1 DLAŊ MULINARA 19 - Boy Lonana

Suu David sunusi ayna asi panasiya

¹ Ŋgoo dagan dla ndaɗta, Nahak, mul ma vi goryoŋ Amonna, miɗ kiyo. Goromma hin mbuɗ mulna balamamu.

² David di ɗaŋŋi ana, «An hin li dlara ɗegeera eg Hanun, goŋ Nahakŋa, kay ana bum lan dlara ɗegeera egenu.» David cuk suu vun sunda egem a heɓem hurum kay bumba, suu sun suu vi Davidna tew ki hu mbassa vi goryoŋ Amonna eg Hanun a heɓem hurumba.

³ Na may muli suu vi goryoŋ Amonna di Hanun ana, «Aŋ saa kaŋŋi ana David cuk suuna ay ni kay a heɓeŋ huruŋga su? Asi mbay ka ni a gol mbassa, a yow suuna kolo eg tasi hin a tli mbassaraɗi su?»

⁴ Hanun yow suu sun suu vi Davidna welesi yasi kiyo, ŋgaɗasi barawi masisina ki kolo usi duk na poɗogos poɗogos may, hin cukusiya.

⁵ Asi jok boy ma li ay eg suu vi Davidna maŋ David, nam sun sana ŋgafasi vogosiya kay ana asi mbuɗ ki zolona cocoo. Mulna sun ha dasi ana, «Kakagi Yeriko ta ta njeregi hoŋ ki ɗuffa balamaɗ tuwa. Na ɗaŋŋi agi hin hoŋ ay ni na gaw.»

Duu ma lam u suu Amonna u suu Sirina

⁶ Goryoŋ Amonna wi ana asi mbuɗ ki co ii David, Hanun u goryoŋ Amonna sun doonora kelew 34.000 a hoŋ sun masira vo vi suu Sirina fun Lumma u dlamba jakka, vo vi suu Arame suu Maaka u Sobana, pus pusna u suu kulumina.

⁷ Yow pus pus ma li sunda u namma na 32.000, mul ma Maakana u suu mamsina may, mbay vi kaŋ masina fok tasi u Medeba, goryoŋ Amonna hin tok tasi olo, cuk ay ki hu ɦoŋziisina hin mba ki fun duuna.

⁸ David hum dla ndaɗta, sun Joab u asgaa suu duuna halaŋ.

⁹ Goryoŋ Amonna lak ki kay tasi ca ni njaa tasi ay ki a duuna fun grek ma ɦoŋzinana, na may muli suu mbayna lak ki kay tasi duk bubura.

¹⁰ Joab wi ana nam ndak a duu fokom lay, ŋgorom dagan lay ni, nam man suu saɓakŋa duk suu Israel suu duuna njaarasi fok suu Sirina.

¹¹ Suu duuna usira hinda nam ɦasi maŋ wayamma, Abisay, asi njaa tasi fok goryoŋ Amonna may.

¹² Nam hin di olo ana, «Lini suu Sirina saɓak suunu ni aŋ hin mbay njununu, lini goryoŋ Amonna saɓak suuŋu ni an may sa hin njunuŋ may.

¹³ Li saɓaki, takay saɓak mayna ki maŋ suu maysina, maŋ ɦoŋzi ma vi Looynana. Ko Yawe li dlara hurum miniɗta.»

¹⁴ Na ɗaŋŋi Joab u suu duu suu umma ɦuɗ tasi ha a duu suu Sirina. Suu asina yow liŋŋa komu.

¹⁵ Hu li ma goryoŋ Amonna hum ana suu Sirina yow liŋŋa ni asi tasira yow liŋŋa ko Abisay wayaŋ Joabma, asi hin ɦoŋ hu ɦoŋzina. Joab hin hoŋ hu Yerusalem may.

¹⁶ Suu Sirina wi ana suu Israelna poŋosiya. Asi sun suu vun sunda ay hoŋ suu Sirina ha ki fun lumma ii ko hiŋŋa. Sofak sa ŋgol asgaa ma vi Hadadezerna tuɗ fokosiya.

¹⁷ Asi ɓak boy namma maŋ David. Nam tok suu Israelna halaŋ ɗiŋ lumma kiyo, tew ki egesi, njaa tasi ki fok suu Aramena a duuna. Suu asina duurusiya.

¹⁸ Suu Sirina yow liŋŋa ko suu Israelna. David ci suu Arame suu pus pusna buɓ buɓ kiɗisiya, ci suu tuɗ duuna u sesina buɓ buɓ dok-fiɗi. Nam casi ŋgol asgaa masina Sofak ki lay.

¹⁹ Suu li sunda vi Hadadezerna wi ana suu Israelna casi wa ni, asi taɓ dukusi u David hin lam sunda. Suu Sirina min ka a mbay njun goryoŋ Amonna oloɗi.