1 DLAŊ MULINARA 21 - Boy Lonana

David ndum suu Israelna kiyo

¹ Satanna min tam eg suu Israelna so u David a nam ndum suu Israelna kiyo.

² David di Joab u suu ŋgolo suu fok suunana ana, «Tuɗugi ndum suu Israelna aya, col ha kay Berseba ta ta tew ki hu Dan, ɦangisina ndumusi ay a an wasi kiyo.»

³ Joab di ana, «Ko Yawe zul ndum suu Israelna su jewra ko yamba va kis na. Halaŋ ca ni ka asiɗi suu malanna mulna, suu li sunda vi malanna naɗi su? Malanna hal u dla ndaɗta ki na ni kay mege? Dla ndaɗta hin ndi kay suu Israelna ni kay mege?»

⁴ Na may gaɗta vi mulnara su kay Joab. Joab hin tuɗ ŋguy suu Israelna ay ki halaŋ, ɗaŋŋi nam hin hoŋ ay Yerusalem.

⁵ Joab hin ɦal ndum suuna maŋ David, suu Israelna ndumusi halaŋŋi 1,100,000 ni suu ndaki a duu u ŋgewnana, suu vi Yudana 470,000 ni suu ndaki a duu u ŋgewnana.

⁶ Nam ndum suu vi Levi u Benjaminna ka dukusiɗi kay ana boy ma vi mulnana ɓeŋ hu Joab ki ŋgol cocoo.

Lona gi David daŋgayna kay coomba

⁷ Dla ndaɗta ii Lona coo. Nam ci suu Israelna.

⁸ Na ɗaŋŋi David di Lona ana, «An li ni suluk ma ŋgolna. Cecem wanda ɗaŋŋi heɓ huruŋ ki kay suluk ma vi saaŋ ma sundana kay ana gasi daŋ may ni an li dla ndaɗta ni ko sa puluɗina na.»

⁹ Yawe ɓak Gad sa ma gi u dlara ki maŋ Davidna ko wanda na,

¹⁰ «Tuɗ di David ana, Yawe ɓak anaba, An tiniŋ tlena fokoŋ hindi, man maa duk dew, an hin lamu.»

¹¹ Gad tuɗ fi David dam ana, «Yawe ɓak anaba, aŋ vi kaŋ ni aŋu.

¹² Basara hindi ta mayra ci suunara ɗowba tilna hindi ma suu babalira ci suuna ki u ŋgewnara, ɗowba buuna hindi ŋgew Yawena u tuguɗi bora ndi hu mbassara. Sa sunda vi Yawena ci suuna ki kay ndaŋgara Israella halaŋga. Cecem wanda gol dlara an hin hoŋoɗ dira maŋ sa ma sunun aynara.»

¹³ David di Gad ana, «Anni hu hahawra ŋgolla. Ko an ndi ni hu duk ko Yawe na ɗow, kay ana oo mamba ŋgolo, na may ko an ndi hu duk ko suu warnaɗi.»

¹⁴ Yawe hin sun tuguɗi bora kay suu Israelna. Suuna hin miɗ ki na buɓ buɓ dok-kiɗisiya duk suu Israelna.

¹⁵ Lona sun sa sunda huulona ay hu Yerusalem a ɓeŋeɗ kira. Hu li ma nam ɓeŋeɗ ki nana ni Yawe gol na ni hurum ɓeŋ ki kay dlara hahaw ndaɗta. Nam di sa sunda huulona ma ɓeŋeɗ ki namma ana, «Na ga, cecem wanda tli koŋ kiyo.» Doli ɗini sa sunda huulona colira ni eg maɗakŋa vi Ornan ma Jebusna.

¹⁶ David tli irim koloo ni wi sa sunda vi Yawe coli duk ɦoŋ ndaŋgara u huulona, ŋgew mamma ki kom kawi siiliya, irim pereɗi kay Yerusalem. David u suu basina puk kaŋgaa, baraw bolla tasiya.

¹⁷ David di Lona ana, «An di ana ndum suuna aya ni ka anɗi su? Anni sa li sulukŋana, ni sa li dla corana. Na may ni timigii asina li ni me may ɗaŋge? Yawe Loonna ko koŋ li kan u suu mansina may ko kay suu maŋsina dla ndaɗta li kasi a dla coɗi.»

David min li ma li ɓivunna maŋ Yawe

¹⁸ Sa sunda vi Yawe di Gad ana nam ɓak David ana, «Ko David tuɗ min givin ma togolla maŋ Yawe hu li ma to wana vi Ornan ma Jebusna.»

¹⁹ David tuɗ ko boy ma Gad dam u sem Yawena na.

²⁰ Ornan to wa blena, nam pereɗ irim dagan hin wi sa sunda huulona, goryom suu ay um fiɗina ŋgay tasi kiyo.

²¹ David mbay eg Ornan. Ornan gol irim na ni, wi David. Nam kal ay ki hu li ma to wa blena kal ni, goɓ kaŋga fok David, vogom kaŋga kay ndaŋgara.

²² David di Ornan ana, «Ҥan li ma to wana ki an hin min givin ma togolla maŋ Yawena huwa. Ҥanna ki kay gusumba gasira u gursura. Na ɗaŋŋi tuguɗi ŋgolla hin ɦuɗ ha ki eg suuna na day.»

²³ Ornan di David ana, «Tlam ki maŋu. Ko malanna mulna li dlara hurum miniɗta. Aŋ gola, an ɦal mbutlina ki a li ɓi vun ma ŋgalam ki ŋgalina, pus pusna ki a gu ma ŋgalla, wa blena ki a puura. An ɦal tlena bel.»

²⁴ Na may mulna David di Ornan ana, «Ҥawaa, an min a gusummi u gursura. An hin ka tlaŋ vaaŋŋa ki maŋ Yaweɗi, li ɓivun ma ŋgalam ki ŋgalina u va ma gusum kaɗinaɗi.»

²⁵ Na ɗaŋŋi David ɦal lorra maŋ Ornan kay li namma kelewna kiɗisiya ii sikle 600.

²⁶ David hin min givin ma togolla maŋ Yawe, li ɓivun ma ŋgalam ki ŋgalina u ma heɓ dukka. Nam yi Yawe kolo. Nam hoŋom dira ay u kura col ay kolo huulona mba kay givin ma togolla.

²⁷ Yawe di sa sunda huulona olo ana nam hoŋ ŋgew mamma hu ziimu.

²⁸ Hu li namma ɗaŋŋi hu li ma David wi ana Yawe hoŋom dira ki kay li ma to wa ma vi Ornan ma Jebusna ni nam hin li ɓivunna.

²⁹ Doli ɗini Ziŋ Yawera Moiz miniɗ ki bagi hu fullara u givin ma togolla hu coki ndaɗta ay ni kolo kay li ma buy ma Gabaonna.

³⁰ Na may David ndak ka tuɗ kolo kay li namma a ɓak u Lonaɗi kay ana nam mbuɗ ki ndaana ko ŋgew ma vi sa sunda vi Yawena.