1 DLAŊ MULINARA 20 - Boy Lonana

David tli ɦoŋzi ma Rabbana kiyo

¹ Tew ki hu cokira mulina hoŋ ki bagi fun duunara, Joab yow suu asgaarina um ɓeŋ mbassa vi goryoŋ Amonna kiyo. Olo, asi hin vi kaŋ masina fok Rabba. David buu ni hu Yerusalem gaw may. Joab tli Rabba ki hin ɓeŋeɗ kiyo.

² David tli jumba mulla kay yam Milkomba kiyo, tlaɗ nekeɗ ii va ma kelew lorra dok-hindi. Ҥinira gus loɓma egeɗu. Asi tiniɗ ki kay yam David. Nam yow tlena ay hu jona ŋgol cocoo.

³ Nam dik suu hu ɦoŋzinana hin hinim ki a li sun guna, li sun kawina, a ka guna u njeɗna. Na ɗaŋŋi David li u ɦoŋzi ma vi goryoŋ Amonna halaŋŋi na. David u suuna halaŋ hin hoŋ ay Yerusalem olo.

Duu ma lam u suu Filistinna

⁴ Ŋgoo dagan dla ndaɗta, duuna hin li hu Gezer u suu Filistinna. Ni hu li namma ɗaŋŋi Sibkay ma Husana ci Sipay maa dew duk goryoŋ suu Refayna. Asi hin lasasiya.

⁵ Duu ma daŋŋa hin li u suu Filistinna olo. Elanan, ma goŋ Yairna, ci Lami, ma wayaŋ Goliyat ma Gatna, kiyo, ma gu saɓ mamba ɓulumba ko ndal gu ma vi suu cil barawnana na.

⁶ Duu ma daŋŋa hin li hu Gat olo. Sa wuli fiyek cocona gogor kom karkiya karkiya, ndumusi taɓ halaŋ dok mba yam fiɗi. Nam tamba lay ni hu njafna vi Harafana.

⁷ Nam nday ɓaraŋga a duu u suu Israelna u Yonatan ma goŋ Sama, wayaŋ Davidna hin cam kiyo.

⁸ Suu asina ni suu hu njaf Harafa ma Gatna. David u suu mam suu li sunda casi kiyo.