1 DLAŊ MULINARA 26 - Boy Lonana

Dee suu fun zirana

¹ Suu gol vun zira ni suu vi Korena Meselemiya ma goŋ Korena duk goryoŋ Azafna.

² Meselemiya goryommi Zekari ni ma vuɗ jewna, Yediyael ni ma a mbarana, Zevadya ni ma a hindirana, Yatniyel ni maa fiɗirana.

³ Elammi ma a vadllana, Yehohananni ma a karkiyarana, Elyehoenay ni ma a kiɗisiyarana.

⁴ Obed-Edom goryommi, Semaya ni ma vuɗ jewna, Yehazabad ni ma a mbarana, Yoa ni ma a hindirana, Sakar ni ma a fiɗirana, Nataneyel ni ma a vadllana.

⁵ Amiyel ni ma a karkiyarana, Isakar ni ma a kiɗisiyarana, Peuletay ni ma a kalavandirana kay ana Lona paɗ vunum ki kamu.

⁶ Goromma Semaya, goryom suu nam vuɗusina fi palaɗta kay suu hu dee masirana, kay ana asi ni suu dlasi ŋgolona.

⁷ Goryoŋ Semayana ni Otni, Refael, Obed, Elzavad u gorsemma ni suu dlasi ŋgolona, Eli u Semakya.

⁸ Suu halaŋ ca asina ni goryoŋ Obed-Edomma. Asi lay goryosi u gorsesina ni suu dlasi ŋgolona kay saɓak ma asi lam hu sun masirana. Asi suu vi Obed-Edomma ni dok karkiya yam mba'.

⁹ Goryoŋ Meselemyana u gorsemma may doogo yam kalavandi ni suu dlasi ŋgolona.

¹⁰ Hosa duk goryoŋ Merarina goryommi Simri ni ma ŋgol ma fokosina, nam ka ni goo ŋgolnaɗi, may wayamma tinim fokosi a ŋgolla ni namu.

¹¹ Hilkiya ni ma a mbarana. Tebaliya ni ma a hindirana. Zakari ni ma a fiɗirana. Goryoŋ Hosana u gorsemma halaŋŋi doogo yam hindi.

¹² Kay suu fun zirana, suu ŋgolo suu fok suunana sunda laɗ hu Ziŋ Yawera hoŋ ay kosi ni ko ndaɗ ay ko gorsesinara na.

¹³ Col ha kay suu gori cocona day tew ki kay suu ŋgolona asi li ŋgaɓpa ni u deeresi kay vun zira dew dew bel.

¹⁴ Kay u maɗiina ni ŋgaɓpa ndi ni kay Selemiya. Kay goromma Zakari sa ma ɦal gaɗta jivi cocona ŋgaɓpa ɦammi ii mbayawna.

¹⁵ Obed-Edom fi ni ii daliya, goryom gol ni vun zigini suu cuk tlena huna.

¹⁶ Supim u Hosa ɦasi ni li ma u fiɗigina u vun grek ma Saleket ma hu voɗta mbuyrana. Sunda zeɗ zeɗta ni

¹⁷ u maɗiina ni suu Levina karkiya karkiya hu buuna tew tew, ii ko dalina ni suna fiɗi fiɗi hu buuna tew tew, ii ko mbayawna ni suuna fiɗi fiɗi hu buuna tew tew, suu gol u vun zigini suu tlena cuki huna ni mba' mba' hu buuna tew tew.

¹⁸ Kay li ma u fiɗigina suu gol u voɗta ni fiɗi, suu gol u lina ni mba' may.

¹⁹ Goryoŋ Korena u goryoŋ Merari suu gol u vun zira irisi ɓorowira ni ko wanda na.

Sunda hiniɗ maŋ suu li ɓivun suu ɦiwra

²⁰ Suu Levi suu ɦiw u gorsesina yasi ki kay a gol u tlesuu hu Ziŋ Lonara u tlesuu li ɓivunna.

²¹ Goryoŋ Ladanna, goro ŋgolo suu Gerson suu vi Ladan suu ŋgolo suu fok suu hu deera vi Ladan ma Gersonna ni suu Yehelna.

²² Goryoŋ suu vi Yehilna, Zetam u wayamma Joel yasi ki kay gol begera hu Ziŋ Yawera.

²³ Kay suu vi Amramma, suu vi Isarna, suu vi Hebronna, suu vi Uziyelna,

²⁴ Sebuel ma goŋ Gersomma, ma goŋ Moizna ɦam ŋgolla kom kay begera ni namu.

²⁵ Gorsem suu vi Eliyezerna ni Rehabiya gorom ma vuɗ Yesayana ma vuɗ Yoramma ma vuɗ Zikrina ma vuɗ Selomitna.

²⁶ Selomit u gorsem ma yasi ki kay a gol u tlesuu teteɗ suu vi mulna David suu fok suu hu dee masirana, asi ni suu ŋgolo suu fok suu buɓ buɓma, suu kis kisna, suu ŋgolo suu fok suu asgaanana.

²⁷ Asi hinisi ki kay tlesuu yowosi ay hu jo suuna fun duunana, a gol u Ziŋ Yawera may.

²⁸ Tlesuu sa wi dlara ha ki fokŋa Samuel hinisi kana, Sol ma goŋ Kisna, Abner ma goŋ Nerna u Joab ma goŋ Seruyana, tlesuu hinisi ki a sunda asina ɦasi ko Selomit u gorsemma.

²⁹ Kay suu vi Isarna, Kenaniya u goryom yasi ki kay dlara mbay hu li ma daŋŋa eg suu Israelna ko ndal suu ɓii magaara u suu kaɓakŋana na.

³⁰ Kay suu vi Hebronna, Hasabiya u gorsemma suu dlasi ŋgolona ndumusi ni buɓ duk kis kis kiɗisiya, suu gol u suu Israelna u fiɗiginai fun lum ma Jurdenna kay dlara vi Yawera halaŋ u sunda vi mulnara lay.

³¹ Kay suu vi Hebronna, Yeriya ni sa ŋgol ma fokosina. Asi hal u dlara ay hu dee masira hu basara vi David ta mulla ta dok-fiɗira. Asi hin fi suu dlasi ŋgolona dukusi hu Yazer ta Galaadta.

³² Asi u gorsemma halaŋŋi suu dlasi ŋgolona 2,700. Suu ŋgolo suu fok suunana, suu mulna David tinisi kay suu vi Rubenna, suu vi Gadna u nus njaf suu vi Manasena kay dlaŋ Lonara halaŋ, kay dlaŋ mulnara halaŋ may.