1 DLAŊ MULINARA 17 - Boy Lonana

Boy ma Natan jokom kina

¹ Na ɗaŋŋi David kak hu ziimu. Nam di sa jok vun Lona, Natan, ana, «Gola, an kaki ni hu zira yaɗ vii u gu sedrenara, Zandukka Galamba vi Yawera ka kurufu hu mbutluɓma.»

² Natan hoŋ dira maŋ David ana, «Dlara saaraŋ tini kaɗ a laɗta, laɗu, kay ana Lona ka u aŋu.»

³ Doli ɗini njeŋge ndaɗta gaw ni Lona ɓak boy mamma maŋ Natanni ko wanda na,

⁴ «Tuɗ di saan ma sunda David ana, Yawe ɓak ɗaŋŋi ana, aŋ ka minin zira an kak hura ni aŋgi.

⁵ Kay ana an kak ay ka hu ziɗi col ay hu buu ma an sel suu Israelna ay kina ta ta karami. Na may ni an jok ay hu mbutluɓma ni na jok jok, jok hu ziginina ni na jok jok.

⁶ Hu li ma an tuɗ duk suu Israelna huna halaŋŋi na ni an di boy maŋ sa ma kaɓak maa dew duk suu kaɓak suu Israelna su, ma an ɦam voɗta a taaran suu mansinana dam ana, agi minin zi mayra yaɗ vii u gu sedrena kaɗi ni kay mege?

⁷ Cecem wanda ɗaŋŋi aŋ hin ɓak saan ma sunda David ana, Yawe ma Saɓakŋa Kom Belna ɓak ɗaŋŋi ana, anni sa tlaŋ ay hu li ma taarana, ay ŋgoo yoorina a mbuɗuŋ ki mulna kay suu man suu Israelna.

⁸ An ay u aŋŋi hu li ma aŋ ay huna halaŋ. An caŋ suu babali maŋsina ay ki fokoŋ halaŋ. An hin mbuɗuŋ seŋ ki ŋgolla ko ndal sem suu ŋgolo suu kay ndaŋgarana na.

⁹ An hin man lina ki kay suu man suu Israelna. An hin ŋgeeresi usi kaŋgaa. Asi hin kak eg liisi ma dewna. Asi hin ka li ndaa oloɗi. Suu ci suuna kina hin ka hoŋ a dogosi vunusi ko jewra na oloɗi.

¹⁰ Col ay hu buu ma an tin suu kaɓakŋa kay suu man suu Israelna day ni, an homosi suu babali masisina ki usiya. An hin daŋ ki ana Yawe hin miniŋ zira kagiya.

¹¹ Hu li ma buu maŋŋa daɓ ki wa a tuɗ u somoyoŋga ni, an hin mbuɗuŋ njafaŋ ka ŋgoroŋ ŋgolla, hin li ni sa maa duk goryoŋ dew. An hin tinim mul mamba saɓakŋa.

¹² Nammi sa hin minin zirana. An hin kakam kay mulla a fafaɗta.

¹³ An hin li ni a bumu. Nam hin li ni a goronna may. An hin ka ɓeŋ ɗegee manda u namba ki ko ndal an ɓeŋeɗ ay ki u sa ay fokoŋ jewnara naɗi.

¹⁴ An hin kakam iiri a fafaɗta hu ziinda, hu mul manda, mul mamba hin li saɓakŋa ni a fafaɗta.»

¹⁵ Ni u boy namma halaŋ, Natan ɓak David ni u dlara nam waɗta halaŋ.

Cenda David cenda

¹⁶ David mbay kak ki fok Yawe hin ɓak ki ana, «Anni gege, Yawe, Lona, ziinda ni tara a aŋ tewen ki ta ta tani na day ni ge?

¹⁷ Doli ɗini iriŋŋi dlara goo ɦawaa Loonna, aŋ hin ɓak kay ziŋ saaŋ ma sundara ay ki ni jew day. Aŋ golonni ko sa ma dlam ŋgolna na, Yawe, Lona.

¹⁸ Va ma David hin daŋŋa su wanna ni me olo kay saɓak ma vi saaŋ ma sundana ni ge? Aŋ taŋga wi saaŋ ma sunda.

¹⁹ Yawe, ni kay dlaŋ saaŋŋara, aŋ li dlara ŋgol ndaɗta ni kay a tak dlaaŋga ŋgolora ki halaŋga.

²⁰ Yawe, sa ma ko aŋ na kaɗi, ko ndal dlara ami humuɗ u humumira na ni, Lo ma daŋ ko aŋ na kaɗi, ni aŋ dew.

²¹ Na ni njaf suu daŋ ka kay ndaŋgara ko suu Israelna suu maŋsuu aŋ Lona tuɗ hoŋosi ay gussa a mbuɗusi ki suu maŋsina a suuna li ndaana u seŋ ma ŋgolna, dik njaf suuna ki fok suu maŋ suu aŋ hoŋosi ay gussa hu Egiptena.

²² Aŋ ɦal taŋ ki kay suu Israelna a mbuɗusi ki suu maŋsina a fafaɗta, aŋ, Yawe, may ni mbuɗ ki a loosina.

²³ Cecem wanda ɗaŋŋi, Yawe, ko boy ma aŋ ɓakam kay saaŋ ma sundana kay ziimma li gasi a fafaɗta. Aŋ li ko aŋ dira na.

²⁴ Ko dlaaŋga li gasi, ko suuna ŋgaaŋ seŋ a fafaɗta, ko asi di ana, Yawe ma Saɓakŋa Kom Belna ni Lona vi suu Israelna, nammi Lona vi suu Israelna, ko ziŋ saaŋ ma sunda Davidna kak saɓakŋa fokoŋu.

²⁵ Gasi daŋ may ni aŋ taŋga, Loonna, ne yam saaŋ ma sunda a dam ana aŋ hin minim zira kamu, gola ni kay ndaɗta saaŋ ma sunda fi saɓakŋa a ceneŋŋi na.

²⁶ Cecem wanda, Yawe, aŋŋi Lona, aŋ ɓak kay heɓ ndaɗta maŋ saaŋ ma sunda ni aŋu.

²⁷ Cecem wanda ɗaŋŋi paɗ vunuŋ ki kay ziŋ saaŋ ma sundana, a nam li fokoŋ tew tew kay ana aŋ, Yawe, aŋ paɗ vunuŋ kiyo, va ma aŋ paɗ vunuŋ ki kamma vunna ki paɗi ni a fafaɗta.»