1 DLAŊ MULINARA 28 - Boy Lonana

David tak Salomon ki a mul ma varak balamamma

¹ David tok muli suu fok suu Israelna hu Yerusalem halaŋ, suu hu njaf suunana u suu hu dee suunana suu li sunda vi mulnna, suu fok suu buɓ buɓma, suu fok suu kis kisna u suu kay begera u yoori suu vi mulnana u goryomu, suu fokomma, suu duuna u suu dlasi ŋgolona halaŋ.

² Mulna David col kolo dasi ana, «Humungi haa, gorsenna u suu mansina. An hurun ka tini a min zira Zandukka Galamba vi Yawera hin koɗ taɗ hura u li ma Looygina hin tin sem huna. An min tlena ka ki a miniɗta.

³ Na may ni Lona dan ana, Aŋ hin ka min zira u senɗi. Kay ana aŋŋi sa duuna, aŋ vo busuna ki kaŋga cocoo.

⁴ Yawe, Lona vi suu Israelna, manan ki duk suu mansina halaŋ a li a mulna kay suu Israelna a fafaɗta. Kay ana nam man sa tuɗ fokosina ni Yuda, hu zi ma vi Yudana, hu ziŋ bunna, duk goryoŋ bunna, an irim jivi a kak mulna kay suu Israelna halaŋ.

⁵ Duk goryon halaŋ kay ana Yawe ɦan gorra bolow cocoo. Nam man goronna, Salomon, a nam kak kay dlamba mulla vi Yawera kay suu Israelna.

⁶ Nam hin dan olo ana, Goroŋŋa, Salomon, ni sa hin minin zira a liin ma tuɗtana, kay ana an manammi ko goronna na may. An hin li ni bum may.

⁷ An tinim mul mamba ni a fafaɗta lini ko ndal karam na nam kak ɗegee, takan gaɗ manda ki may li u vunun ma an vamma may.

⁸ Cecem wanda ɗaŋŋi ii suu Israelna halaŋ, suu vi Yawe suu toki fok Looyginana, vagiya takagi gaɗta vi Yawe Looyginara ki halaŋ a agi fagi mbas mayra jivi ndaɗta hiniɗ ka a jona maŋ goryogi ŋgoorogi dagan a fafaɗta.

⁹ «Aŋ taŋga, goronna, Salomon, wi Lo ma vi buŋŋa kiyo, lam sunda u huruŋ ma dewna u musukuŋ toki dew, kay ana Yawe wi huuna, wi saara huu sanara halaŋ lay. Lini aŋ halamu ni aŋ hin famu, lini aŋ noyom kiyo ni, nam hin noyoŋ ki a fafaɗta.

¹⁰ Aŋ gol cemmi wanda, Yawe manaŋ ki a minim zira li ma li ɓivunna, kak ɗegee li sunda.»

David ɦal tlesuu min Ziŋ Lonara maŋ Salomon

¹¹ David ŋga fiyek li ma fun zirana maŋ goromma Salomon. Li ma vi zigininana ma vi zigini suu mol tlena huna u zigini suu kolo fiyekina, hurusi ma kurufuna ma vi zira bulum cora ki huruɗta.

¹² Yal dlara nam tini hurum gin a laɗ kay li ma fun Ziŋ Yawerana lay ma kay zigini suu ŋguy kaɗna halaŋ lay, ma kay li ma begera vi Lonara huna u ma kay tlesuu teteɗ suu li ɓivunnana lay.

¹³ Kay dee suu li ɓivunna, kay suu Levina, kay joɓ mayra kay sunda laɗ hu Ziŋ Yawera, kay tlesuu sun suu li Ziŋ Yawerana.

¹⁴ Kay lorra, u nek tlesuu mini u lorrana halaŋ suu hu sunda zeɗ zeɗtana kay tlesuu mini u doonora u nek tlesuu hu sunda zeɗ zeɗtana halaŋ.

¹⁵ Kay givin ma mini u lorrana u pindilla mini u lorra u nek givinna dew dew u pindilla hurumba, kay givin ma mini u doonora u nek givinna u pindilla hurumba u sun givinna ki dew dew may.

¹⁶ Nek lorra kay tabulla cuk tlesuu li ɓivunna ta dewra, nek doonora kay tabul suu mini u doonora.

¹⁷ Tlesuu gaɓ tlena, tassana u geeleŋga suu mini u lorra ki teteɗta, tlesuu ci suu mini u lorra u nek tlesuu cira ki na dew dew u tlesuu ci suu mini u doonora u nek tlesuu mini u doonora dew dew may.

¹⁸ Kay givin ma togolla ma ŋgal mbul ma hisna huna, ma mini u lorra teteɗtana u nekem may, kay pus pusna, Serubim suu mini u lorra suu garaŋŋasi ki ɓeerina kuluɓ yam Zandukka Galamba vi Yawera kina.

¹⁹ Tle asina halaŋŋi Yawe ma takan yal sun ndaɗta a lirana ɓii tle asina ni u bik komu.

²⁰ Na ɗaŋŋi David di goromma Salomon ana, «Li sunda u huruŋ dew, so taŋ funu. Li ndaaɗi, dlakgi lay kay ana Yawe Lona, Loonna ka u aŋu. Nam hin ka hiniŋ kiɗi, ka noyoŋ kiɗi lay ta ta sun Ziŋ Yawera hin daɓ kiyo.

²¹ Gola ni dee suu li ɓivunna u suu Levina kay sun Ziŋ Lonara. Aŋ suuna ka uŋu, aŋ hin daɓ sun ndaɗta kiyo, suu hurusi jivi suu li sunda u yalna cocona kaa, suu ŋgolona u suuna halaŋ hin li u gaɗ maŋga.»