1 DLAŊ MULINARA 18 - Boy Lonana

Tira David ti kay njaf suu ŋguy kammara

¹ Ŋgoo dagan dla ndaɗta, David ci suu Filistinna hin homosi ki umu. Nam tli ɦoŋzi ma Gatna u zi ma ŋguy kaɗna ki ko suu Filistinna.

² Nam tli Moab, suu Moabma mbuɗ ki ni suu mam suu lam sunda, yasi gii kaŋga um warakam taara lay.

³ David ci Hadadezer, mul ma Sobana hu Hamat, hu li ma nam tuɗ a ti mulla kay lum ma Efratnara.

⁴ David yowom pus pus mamma ki na buɓ, suu mam suu duu u kulumina ki na buɓ buɓ kiɗisiya, suu tuɗ duuna u sesina na buɓ buɓ dok-mba'. David ka diŋil kulumina ki halaŋ halaŋ hin suu daŋŋa ɦawa kis may.

⁵ Suu Siri suu hu Damasna mbay a njun u Hadadezer, mul ma Sobana, na may ni David ci suu Sirina ki na buɓ buɓ dok-mba' yam mba'.

⁶ Na ɗaŋŋi David tin suu komandana ki hu Siri ta Damassa. Suu Sirina mbuɗ ki ni suu vi David ɗaŋŋi suu warakam taara hum umma. Yawe ɦal saɓakŋa maŋ David hu li ma nam tuɗ huna halaŋ.

⁷ David yow mbari ma lorra ma vi suu sun suu vi Hadadezerna tuɗum ki hu Yerusalem.

⁸ Hu Tibat u Kum ɦoŋzi ma vi Hadadezerna, David yow mbari walakka ki ŋgol cocoo. Salomon mol mbarina ko ndal mbo lum ma ŋgol ma walakka, mol tlesuu sunda egem ko ndal didiŋ walakka na.

⁹ Tou, mul ma Hamatna, hum ana David ci asgaa suu vi Hadadezer, mul ma Sobana, ki halaŋ halaŋŋi

¹⁰ nam sun goromma Hadoram eg mulna David a gam deɓpa, furyum kay lira nam li duuna u Hadadezer hin cam kira, kay ana Hadadezer ni babali ma vi Touna, a ɦam tlesuu mini u lorrana njafasi dew dew bel, suu mini u doonora may suu u walakkana may.

¹¹ Tlesuu asina may ni mulna David hinisi ki maŋ Yawe, doonora may, lorra may, suu nam yowosi ay ko njaf suunana, ko suu Edomma, ko suu Moabma, ko goryoŋ Amonna, ko suu Filistinna u suu Amalekŋa.

¹² Absay, goŋ Seruyana, ci suu Edomma buɓ buɓ doogo yam kalavandi hu ɦuɗugumba vuvuna.

¹³ Nam tin suu komandana hu Edom, suu Edomma halaŋ mbuɗ ki ni suu li sunda maŋ Davidna. Yawe ɦal saɓakŋa maŋ David hu li ma nam tuɗ huna halaŋ.

Sem suu ŋgolo suu vi David suu li sunda

¹⁴ David ti mulla kay suu Israelna halaŋ, lasi dlara jivira u ɗegeera masi asi suu mamsina halaŋ.

¹⁵ Joab, ma goŋ Seruyana, ni ŋgol asgaana, Josafat, goŋ Ahiludna, ni sa jok boyna maŋ mulnana.

¹⁶ Sadok, goŋ Ahitubma, u Abimelek, goŋ Abiyatarna, ni suu li ɓivunna, Savesa ni sa ɓii magaara.

¹⁷ Benaya goŋ Yoyadana ti mulla kay suu Keretena u suu Peletena, suu gol yam mulna, goryoŋ Davidna ni suu jew eg mulnana.