŋsina hurusi a fafaɗta, tuɗusi u huu ma dewna egeŋu.

¹⁹ Ҥal huu ma ɗegeena maŋ goronna, Salomon, a vaŋ gaɗ maŋga, vi vun maŋŋa, gaɗ maŋga a li sunda miniŋ ziiŋ ma an min tlena ka kamma.»

Salomon mbuɗ ki mulna. Miɗ ma David miɗna

²⁰ David di suu tokina halaŋ olo ana, «Gagi deɓ Yawe, Loogina.» Suu tokina halaŋ gi deɓpa maŋ Yawe, Lo ma vi somoyosina. Asi goɓ kaŋga u vok givisi fok Yawe, fok mulna.

²¹ Vin ŋgoo buu namma asi li ɓivunna maŋ Yawe, lam ɓi vun ma ŋgalam ki ŋgalina, bolo mbutlina buɓ, gamlagina buɓ, gor timigiina buɓ u ɓivun ma ɦawana may, ɓivunna bolow coco kay suu Israelna halaŋ.

²² Asi ti may, ci may, fok Yawe hu buu namma, li furira ŋgol cocoo, a mbara ni asi tin Salomon ma goŋ Davidna ki mulna. Asi hin fuurum ki a mulna maŋ Yawe ko mulna na maŋ Yawe, Sadok a mul ma li ɓivunna may.

²³ Salomon kak kay dlamba mulla vi Yawera a mulna balam bum David. Nam li dlara yalna cocoo. Suu Israelna halaŋ humum coco may.

²⁴ Suu ŋgolona halaŋ suu saɓakŋa, u goryoŋ mulna Davidna halaŋ hum u mulna Salomon.

²⁵ Yawe mbuɗ Salomon ki ŋgolla cocoo fok suu Israelna halaŋ. Nam ɦam saɓakŋa hu mul mamba, mul ma ay ki fok jew kay suu Israelna ma fi saɓakŋa ko nam na kaɗi.

²⁶ David ma goŋ Jesena ti mulla kay suu Israelna halaŋ.

²⁷ Nam ti mulla kay suu Israelna ni basara dok-fiɗi. Nam ti mulla ay hu Hebronni basara kiɗisiya, hu Yerusalemmi basara dok hindi yam hindi may.

²⁸ Nam miɗ ni mbuɗ maara u jivira daɓ buu mamma kiyo, fi bege mamba u bibiŋilla kiyo. Goromma Salomon ti mulla balamamu.

²⁹ Sunda mulna David laɗ jewra ura daganda ka kaŋga ɓiiri hu sunda vi Samuel sa ma wi dlara li ha fokka duk sunda vi sa jok vun Lona Natanda, duk sunda vi Gad, sa ma wi dlara li ha fokkana may.

³⁰ Mulla nam taɗta u saɓkam lay, tukka zeɗ zeɗ ta lamba lay, kay suu Israelna kay mulla hu mbassara halaŋ lay.